စွမ်းအင်ထောက်ပံ့မှုနှင့် ကမ္ဘာ့စီးပွားရေးအပေါ် သက်ရောက်မှုများကို သတိပေး
မနီလာ၊ ဇူလိုင် ၂၂
အရှေ့အလယ်ပိုင်းဒေသတွင် ပဋိပက္ခများ ပိုမိုပြင်းထန်လာခြင်းအပေါ် အလွန်စိုးရိမ်ကြောင်းနှင့် ယင်းအခြေအနေသည် စွမ်းအင်ထောက်ပံ့မှု၊ ကမ္ဘာ့စီးပွားရေးနှင့် ဒေသတွင်းတည်ငြိမ်ရေးတို့အပေါ် ဆိုးကျိုးများ ဖြစ်ပေါ်စေနိုင်ကြောင်း အာဆီယံနိုင်ငံခြားရေးဝန်ကြီးများက ထုတ်ဖော်ပြောကြားခဲ့သည်။
အာဆီယံအဖွဲ့ဝင် ၁၁ နိုင်ငံနှင့် အဓိကမိတ်ဖက်နိုင်ငံများ၏ နိုင်ငံခြားရေးဝန်ကြီးများသည် မနီလာမြို့တွင် ယခုသီတင်းပတ်အတွင်း ကျင်းပလျက်ရှိသည့် အစည်းအဝေးများတွင် အမေရိကန်နှင့် အီရန်အကြား တင်းမာမှုများ ပြန်လည်မြင့်တက်လာခြင်း၊ ဟော်မုဇ်ရေလက်ကြားမှ စွမ်းအင်တင်ပို့မှုအခြေအနေနှင့် ကမ္ဘာလုံးဆိုင်ရာ ငွေကြေးဖောင်းပွမှု၊ စီးပွားရေးတိုးတက်မှုတို့အပေါ် သက်ရောက်နိုင်သည့် အကျိုးဆက်များကို အဓိကဆွေးနွေးခဲ့ကြကြောင်း သိရသည်။
ယီမင်နိုင်ငံရှိ အီရန်မဟာမိတ် ဟူသီအဖွဲ့က ဆော်ဒီအာရေဗျအပေါ် ရေတပ်ပိတ်ဆို့မှု ပြုလုပ်မည်ဟု ကြေညာခဲ့ခြင်းသည် ပဋိပက္ခကို ပိုမိုကျယ်ပြန့်စေမည့် အခြေအနေတစ်ရပ်ဖြစ်ပြီး ကမ္ဘာလုံးဆိုင်ရာ စွမ်းအင်ထောက်ပံ့မှုနှင့် ကုန်သွယ်ရေးအပေါ် ခြိမ်းခြောက်မှုများ မြင့်တက်လာစေကြောင်းလည်း ဝန်ကြီးများက သုံးသပ်ခဲ့ကြသည်။
“ယခုဖြစ်ပေါ်တိုးတက်မှုများသည် ကြားဝင်စေ့စပ်ရေး ကြိုးပမ်းမှုများကို ပြင်းထန်စွာ ထိခိုက်စေပြီး ဆွေးနွေးညှိနှိုင်းမှုနှင့် သံတမန်နည်းလမ်းဖြင့် ငြိမ်းချမ်းစွာ ဖြေရှင်းနိုင်ရေး အလားအလာကို လျော့ပါးစေသည်ကို ကျွန်ုပ်တို့ အလွန်စိုးရိမ်မိပါသည်” ဟု တံခါးပိတ်အစည်းအဝေးအပြီး ထုတ်ပြန်သည့် ကြေညာချက်တွင် ဖော်ပြထားသည်။
ပြည်တွင်းထုတ်ကုန်စုစုပေါင်း (GDP) အမေရိကန်ဒေါ်လာ ၃ ဒသမ ၈ ထရီလီယံ ခန့်ရှိသည့် အရှေ့တောင်အာရှဒေသသည် အဓိကရေနံတင်သွင်းသည့် ဒေသဖြစ်သဖြင့် စွမ်းအင်ထောက်ပံ့မှု အနှောင့်အယှက်များ ဖြစ်ပေါ်လာပါက ထိခိုက်မှု ကြီးမားနိုင်ကြောင်းနှင့် ယင်းသက်ရောက်မှုကို လျှော့ချနိုင်ရန် အာဆီယံ၏ ရေနံမျှဝေရေးယန္တရားကို အရှိန်မြှင့်ဆောင်ရွက်ရန်လည်း ဆွေးနွေးခဲ့ကြကြောင်း သိရသည်။
ထို့ပြင် အာဆီယံနိုင်ငံခြားရေးဝန်ကြီးများသည် မြန်မာ့အရေးနှင့် ပတ်သက်သည့် အလွတ်သဘော တိုင်ပင်ဆွေးနွေးပွဲကိုလည်း ကျင်းပမည်ဖြစ်ပြီး၊ တောင်တရုတ်ပင်လယ်အတွင်း တင်းမာမှုများနှင့် ပတ်သက်၍လည်း ဆွေးနွေးသွားမည်ဖြစ်ကြောင်း သိရသည်။
အာဆီယံနှင့် တရုတ်နိုင်ငံတို့သည် တောင်တရုတ်ပင်လယ်အတွင်း ပဋိပက္ခများ ပိုမိုမပြင်းထန်လာစေရန် ရည်ရွယ်သည့် အပြုအမူဆိုင်ရာ ကျင့်ဝတ် (Code of Conduct) ရေးဆွဲရေးကို ဆယ်နှစ်နီးပါးကြာ ဆက်လက်ညှိနှိုင်းနေဆဲဖြစ်ကြောင်းလည်း သိရသည်။
Ref: Reuters