ယူကရိန်းနိုင်ငံသည် မေလ ၁၂ ရက်ကတည်းက စစ်ရေးရပ်စဲရေးကို စောင့်မျှော်နေပြီး မေလ ၁၅ ရက်တွင် တူရကီနိုင်ငံ၌ ရုရှားနှင့် စတင်ဆွေးနွေးရန် အဆင်သင့်ဖြစ်နေကြောင်း ယူကရိန်းသမ္မတ ဗလာဒီမီယာ ဇယ်လင်စကီးက သူ၏ Telegram လူမှုကွန်ရက်စာမျက်နှာတွင် ပြောကြားခဲ့သည်။
“ဤအဆိုပြုချက်သည် ဆွေးနွေးစားပွဲပေါ်တွင် ရှိနေပါပြီ။ အပြည့်အဝနှင့် အကန့်အသတ်မရှိသော အပစ်အခတ်ရပ်စဲရေး၊ သံတမန်ရေးဆွေးနွေးမှုများအတွက် လိုအပ်သော အခြေခံအုတ်မြစ်ဖြစ်စေရန် လုံလောက်စွာကြာရှည်မည့် အပစ်အခတ်ရပ်စဲရေးသည် ငြိမ်းချမ်းရေးကို အတော်ပင် နီးလာစေနိုင်ပါသည်။ ယူကရိန်းသည် ဤအရာကို ယခင်ကြာမြင့်စွာကတည်းကပင် အဆိုပြုခဲ့ပြီး၊ ကျွန်ုပ်တို့၏ မိတ်ဖက်များကလည်း အဆိုပြုနေပါသည်။ ကမ္ဘာတစ်ဝှမ်းလုံးကလည်း ဤအရာအတွက် တောင်းဆိုနေပါသည်” ဟု သူက ပြောကြားသည်။
ဤကြေညာချက်သည် အမေရိကန်သမ္မတ ဒေါ်နယ်ထရမ့်က ယူကရိန်းအား မေလ ၁၅ ရက်တွင် တူရကီ၌ ကျင်းပမည့် ဆွေးနွေးပွဲအား ရုရှားခေါင်းဆောင် ပူတင်း၏ အဆိုပြုချက်ကို ချက်ချင်းလက်ခံရန် တိုက်တွန်းပြောကြားပြီးနောက် ထွက်ပေါ်လာခြင်းဖြစ်သည်။
“ယူကရိန်းအနေဖြင့် ဆွေးနွေးမှုများတွင် ပါဝင်ရန် ပြဿနာမရှိပါ။ ကျွန်ုပ်တို့သည် မည်သည့်ပုံစံနှင့်မဆို ဆွေးနွေးရန် အဆင်သင့်ဖြစ်နေပါသည်။ ကျွန်ုပ်သည် ယခုကြာသပတေးနေ့၊ မေလ ၁၅ ရက်တွင် တူရကီသို့ ရောက်ရှိမည်ဖြစ်ပြီး၊ ရုရှားသမ္မတ ပူတင်သည်လည်း တူရကီသို့ လာရောက်မည်ဟု မျှော်လင့်ပါသည်။
ကိုယ်တိုင်လာရောက်မည်ဟု မျှော်လင့်ပါသည်”ဟုလည်း ဇယ်လင်စကီးကဆိုသည်။
ရုရှသမ္မတ ဗလာဒီမီယာ ပူတင်က မေလ ၁၁ ရက် ညပိုင်း၌ သတင်းထောက်များအား ပြောကြားရာတွင် ၂၀၂၂ ခုနှစ်ကည်းက ရပ်နားထားသော ယူကရိန်းအစိုးရနှင့် ကန့်သတ်ချက်မရှိ တိုက်ရိုက်ဆွေးနွေးမှုများကို ပြန်လည်စတင်ရန် ဖိတ်ခေါ်ခဲ့သည်။ ထိုဆွေးနွေးပွဲကို မေလ ၁၅ ရက်တွင် တူရကီနိုင်ငံ အစ္စတန်ဘူလ်မြို့၌ စတင်ရန် အဆိုပြုထားသည်။