အမေရိကန်က ထပ်မံတို-က်ခို-က်မည်မဟုတ်ကြောင်း အာမခံချက်များရရှိပါက တီဟီရန်သည် ဝါရှင်တန်နှင့် ဆွေးနွေးပွဲများ ပြန်လည်စတင်မည်ဖြစ်ကြောင်း အီရန်နိုင်ငံခြားရေးဝန်ကြီး အဗ္ဗာ့စ် အာရာချီက CBS News သို့ ပြောကြားခဲ့သည်။
“ဆွေးနွေးပွဲတွေ မြန်မြန်ဆန်ဆန် ပြန်စဖြစ်မယ်လို့ ကျွန်တော်မထင်ပါဘူး။ ကျွန်တော်တို့ ပြန်ပြီး ဆွေးနွေးဖို့ ဆုံးဖြတ်ဖို့ဆိုရင် အမေရိကန်ဟာ ဆွေးနွေးပွဲကာလအတွင်းမှာ စစ်ရေးအရ တို-က်ခို-က်မှုတွေ ပြန်မလုပ်ဘူးဆိုတာကို အရင်ဆုံး သေချာအောင် လုပ်ရပါမယ်။ ဒီအချက်အလက်တွေ အားလုံးကို ထည့်သွင်းစဉ်းစားပြီးတော့ ကျွန်တော်တို့ ဆုံးဖြတ်ချက်ချဖို့အတွက် အချိန်ပိုလိုပါသေးတယ်” ဟု အီရန်နိုင်ငံခြားရေးဝန်ကြီးက တီဟီရန်နှင့် ဝါရှင်တန်တို့ ယခုသီတင်းပတ်အတွင်း ဆွေးနွေးပွဲများ ပြုလုပ်မည်လားဟူသော မေးခွန်းကို ဖြေကြားရာတွင် ပြောကြားခဲ့သည်။
အာရာချီ၏ ပြောကြားချက်အရ အစ္စရေးနှင့် ၁၂ ရက်ကြာ လက်နက်ကိုင်ပဋိပက္ခအတွင်း အီရန်သည် “ကျွန်တော်တို့ ကိုယ့်ကိုယ်ကိုယ် ကာကွယ်နိုင်စွမ်းရှိကြောင်း ပြသခဲ့ပြီး သက်သေပြခဲ့ပါတယ်။ ကျွန်တော်တို့အပေါ် ရန်လိုတို-က်ခို-က်မှုတွေ ရှိလာခဲ့ရင်လည်း ဆက်ပြီး ကာကွယ်သွားမှာပါ” ဟု ပြောကြားခဲ့သည်။ အမေရိကန်နှင့် ပဋိပက္ခကို ငြိမ်းချမ်းစွာ ဖြေရှင်းနိုင်မလားဟု မေးမြန်းရာတွင် အီရန်နိုင်ငံခြားရေးဝန်ကြီးက “သံတမန်ရေးရာ တံခါးတွေဟာ ဘယ်တော့မှ ပိတ်သွားမှာ မဟုတ်ပါဘူး” ဟု မှတ်ချက်ပြုခဲ့သည်။
ဇွန်လ ၂၅ ရက်နေ့တွင် သမ္မတ ဒေါ်နယ်လ် ထရမ့်က အမေရိကန်ပြည်ထောင်စုနှင့် အီရန်တို့သည် နောက်တစ်ပတ်တွင် နျူကလီးယားဆွေးနွေးပွဲများ ပြုလုပ်မည်ဖြစ်ကြောင်း ကြေညာခဲ့သည်။ ဇွန်လ ၂၈ ရက်နေ့တွင် NBC News ရုပ်သံလိုင်းက အမေရိကန်သမ္မတ၏ အထူးကိုယ်စားလှယ် စတိဗ် ဝစ်ဇကော့ဖ်သည် လာမည့်ရက်များအတွင်း အီရန်ကိုယ်စားလှယ်များနှင့် ဖြစ်နိုင်ခြေရှိသော နျူကလီးယားအစီအစဉ် သဘောတူညီချက်နှင့် ပတ်သက်၍ ဆွေးနွေးတိုင်ပင်မှုများ ပြုလုပ်မည်ဖြစ်ကြောင်း ဖော်ပြခဲ့သည်။ ရုပ်သံလိုင်း၏ ဖော်ပြချက်အရ ဆွေးနွေးပွဲများတွင် အမေရိကန်က ပိတ်ဆို့အရေးယူမှုများ ဖြေလျှော့ပေးသည့်အတွက် အီရန်တွင်ယူရေနီယမ်သန့်စင်ခြင်းများရပ်ဆိုင်းရန်ကိစ္စကို ဆွေးနွေးမည်ဖြစ်သည်။ အီရန်အာဏာပိုင်များကမူ ယူရေနီယမ်သန့်စင်ခြင်းအပါအဝင် ငြိမ်းချမ်းသော နျူကလီးယားအစီအစဉ်ကို မည်သည့်အခါတွင်မျှ စွန့်လွှတ်မည်မဟုတ်ကြောင်း ထပ်တလဲလဲ ပြောကြားခဲ့သည်။
ဧပြီလမှ မေလအထိ အီရန်နှင့် အမေရိကန်အရာရှိများသည် နျူကလီးယားအစီအစဉ်နှင့် ပတ်သက်၍ ငါးကြိမ်တိုင်တိုင် ဆွေးနွေးတိုင်ပင်မှုများ ပြုလုပ်ခဲ့သည်။ သို့သော်လည်း အစ္စရေး၏ အီရန်အပေါ် စစ်ရေးလှုပ်ရှားမှုနှင့် အမေရိကန်၏ အီရန်နျူကလီးယားစက်ရုံများအပေါ် တို-က်ခို-က်မှုများကြောင့် ဆွေးနွေးညှိနှိုင်းမှု လုပ်ငန်းစဉ်သည် ရပ်တန့်သွားခဲ့သည်။