အာဆီယံ သံမဏိဖိုရမ်ကို မြန်မာနိုင်ငံသံနှင့်သံမဏိအသင်းတက်ရောက်

မလေးရှားနိုင်ငံ၊ ကွာလာလမ်ပူမြို့၌ စက်တင်ဘာ ၂၉ ရက်မှ အောက်တိုဘာ ၁ ရက်အထိကျင်းပလျက်ရှိသော ASEAN Policymakers Conference on Steel နှင့် 2025 ASEAN Iron & Steel Forum: Sustainability & Construction ကို မြန်မာနိုင်ငံသံနှင့်သံမဏိအသင်း ဥက္ကဋ္ဌဒေါက်တာကေသီလွင်နှင့် အဖွဲ့ဝင်များ၊ စက်မှုဝန်ကြီးဌာန၊ အကြီးစားစက်မှုလုပ်ငန်း(၁)မှ မန်နေးဂျင်းဒါ ရိုက်တာဦးမင်းသူနှင့် ဒု-အထွေထွေမန်နေဂျာဦးအောင်ကိုထိုက်တို့ တက်ရောက်လျက်ရှိသည်။

မြန်မာနိုင်ငံမှတက်ရောက်လျက်ရှိသောအဖွဲ့မှာ သံမဏိသည် အခြေခံအဆောက်အဦးများအတွက်အရေးပါပုံနှင့် မရှိမဖြစ်လိုအပ်သောပစ္စည်းဖြစ်ကြောင်း၊ မြန်မာနိုင်ငံ၏ သံမဏိသုံးစွဲမှုနှင့် ကမ္ဘာ့သံမဏိသုံးစွဲမှုများအားနှိုင်းယှဉ်ဆွေးနွေးပြောကြားသွားမည်ဖြစ်သည်။

အဆိုပါ ASEAN Steel Forum 2025 တက်ရောက်လျက်ရှိသဖြင့် မြန်မာကိုယ်စားလှယ်များသည် နောက်ဆက်တွဲမူဝါဒများအတွက် အမြင်အသစ်များရရှိခြင်း၊ စက်မှုတိုးတက်မှုနှင့် သဘာဝပတ်ဝန်းကျင်ထိန်းသိမ်းနိုင်မှုအပေါ် အခြေခံနားလည်မှုမြှင့်တင်ခြင်း၊ မြန်မာ့သံမဏိနယ်ပယ်ကို အာဆီယံအတွင်း အာရုံစိုက်နိုင်ခြင်း၊ နိုင်ငံအတွင်းတိုးတက်မှုနှင့် သဘာဝပတ်ဝန်းကျင်ထိန်းသိမ်းနိုင်မှုမြှင့်တင်ခြင်းအကျိုးကျေးဇူးများရရှိနိုင်မည်ဖြစ်သည်။

ထို့ပြင် အာဆီယံနယ်ပယ်မှ သံမဏိမူဝါဒရေးဆွဲသူများနှင့် စက်မှုထိပ်တန်းဦးဆောင်သူများ၏ အတွေ့အကြုံများကိုလေ့လာပြီး မြန်မာ့သံမဏိနယ်ပယ်တွင်လိုအပ်သည့် သင်ခန်းစာများရယူနိုင်ခြင်း၊ တိုးတက်မှုဆိုင်ရာစည်းမျဉ်းအတွေ့အကြုံများလည်း ရရှိနိုင်မည်ဖြစ်သည်။

ပြည်တွင်းနှင့် ဒေသတွင်းသံမဏိလုပ်ငန်းများအတွက် တည်တံ့ခိုင်မြဲသောဖွံ့ဖြိုးတိုးတက်မှု၊ ကာဗွန်လျှော့ချရေးမူဝါဒများနှင့် ဆောက်လုပ်ရေးအဆင့်မြှင့်ခြင်းများကိုဆွေးနွေးရန်ရည်ရွယ်၍ ASEAN Steel Forum 2025 ကိုကျင်းပခြင်းဖြစ်ကာ အိမ်ရှင်မလေးရှား၊ ဗီယက်နမ်၊ ထိုင်း၊ စင်္ကာပူ၊ ဖိလစ်ပိုင်၊ မြန်မာ၊ အင်ဒိုနီးရှားနိုင်ငံတို့မှ ကိုယ်စားလှယ်များတက်ရောက်လျက်ရှိသည်။