ထိုင်း၊ ဇူလိုင်-၂၂
၂၀၂၆-၂၀၂၇ မြန်မာနေရှင်နယ်လိဂ်အတွက် ရာသီကြိုပြင်ဆင်နေသည့် ရန်ကုန်စီးတီးအသင်းသည် ထိုင်းနိုင်ငံတွင် ယှဉ်ပြိုင်ခဲ့သည့် ပထမဆုံးခြေစမ်းပွဲ၌ ထိုင်းလိဂ်-၃ ကလပ် Pluak Daeng United အသင်းကို ၂ ဂိုး ၁ ဂိုးဖြင့် အနိုင်ရရှိခဲ့ကြောင်း သိရသည်။
အဆိုပါပွဲကို CK Stadium တွင် မိနစ် ၃၀ စီဖြင့် သုံးပိုင်းခွဲကစားခဲ့ပြီး ရန်ကုန်စီးတီးအသင်းက စီနီယာကစားသမားများနှင့် လူငယ်ကစားသမားများကို ပေါင်းစပ်၍ ကစားခဲ့ကြကြောင်း သိရသည်။
ပွဲချိန် ပထမပိုင်းနှင့် ဒုတိယပိုင်းတို့တွင် နှစ်သင်းစလုံး ဂိုးမသွင်းနိုင်ဘဲ ဂိုးမရှိသရေဖြင့် ပြီးဆုံးခဲ့သော်လည်း တတိယပိုင်းတွင် လူငယ်ကစားသမား နေလင်းသန့်က အဖွင့်ဂိုးသွင်းယူခဲ့ပြီး၊ အသက် ၁၆ နှစ်သာရှိသေးသည့် ထက်အာကာဝင်းက ဒုတိယအနိုင်ဂိုးကို ထပ်မံသွင်းယူပေးခဲ့ခြင်းဖြစ်သည်။
နှစ်ဂိုးအရှုံးဖြင့် နောက်ကျနေသည့် Pluak Daeng United အသင်းက ပွဲချိန် ၈၅ မိနစ်တွင် ချေပဂိုးတစ်ဂိုး ပြန်လည်သွင်းယူနိုင်ခဲ့သော်လည်း ကျန်ပွဲချိန်တွင် နှစ်သင်းစလုံး ဂိုးထပ်မံမသွင်းနိုင်သဖြင့် ရန်ကုန်စီးတီးအသင်းက ၂ ဂိုး ၁ ဂိုးဖြင့် အနိုင်ရရှိခဲ့သည်။
ဒုတိယအနိုင်ဂိုးဖန်တီးရှင် ထက်အာကာဝင်းသည် ရန်ကုန်စီးတီးအသင်းနှင့်အတူ လေ့ကျင့်လျက်ရှိသည့် အသက်အငယ်ဆုံးကစားသမားများအနက် တစ်ဦးဖြစ်ပြီး အသက် ၁၆ နှစ်ရှိကာ ရန်ကုန်တိုင်းဒေသကြီးဘောလုံးအသင်းမှ ရွေးချယ်ထားသူဖြစ်သည်ဟု အသင်းက အသိပေးထားသည်။
ရန်ကုန်စီးတီးအသင်းသည်၂၀၂၆-၂၀၂၇ မြန်မာနေရှင်နယ်လိဂ်ပြိုင်ပွဲအတွက် ရာသီကြိုပြင်ဆင်မှုအဖြစ် ထိုင်းနိုင်ငံတွင် တစ်လကြာ လေ့ကျင့်မည်ဖြစ်ပြီး ထိုင်းလိဂ်ကလပ်များနှင့် ထိုင်းနိုင်ငံ၌ ရာသီကြိုပြင်ဆင်နေသည့် အရှေ့အာရှကလပ်အသင်းအချို့နှင့်လည်း ခြေစမ်းပွဲများ ဆက်လက်ယှဉ်ပြိုင်ကစားသွားမည်ဖြစ်သည်။
ယခုလေ့ကျင့်ရေးခရီးစဉ်တွင် ကစားသမား ၂၆ ဦးနှင့် အုပ်ချုပ်/နည်းပြအဖွဲ့ဝင် ၁၁ ဦး စုစုပေါင်း ၃၇ ဦး လိုက်ပါသွားခဲ့ပြီး၊ မြန်မာ့လက်ရွေးစင်အသင်းတွင် ရွေးချယ်ခံထားရသည့် ကစားသမား ၄ ဦးမှာ AFF Hyundai Cup ပြိုင်ပွဲပြီးဆုံးမှသာ ကလပ်အသင်းနှင့် ပြန်လည်ပူးပေါင်းမည်ဖြစ်ကြောင်း သိရသည်။