အရှေ့ပိုင်းယူကရိန်း မှ ရုရှားထောက်ခံသည့် စစ်အဖွဲ့ ခေါင်းဆောင် အာမန် ဆာကစ်ဆန် ကို တနင်္လာနေ့တွင် မော်စကိုမြို့ရှိ ဇိမ်ခံအဆင့်မြင့် အိမ်ရာအဆောက်အအုံတွင် ဗုံးပေါက်ကွဲမှုကြောင့် ေ-သဆုံးခဲ့ကြောင်း TASS သတင်းဌာန နှင့် အခြားရုရှားမီဒီယာများက ဖော်ပြခဲ့ကြသည်။ TASS သတင်းဌာန ကတော့ ဒီဗုံးပေါက်ကွဲမှုဟာ အသေအခြာစီစဉ်ထားတဲ့လုပ်ကြံမှုတစ်ခုဖြစ်သည်ဟု သုံးသပ်ထားသည်။
ရုရှားမီဒီယာများ၏ ဖော်ပြချက်အရ ဆာကစ်ဆန် သည် သူ့၏ကိုယ်ရံတော်များနှင့်အတူ မော်စကိုမြစ် ကမ်းခြေတစ်လျှောက်ရှိ Scarlet Sails အိမ်ရာ၏ မြေညီထပ်သို့ ဝင်ရောက်သည့်အချိန်တွင် ဗုံးပေါက်ခဲ့ခြင်းဖြစ်ပြီး ယင်းနေရာသည် ခရမ္မလင် နန်းတော်နှင့် ၁၂ ကီလိုမီတာ (၇ မိုင်) ခန့်သာ ဝေးကွာသည့်နေရာလည်းဖြစ်သည်။ သက်တော်စောင့် တစ်ဦးသေဆုံးခဲ့ပြီး ၃ ဦး ဒဏ်ရာရရှိခဲ့ကြောင်း Kommersant သတင်းစာကဖော်ပြထားသည်။
ဆာကစ်ဆန် ကိုလုပ်ကြံသတ်ဖြတ်ရန် ကြံစည်မှုကို သေချာစီစဉ်၍ တစ်စုံတစ်ယောက်က အမိန့်ပေးခဲ့ခြင်းဖြစ်ပြီး လုံခြုံရေးစုံစမ်းဆေးရေးအရာရှိများက ယင်းရာဇဝတ်မှုကို မည်သူက အမိန့်ပေးခဲ့သည်ကို လက်ရှိတွင် ဖော်ထုတ်နေတယ်လို့ တရားဥပဒေအဖွဲ့ဝင်တစ်ဦးကို ကိုးကား၍ TASS သတင်းဌာနက ဖော်ပြခဲ့သည်။
ရုရှားလုံခြုံရေးဝန်ဆောင်မှုများနှင့် ဆက်သွယ်မှုရှိသည့် Baza အမည်ရှိ Telegram Channel သည် အဆောက်အအုံ၏ ဝင်ပေါက်ဧရိယာတွင် ပေါက်ကွဲမှုကြောင့်ကြီးမားသော ပျက်စီးဆုံးရှုံးမှုများကို ပြသသည့် ဗီဒီယိုကို တင်ထားခဲ့သည်။
ရိုက်တာသတင်းထောက်များက ပေါက်ကွဲမှုဖြစ်ပွားသောနေရာတွင် ပြိုကျသွားသည့် မှန်တံခါးများ ကို တွေ့မြင်ခဲ့ပြီး ဒဏ်ရာရသူများကို သယ်ယူပို့ဆောင်ပေးနေသော ရဟတ်ယာဉ် တစ်စီးကိုလည်း မြင်တွေ့ခဲ့ကြကြောင်း ယင်းအခင်းဖြစ်ပွားရာနေရာတွင် ရဲတပ်ဖွဲ့များ အများအပြားသွားလာနေသည် ကိုလည်း တွေ့မြင်ခဲ့ကြကြောင်းဖော်ပြထားသည်။
ဆာကစ်ဆန် ကို ယူကရိန်းနိုင်ငံ၏ Donetsk နယ်မြေဒေသတွင် ရာဇဝတ်မှုအဖွဲ့ခေါင်းဆောင် တစ်ဦးအဖြစ် ဖော်ပြခဲ့ပြီး ယင်းနယ်မြေဒေသကို ၂၀၁၄ ခုနှစ်မှစ၍ မော်စကိုကထိန်းချုပ် ပေးလျက်ရှိသည်။ထို့ပြင် သူသည် တရားမဝင် လက်နက်ကိုင်အဖွဲ့များတွင် ပါဝင်မှုနှင့် အထောက်အပံ့ပေးမှုကြောင့် သံသယ ရှိနေသူဟု ယူကရိန်း SBU လုံခြုံရေးအဖွဲ့အစည်းက ဒီဇင်ဘာလတွင် ထုတ်ဖော်ပြောကြားခဲ့သည်။ ဆာကစ်ဆန် က ဒေသခံအကျဉ်းသားတိုက်ခိုက်သမား များဖြင့် ရုရှားထောက်ခံသည့် စစ်တပ်တစ်ခု ဖွဲ့စည်းခဲ့ပြီး ရှေ့တန်းတပ်များအတွက် လိုအပ်သည့်ထောက်ပံ့မှုများ ကိုယ်တိုင် စီစဉ်ဝယ်ယူပေးခဲ့သည် ဟု လည်း သိရသည်။
အာမေးနီးယားနွယ်ဖွား ဆာကစ်ဆန် က Donetsk နယ်မြေဒေသရှိ ဟော်လ်လီဗ်ကာ မြို့တွင် ရာဇဝတ်မှုအဖွဲ့ခေါင်းဆောင်တစ်ဦးအဖြစ် ရာဇဝတ်မှုများကို ပါဝင်ဆောင်ရွက်ခဲ့သည်ဟု လွတ်လပ်သော ရုရှားမီဒီယာ Mediazona ကရေးသားဖော်ပြထားသည်။ Kyiv ရဲ့ တပ်ဖွဲ့များကိုတိုက်ခိုက်ရန်အတွက် ဆာကစ်ဆန် က ၎င်း၏လုပ်ဖော်ကိုင်ဖက် အာမေးနီးယန်း အများစု ပါဝင်ပြီး ရုရှားလိုလားသော အရံ တပ်ဖွဲ့တစ်ခုကို ၂၀၂၂ ခုနှစ်တွင် တည်ထောင်ခဲ့သူဖြစ်သည်။
ဒီဇင်ဘာလတွင် ယူကရိန်းဘက်က ရုရှားစစ်ဗိုလ်ချုပ်ကြီး အီဂိုအာ ကီရီလိုဗ် ကို မော်စကိုမြို့ တိုက်ခန်းအဆောက်အအုံ၏အပြင်ဘက်တွင် ဗုံးခွဲ လုပ်ကြံခဲ့မှုကို ထုတ်ဖော်ဂုဏ်ယူခဲ့သော်လည်း ယခု တနင်္လာနေ့ ဗုံးခွဲမှုကို မှတ်ချက်ပေးထားခြင်း၊တုံ့ပြန်ခြင်း မရှိသည်ကိုတွေ့ရှိရသည်။
Ref: ရိုက်တာ