အမေရိကန်သမ္မတဟောင်း ဘီလ်ကလင်တန် ဆေးရုံတက်ရ

အမေရိကန်သမ္မတဟောင်း ဘီလ်ကလင်တန်သည် အဖျားတက်သဖြင့် တနင်္လာနေ့မွန်းလွဲပိုင်းက ဝါရှင်တန်ဒီစီရှိ ဆေးရုံတစ်ခုတွင် တက်ရောက်ခဲ့ရကာ ဆေးစစ်‌ဆေး ၍ ကုသမှု ခံယူခဲ့သည်ဟု ၎င်း၏ ပြောရေးဆိုခွင့်ရှိသူက စီအင်န်အင်န်သတင်းဌာနကို ပြောကြားခဲ့သည်။

“သမ္မတကြီး အခြေအနေကောင်းပါတယ်” ဟု ကလင်တန်၏ ဒုတိယဦးစီးအရာရှိချုပ် အိန်ဂျယ် အာရန်နာက စီအင်န်အင်န်နှင့် အင်တာဗျူးတွင် ပြောဆိုခဲ့ပြီး သမ္မတဟောင်းအနေဖြင့် ခရစ္စမတ်နေ့တွင် ဆေးရုံမှ ဆင်းရမည်ဟု မျှော်လင့်ကြောင်းလည်း ပြောကြားခဲ့သည်။ သူ့ စိတ်အခြေအနေ ပုံမှန်ပင်ရှိနေကြောင်းနှင့် သူ့ကို ပြုစုကုသပေးမှုအတွက် အလွန်ကျေးဇူးတင်နေကြောင်းလည်း ၎င်းက ဆက်လက် ပြောဆိုခဲ့သည်။

ဝါရှင်တန်ရှိ နေအိမ်တွင် နေထိုင်နေသည့် အသက် ၇၈ နှစ်အရွယ် ကလင်တန်ကို MedStar ဂျော့တောင်းဆေးတက္ကသိုလ်သို့ တင်ပေးခဲ့ကြောင်းနှင့် သူသည် ဆေးရုံတွင် အနည်းဆုံး တစ်ညအိပ်ခန့် နေထိုင်ရမည်ဟု မျှော်လင့်ကြောင်း လက်ထောက်ဖြစ်သူက ပြောကြားခဲ့ပြီး သမ္မတသည် သတိကောင်းကောင်း ရှိနေသည်ဟု ဆိုခဲ့သည်။

ခရစ္စမတ်မတိုင်မီ နှစ်ရက်အလိုတွင် သမ္မတဟောင်း ဆေးရုံတက်ရသည့် သတင်းစကားသည် ကလင်တန် လုပ်ဖော်ကိုင်ဖက်ဟောင်းများအကြား အလျင်အမြန်ပျံ့နှံ့သွားခဲ့သည်။ သမ္မတဟောင်း၏ အခြေအနေသည် အရေးပေါ်အခြေအနေ၊ စိုးရိမ်ဖွယ် အခြေအနေမဟုတ်ဟု ကလင်တန်၏ သက်တမ်းရှည် လက်တွဲဖော်တစ်ဦးက ပြောဆိုခဲ့သည်။

လွန်ခဲ့သည့် ၂၅ နှစ်နီးပါးက အိမ်ဖြူတော်မှ ထွက်ခွာပြီးချိန်မှစကာ အမေရိက၏ ၄၂ ဦးမြောက် သမ္မတသည် ကျန်းမာရေးပြဿနာများစွာကို ကြံ့ကြံ့ခံ ကျော်ဖြတ်ထားခဲ့သည်။

Ref: စီအင်န်အင်န်