အမေရိကန်ပြည်ထောင်စုသို့လာလိုသည့် နိင်ငံခြားသားများအား ဒေါ်လာ ၅ သန်းတန် “ရွှေကတ်(Gold Card)”များရောင်းချသွားမည်ဖြစ်ပြီး ယင်းကတ်ဝယ်ယူသူများအား အမေရိကန်တွင် နေထိုင်ခွင့်၊ အလုပ်လုပ်ကိုင်ခွင့်နှင့် နိုင်ငံသားဖြစ်ခွင့် ပေးမည်ဖြစ်ကြောင်း သမ္မတထရမ့်က အင်္ဂါနေ့တွင် ပြောကြားခဲ့သည်။
“ကျွန်တော်တို့ဟာ ရွှေကတ်ကို ရောင်းမယ်” လို့ ထရမ့်က သူ့ရုံးခန်းကနေ ပြောပါတယ်။ “ခင်ဗျားမှာ Green Card ရှိတယ်။ ဒါဟာ Gold Card ပါပဲ။ အခု ကျွန်တော်တို့ဟာ အဲဒီကတ်ကို ဒေါ်လာ ၅ သန်းလောက် ဈေးနှုန်းသတ်မှတ်လိုက်ပြီး ခင်ဗျားကို Green Card အခွင့်အရေးတွေ ပေးမယ်၊ ပြီးတော့ နိုင်ငံသားဖြစ်ခွင့်အတွက်လဲ လမ်းကြောင်းတစ်ခုဖြစ်လာမယ်။ အဲဒီတော့ ချမ်းသာတဲ့သူတွေဟာ ဒီကတ်ကို ဝယ်ခြင်းအားဖြင့် ကျွန်တော်တို့နိုင်ငံကို ဝင်လာကြမယ်။”
ထရမ့်က ရွှေကတ်များရောင်းချမှုကို လာမည့် ရက်သတ္တနှစ်ပတ်အတွင်း စတင်မည်ဖြစ်ပြီး ထိုကဲ့သို့သော ကတ်များစွာကို ရောင်းချနိုင်ကြောင်း အကြံပြုခဲ့သည်။
ရုရှားနိုင်ငံမှ ချမ်းသာကြွယ်ဝသူများထံ ရွှေကတ်များရောင်းချရန် စဉ်းစား/မစဉ်းစားမေးမြန်းသောအခါ ထရမ့်က “ဟုတ်ကဲ့၊ ဖြစ်နိုင်ပါတယ်။ ကျွန်တော် ရုရှားသူဌေးတချို့ကို သိပါတယ်၊ သူတို့ဟာ သိပ်ကောင်းတဲ့သူတွေပါ” ဟု ပြန်ဖြေခဲ့သည်။
ထရမ့်နှင့်အတူ ရပ်တည်နေသော ကူးသန်းရောင်းဝယ်ရေးဝန်ကြီး Howard Lutnick က ရွှေကတ်သည် အစိုးရ၏ EB-5 လူဝင်မှုကြီးကြပ်ရေးရင်းနှီးမြှုပ်နှံသူဗီဇာကို အစားထိုးမည်ဖြစ်ကြောင်း၊ ၎င်းသည် နိုင်ငံခြားရင်းနှီးမြှုပ်နှံသူများအား အမေရိကန်အလုပ်အကိုင်များဖန်တီးပေးသည့် အမေရိကန်စီမံကိန်းများတွင် ငွေကြေးထည့်ဝင်ပြီး အမေရိကန်ပြည်ထောင်စုသို့ ရွှေ့ပြောင်းနေထိုင်ရန် ဗီဇာလျှောက်ထားနိုင်စေမည်ဖြစ်သည်။
၁၉၉၂ ခုနှစ်တွင် ကွန်ဂရက်လွှတ်တော်မှ ဆုံးဖြတ်ချက်ချကာ ဖန်တီးခဲ့သော EB-5 ဗီဇာသည် အမေရိကန်လုပ်သားများအတွက် အလုပ်အကိုင်များဖန်တီးရန်အတွက် အနည်းဆုံး ဒေါ်လာ ၁,၀၅၀,၀၀၀ သို့မဟုတ် စီးပွားရေးအခက်အခဲရှိသော နေရာများတွင် ဒေါ်လာ ၈၀၀,၀၀၀ ရင်းနှီးမြှုပ်နှံသူ နိုင်ငံခြားသားများအား Green Card ပေးနိုင်စေရန် စီစဉ်ထားခြင်းဖြစ်သည်။