သက်ကြီးရွယ်အိုဘုန်းတော်ကြီး ဒလိုင်းလားမားသည် သူကွယ်လွန်ပါက လူဝင်စားမည်ဟု ပြောကာ သူ့အရိုက်အရာကို ဆက်ခံမည့်သူနှင့် ပတ်သက်သော ထင်ကြေးပေးမှုများကို လျော့ပါးစေရန်ကြိုးပမ်းခဲ့ပြီးနောက်ရက်ပိုင်းအကြာတွင် သူသည် အသက်၁၃၀ ကျော်အထိ နေရရန်မျှော်လင့်ထားသည်ဟု စနေနေ့တွင် ပြောကြားလိုက်သည်။
တနင်္ဂနွေတွင်ကျရောက်မည့် သူ၏သက်တော် ၉၀ ပြည့်မွေးနေ့အကြိုအဖြစ် နောက်လိုက်နောက်ပါ တပည့်ဒါယကာ ဒါယိကာ များက စီစဉ်ပြုလုပ်သော သက်တော်ရာကျော်ရှည်စေကြောင်း ဆုတောင်း ပတ္တနာပြုသည့် အခမ်းအနားတွင် တိဘက်ဗုဒ္ဓဘာသာရေးရာခေါင်းဆောင်က ထိုရဲ့သို့ ပြောဆိုခဲ့ခြင်းဖြစ်သည်။ ဒလိုင်းလားမားက သူအသက်၁၁၀ အထိနေရနိုင်သည်ဟုဒီဇင်ဘာလအတွင်းက ရို-က်တာသတင်းဌာနကို ပြောထားသေးသည်။
“အသက် ၁၃၀ ကျော်အထိနေရမယ်လို့ ငါမျှော်လင့်ထားတုန်းပဲ” ဟု အိန္ဒိယနိုင်ငံမြောက်ပိုင်း တောင်ပေါ်မြို့ Dharamshala တွင် စုရုံးရောက်ရှိနေကြသည့် ကမ္ဘာတစ်ဝန်းမှ ရာနှင့်ချီသော တပည့် ဒါယကာ ဒါယိကာ များကို ဒလိုင်းလားမားက ပြောကြားခဲ့သည်။သူသည် ၁၉၅၉ ခုနှစ်က တရုတ်အုပ်ချုပ်မှုကို ဆန့်ကျင်သော မအောင်မြင်သည့် အုံကြွမှုအပြီးတွင် တိဘက်မှ ထွက်ပြေးကာ Dharamshala တွင် နေထိုင်ခဲ့ခြင်းဖြစ်သည်။
“ငါတို့ တိုင်းပြည်ကို ဆုံးရှုံးရပြီး အိန္ဒိယမှာ ပြည်ပြေးအဖြစ်နေရတယ်၊ဒါပေမယ့် သတ္တဝါတွေအတွက် တော်တော်အကျိုးရှိစေခဲ့ပါတယ်။ဒါကြောင့် Dharamshala မှာနေထိုင်ရင်း သတ္တဝါတွေကောင်းကျိုးအတွက် တရားဓမ္မတွေကို တတ်နိုင်သမျှ အားထုတ်သွားဖို့ ရည်ရွယ်ထားပါတယ်”ဟု ဗုဒ္ဓမြတ်စွာ၏ အဆုံးအမများကို ရည်ညွှန်း၍ ပြောကြားခဲ့သည်။
ပေကျင်းသည် ဒလိုင်းလားမားကို ခွဲထွက်ရေးသမားတစ်ဦးအဖြစ် ရှုမြင် ထားပြီး သူ့အရိုက်အရာဆက်ခံမည်သူကို အင်ပိုင်ယာမှ ဆင်းသက်သူအဖြစ် မှတ်ယူ၍ နိုင်ငံ၏ ခေါင်းဆောင်များက အတည်ပြုပေးမည်ဖြစ်ကြောင်း အခိုင်အမာ ပြောကြားခဲ့သည်။
လွတ်လပ်သော ကမ္ဘာတွင် လူပြန်ဝင်စားမည်ဟု ယခင်က ပြောခဲ့ဖူးသော ဒလိုင်းလားမားက သူ၏ လူဝင်စားခြင်းကို အသိအမှတ်ပြုရန် တစ်ခုတည်းသော အခွင့်အာဏာသည် သူ၏ အကျိုးအမြတ်မယူသော အဖွဲ့အစည်းဖြစ်သည့် Gaden Phodrang Trust မှာသာ တည်ရှိကြောင်း တပည့် ဒါယကာ ဒါယိကာ များအား ယခုသီတင်းပတ်တွင် ပြောကြားခဲ့သည်။ Ref: သည်စထရိတ်တိုင်းမ်စ်