ကမ္ဘောဒီးယားသည် မြန်မာအကျပ်အတည်းကို ဦးစားပေးဖြေရှင်းရန် ယခုနှစ် အာဆီယံသဘာပတိဖြစ်သည့် မလေးရှားကို အပြည့်အဝ ထောက်ခံကြောင်း ထုတ်ဖော်ပြောကြားခဲ့သည်။
မလေးရှားနိုင်ငံ လန်ကာဝီမြို့တွင် ဇန်နဝါရီ ၁၈ ရက်မှ ၁၉ ရက်အထိ အာဆီယံနိုင်ငံခြားရေးဝန်ကြီးများ အစည်းအဝေး (AMM) Retreat ကျင်းပရန်ရှိသည်။
မလေးရှားနိုင်ငံသည် ယခုနှစ်တွင် အာဆီယံဥက္ကဋ္ဌတာဝန်ကို ထမ်းဆောင်နေပြီး ၁၉၆၇ ခုနှစ်က အဖွဲ့ကြီးကို စတင်တည်ထောင်ပြီးနောက် ပဉ္စမအကြိမ်အဖြစ်ဥက္ကဋ္ဌတာဝန်ယူခြင်းဖြစ်သည်။
အာဆီယံဥက္ကဋ္ဌအဖြစ် မလေးရှားသည် မြန်မာနိုင်ငံအကျပ်အတည်းကို ဖြေရှင်းခြင်းအပါအဝင် အဓိကစိန်ခေါ်မှုများအတွက် ဦးစားပေးအဖြေရှာရမည်ဟု အန်ဝါက ယမန်နေ့က ပြောကြားခဲ့ကြောင်း The New Straits Times က ဖော်ပြခဲ့သည်။
“ကမ္ဘောဒီးယားအနေနဲ့ အာဆီယံရဲ့ လက်ရှိဥက္ကဋ္ဌနဲ့ အာဆီယံအဖွဲ့ဝင်နိုင်ငံအားလုံးနဲ့ မြန်မာနိုင်ငံက ပုံမှန်အခြေအနေကိုပြန်ရောက်ဖို့ အာဆီယံမိသားစုကို ကူညီပေးဖို့ ကမ္ဘောဒီးယားက အဆင်သင့်ရှိပါတယ်” ဟု နိုင်ငံခြားရေးဝန်ကြီး ပြောရေးဆိုခွင့်ရှိသူ Chum Sounry က ပြောကြားခဲ့သည်။
မြန်မာနိုင်ငံတွင် နိုင်ငံရေးအကျပ်အတည်းအတွက် ငြိမ်းချမ်းသောအဖြေကို ရှာဖွေရာတွင် အထောက်အကူဖြစ်စေသော အဖွဲ့ဝင်နိုင်ငံများ၏ ကြိုးပမ်းအားထုတ်မှုများကိုလည်း ကမ္ဘောဒီးယားနိုင်ငံက ချီးကျူးဂုဏ်ပြုကြောင်း ၎င်းက အလေးပေးပြောကြားခဲ့ပြီး အားလုံးပါဝင်နိုင်သော တွေ့ဆုံဆွေးနွေးရေးလမ်းကြောင်းကို ရှာဖွေရာတွင် အထောက်အကူဖြစ်စေရန် သက်ဆိုင်သူအများအပြားနှင့် ပူးပေါင်းဆောင်ရွက်လျက်ရှိပါကြောင်း၊ အလိုအပ်ဆုံးသူတွေကို လူသားချင်းစာနာထောက်ထားမှု အကူအညီတွေ ပေးအပ်ရန် Sounry က ပြောကြားခဲ့သည်။
ဝန်ကြီးချုပ် ဟွန်ဆန်သည် ၂၀၂၁ ခုနှစ် ဖေဖော်ဝါရီလ ၁ ရက်နောက်ပိုင်းတွင် မြန်မာနိုင်ငံသို့ လာရောက်လည်ပတ်သည့် အာဆီယံအဖွဲ့ဝင်နိုင်ငံတစ်ခုမှ ပထမဆုံးသော နိုင်ငံ့ခေါင်းဆောင် ဖြစ်လာခဲ့ပြီး ၂၀၂၂ ခုနှစ် ဇန်နဝါရီလတွင် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံခဲ့သည်။ .
Ref:ခမာတိုင်းမ်စ်