အိန္ဒိယကဖိလစ်ပိုင်သို့ဒုံး-ကျည်ဒေါ်လာသန်း၂၀၀ကျော်ဖိုးရောင်းမည်

အိန္ဒိယနိုင်ငံအနေဖြင့် ဖိလစ်ပိုင် သို့ ယခုနှစ်အတွင်း ဒေါ်လာသန်း၂၀၀ကျော်ဖိုးတာတိုပစ် ဒုံး-ကျည်များ ရောင်းချပေးရန် မျှော်လင့်ထားသည်ဟု အိန္ဒိယသတင်းရင်းမြစ်များက ရိုက်တာသတင်းဌာနကို ပြောကြားခဲ့သည်။ တရုတ်နှင့် တင်းမာမှုမြင့်မားနေချိန်တွင် နူးဒေလီ၏ မနီလာနှင့် ဒုတိယမြောက် ကာကွယ်ရေးပို့ကုန်ဆိုင်ရာ သဘောတူညီချက်ဖြစ်သည်။

အိန္ဒိယ၏ ကာကွယ်ရေးသုတေသနဌာနက ဖန်တီး ထုတ်လုပ်သည့် Akash ဒုံး-ကျည်စနစ်ကို ဖိလစ်ကိုင်က စိတ်ဝင်စားခဲ့ပြီး ဧပြီလတွင် စတင်မည့် ဘဏ္ဍာရေးနှစ်တွင် ယင်းဒုံး-ကျည်များကို မှာယူသွားမည်ဟု နူးဒေလီကို ပြောဆိုထားကြောင်း သတင်းရင်းမြစ် သုံးခုက ပြောခဲ့သည်။

အဆိုပါကိစ္စသည် အတိမ်းအစောင်းမခံသော အကြောင်းအရာဖြစ်၍ သတင်းရင်းမြစ်အားလုံးက အမည်မဖော်ပြစေလိုခြင်းဖြစ်သည်။

အကွာအဝေး ၁၆ မိုင် အထိ ရောက်ရှိနိုင်သည့် မြေပြင်မှ ဝေဟင်ပစ် ဒုံး-ကျည်စနစ်ကို ယမန်နှစ်က ဒေါ်လာ သန်း ၂၃၀ တန်ဖိုးရှိ သဘောတူညီချက်ဖြင့် အာမေးနီးယားကို ရောင်းချခဲ့သည်ဟု သတင်းရင်းမြစ်များက ပြောသည်။ ဖိလစ်ပိုင်သို့ ရောင်းချပေးမည့် ဒုံးကျည်တန်ဖိုးသည် အာမေးနီးယားထက် ပိုများနိုင်သည်ဟုလည်း ၎င်းတို့က ဆိုသည်။

သို့သော်လည်း ရေဒါများ အပါအဝင် ဆက်စပ်စနစ်များ ပါဝင်မှုနှင့် ဒုံးကျည်အရေအတွက်မည်မျှဆိုသည်ကို ၎င်းတို့က ထုတ်‌ေဖါ်ပြောကြားခဲ့ခြင်း မရှိပေ။

ဒုံး-ကျည်များ ထုတ်လုပ်သည့် အိန္ဒိယကုမ္ပဏီ ဘာရတ်ဒိုင်နမစ်ကုမ္ပဏီ လီမိတက် သည် ယမန်နှစ်က မနီလာတွင် ပြုလုပ်ခဲ့သည့် အာရှ ကာကွယ်ရေးနှင့် လုံခြုံရေးပစ္စည်း ပြပွဲတွင် ပါဝင်ပြသခဲ့သည့် ကုမ္ပဏီတစ်ခုဖြစ်သည်။

ယခုသတင်းနှင့် ပတ်သက်၍ မှတ်ချက်ပေးရန် တောင်းဆိုမှုကို ကုမ္ပဏီနှင့် အိန္ဒိယ ကာကွယ်ရေးဝန်ကြီးဌာနတို့က လောလောဆယ်တွင် တုန့်ပြန်ဖြေကြားခဲ့ခြင်း မရှိသေးပေ။

ဖိလစ်ပိုင် ကာကွယ်ရေးဆိုင်ရာ ပြောရေးဆိုခွင့်ရှိသူတစ်ဦးဖြစ်သည့် Arsenio Andolong က ဝယ်ယူရေးဆိုင်ရာ အစီအစဉ် သို့မဟုတ် သဘောတူညီချက်နှင့် ပတ်သက်၍ မှတ်ချက်ပေးရန် ငြင်းဆိုသော်လည်း နိုင်ငံ၏ စစ်တပ်သည် ယင်းလက်နက်စွမ်းရည်များ လိုအပ်သည်မှာ ထင်ရှားကြောင်း ပြောကြားခဲ့သည်။

Ref: ယူအက်စ်နူးစ်