အရွယ်ရောက်ပြီးသူတိုင်း ၂၄ ဒေါ်လာ‌ထောက်ပံ့မည်–အန်ဝါ

အရွယ်ရောက်ပြီးသူတိုင်းကို ထောက်ပံ့ကြေးပေးခြင်းနှင့် လောင်စာဆီဈေးနှုန်းများ ချပေးမည်ဟု ကတိပြုခြင်းအပါအဝင် လူနေမှုစရိတ်မြင့်တက်လာမှုနှင့် ပတ်သက်၍ ကြီးထွားလာသော မကျေနပ်ချက်များကို ဖြေရှင်းရန် ကြိုးပမ်းသည့် စီမံချက်အသစ်များကို မလေးရှားဝန်ကြီးချုပ် အန်ဝါအီဘရာဟင်က ဗုဒ္ဓဟူးနေ့(ဇူလိုင်လ ၂၃ရက်နေ့) တွင် ကြေညာခဲ့သည်။

မြို့တော်ကွာလာလမ်ပူရ်တွင် စနေနေ့၌ ပြုလုပ်ရန် စီစဉ်ထားသော ဆန္ဒပြပွဲမတိုင်မီ ယခုကြေညာချက်ထွက်လာခြင်းဖြစ်ပြီး ကုန်ဈေးနှုန်းများ မြင့်တက်နေခြင်း၊ ပြုပြင်ပြောင်းလဲရေး ကတိကဝတ်များကို ဖြည့်ဆည်းရန် ပျက်ကွက်ခြင်းနှင့် အခြားစိုးရိမ်ပူပန်ခြင်းများကြောင့် အန်ဝါရာထူးမှနုတ်ထွက်ရန်တောင်းဆိုနေကြသည်။

အန်ဝါ၏ အစိုးရအဖွဲ့သည် အနည်းဆုံးလုပ်ခလစာနှုန်းထားကို မြှင့်တင်ခြင်း၊ ဓါတ်အားအမြောက်အများသုံးစွဲသူများကို မီတာခွန်တိုးကောက်ခြင်းနှင့် အချို့သစ်သီးဝလံသွင်းကုန်များနှင့် ဇိမ်ခံပစ္စည်းများအပေါ် အရောင်းခွန်သစ်များချမှတ်ခြင်း အပါအဝင် ယခုနှစ်တွင် ဝင်ငွေနှင့် ကုန်ထုတ်စွမ်းအားကို မြှင့်တင်ရန် အစီအမံများစွာကို ချမှတ်ဆောင်ရွက်ခဲ့သည်။

ယင်းအစီအမံများသည် စီးပွားရေးလုပ်ငန်းကြီးများနှင့် ချမ်းသာကြွယ်ဝသူများကို အဓိကပစ်မှတ်ထားသည်ဟု အန်ဝါက ပြောကြားသော်လည်း စရိတ်စကများ မြင့်မားလာကာ နောက်ဆုံးတွင် ဝင်ငွေနိမ့်သူနှင့် အလယ်အလတ်ဝင်ငွေရှိသူများအပါအဝင် စားသုံးသူများသာ ဒဏ်ခံရမည်ကို စိုးရိမ်ကြောင်း ဝေဖန်သူများက ပြောကြားခဲ့ကြသည်။

အသက် ၁၈ နှစ်နှင့်အထက် အရွယ်ရောက်ပြီး မလေးရှားနိုင်ငံသားတိုင်းသည် သြဂုတ်လ ၃၁ ရက်နေ့မှစ၍ ထုတ်ပေးမည့် တစ်ကြိမ်တည်းသော ထောက်ပံ့ကြေး ရင်းဂစ် ၁၀၀( ၂၄ ဒေါ်လာ) ကို ရရှိမည်ဖြစ်ကြောင်း ဗုဒ္ဓဟူးနေ့တွင် အန်ဝါက ပြောကြားခဲ့သည်။

အစိုးရသည် ယခုနှစ်အတွက် မူလက ခွဲဝေချထားပေးသည့် ရင်းဂစ် ၁၃ ဘီလျံမှ ၂၀၂၅ ခုနှစ်တွင် စုစုပေါင်း ရင်းဂစ် ၁၅ ဘီလျံ သုံးစွဲသွားမည်ဟု ၎င်းက ပြောကြားသည်။

အတိုက်အခံပါတီများက စီစဉ်သော စနေနေ့ဆန္ဒပြပွဲသို့ လူဦးရေ ၁၀,၀၀၀ နှင့် ၁၅,၀၀၀ အကြား တက်ရောက်မည်ဟု မျှော်လင့်ထားကြောင်း ရဲတပ်ဖွဲ့က ပြောကြားခဲ့သည်။

“စောဒကတက်တာတွေကို ကျွန်တော်တို့ အသိအမှတ်ပြုပါတယ်၊ အမျိုးမျိုးသော အစီအမံတွေကို ကြေညာခဲ့ပေမယ့် လူနေမှုစရိတ်ဟာ ဖြေရှင်းရမယ့် စိန်ခေါ်မှုအဖြစ်ဆက်ရှိနေသေးတာကို လက်ခံပါတယ်” ဟု အန်ဝါက ပြောခဲ့သည်။

Ref: စီအင်န်အေ