အရည်ပျော်နေသည့်ရေခဲမျောတုံးကြီးကထိုင်းကမ်းရိုးတန်းကိုခြိမ်းခြောက်နေ

ကမ္ဘာ့အပူချိန်များ မြင့်တက်နေမှုကြောင့် ကမ္ဘာ့အကြီးဆုံး ရေခဲမျောတုံးကြီး အလျင်အမြန် အရည်ပျော်နေခြင်းသည် ပင်လယ်ရေမျက်နှာပြင် ကို မြင့်တက်စေကာ လာမည့် ၂၅ နှစ်အတွင်း ထိုင်းနိုင်ငံ၏ ကမ်းရိုးတန်းကို ပျောက်ကွယ်သွားစေနိုင်သည့် အခြေအနေကို အမြန် တွန်းပို့နေသည်ဟု ပညာရှင်တစ်ဦးက တနင်္လာနေ့တွင် သတိပေးခဲ့သည်။

ကျန်းမာရေးနှင့် သဘာဝပတ်ဝန်းကျင်ရေးရာ ကျွမ်းကျင်ပညာရှင်တစ်ဦးဖြစ်သည့် Sonthi Kotchawat ၏ အဆိုအရ စုစုပေါင်း ဧရိယာ ၃,၅၀၀ စတုရန်းကီလိုမီတာ သို့မဟုတ် မြို့တော်ဘန်ကောက်အရွယ်အစားထက် နှစ်ဆကျော်ရှိသော A23a အမည်ရ ရေခဲမျောတုံးကြီးသည် အန္တာတိကအနီး တောင်ဂျော်ဂျီယာကျွန်းကမ်းလွန်တွင် သောင်တင်သွားခဲ့သည်ဟု ဆိုသည်။

ပျှမ်းမျှ အထူ ၂၈၀ မီတာခန့်ရှိသော ကမ္ဘာ့အကြီးဆုံး ရေခဲမျောတုံးကြီးသည် ၁၉၈၆ ခုနှစ်တွင် အန္တာတိကမှ ကွဲထွက်သွားခဲ့ခြင်းဖြစ်သည်။

ပျှမ်းမျှ ကမ္ဘာ့အပူချိန်သည် ပါရီသဘောတူညီချက်အရ ထိန်းထားရန် သတ်မှတ်သော ၁ ဒဿမ ၅ ဒီဂရီဆဲလ်စီးယမ်စ်ထက် ကျော်လွန်ကာ ဆက်လက်မြင့်တက်နေသောကြောင့် ရေခဲမျောတုံးကြီးသည် သေးငယ်သော ရေခဲမျောတုံးများအဖြစ် ကွဲထွက်သွားနိုင်ခြေရှိနေကာ တောင်ပိုင်းသမုဒ္ဒရာအတွင်းရှိ အဓိက သင်္ဘောလမ်းကြောင်းများကို အနှောင့်အယှက်ပေးလာနိုင်သည်ဟု သူက ပြောကြားခဲ့သည်။

ရေခဲမျောတုံးများသည် စီးပွားဖြစ် ငါးဖမ်းလုပ်ငန်းများကို အနှောင့်အယှက်ဖြစ်စေနိုင်သကဲ့သို့ ပင်လယ်ဖျံများနှင့် ပင်ဂွင်းများအပါအဝင် ဒေသမျိုးစိတ်များကို ထိခိုက်နိုင်သည်ဟု သူက ဆက်လက်ပြောကြားခဲ့သည်။

ရေခဲမျောတုံးများ အရည်ပျော်လာသည်နှင့်အမျှ ၎င်းသည် လေထုအတွင်းသို့ ကာဗွန်ဒိုင်အောက်ဆိုက် ပမာဏများစွာကို ထုတ်လွှတ်ရုံသာမက ရေခဲမျောတုံးအတွင်း ပိတ်မိနေသော သတ္ထုဓါတ်များနှင့် အာဟာရများကို ပတ်ဝန်းကျင်ရေထုအတွင်း ထုတ်ပေးကာ ဒေသ အစားအစာကွင်းဆက်ကို ထိခိုက်စေနိုင်သည့် ရေမျောပန်းပွင့်များဖြစ်ပေါ်စေနိုင်သည်ဟုလည်း သူက ဆိုသည်။

ရေခဲမျောတုံးကြီးမှ ထုတ်လွှတ်သော ရေပမာဏ အများအပြားသည် ပင်လယ်ရေမျက်နှာပြင်ကို အလျင်အမြန်မြင့်တက်စေကာ ကမ်းရိုးတန်းဒေသများအတွက် အန္တရာယ်ဖြစ်စေသည်။

တစ်နှစ်တစ်နှစ်လျှင် ပင်လယ်ရေမျက်နှာပြင်မြင့်တက်မှု ၅ ဒဿမ ၈ မီလီမီတာ ရှိနေခဲ့သော ထိုင်းနိုင်ငံတွင် ဆမွတ် ပရာခန်ပြည်နယ်၏ Phra Samut Chedi ခရိုင်၊ ဘန်ကောက်၏ Bang Khun Thian ခရိုင်၊ ဆမွတ် ဆာခွန်၏ Mueang ခရိုင်တို့သည် အထိခိုက်ဆုံးဒေသများ ဖြစ်လိမ့်မည်ဟု သူက သတိပေးခဲ့သည်။

အကယ်၍ လက်ရှိအနေအထားအတိုင်းသာ ဆက်လက်ဖြစ်နေစေပါက Bang Kholaem၊ Bang Rak၊ Thon Buri၊ Bangkok Yai၊ Bangkok Noi၊ Bang Na၊ Bang Kapi၊ Bang Khen၊ Don Muang ခရိုင်များနှင့် Ramkhamhaeng ဧရိယာတို့ကဲ့သို့ ကုန်းတွင်းပိုင်းကျသော မြေနိမ့်ဒေသများတွင် ရေကြီးမှုများ ပိုမိုဖြစ်ပွားလာမည်ဟု ယူနက်စကို၏ အစီရင်ခံစာကို ကိုးကား၍ မစ္စတာ Sonthi က ပြောကြားခဲ့သည်။

ယင်းသည် ထိုင်းနိုင်ငံ လူဦးရေ၏ ၁၀ ရာခိုင်နှုန်းအပေါ် ဆိုးရွားသော အကျိုးသက်ရောက်မှုများ ရှိလာမည်ဖြစ်သည်ဟု သူက ပြောကြားခဲ့သည်။

Ref: ဘန်ကောက်ပို့စ်