အစားအစာသိပ္ပံနှင့် နည်းပညာများမှတဆင့် တန်ဖိုးမြှင့်ထွက်ကုန်များထုတ်လုပ်နိုင်ရေးအတွက် ပါဝင်ဆောင်ရွက်ကြရန် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးဦးမင်းနောင်မှ အောက်တိုဘာ ၂၆ ရက်နံနက်ပိုင်းကကျင်းပသည့် ရေဆင်းစိုက်ပျိုးရေးတက္ကသိုလ်၏ (၃၃)ကြိမ်မြောက်ဘွဲ့နှင်းသဘင်အခမ်းအနားတွင် တိုက်တွန်းပြောကြားခဲ့သည်။
စိုက်ပျိုးရေးကဏ္ဍသည် မြန်မာနိုင်ငံ၏ စီးပွားရေးမောင်းနှင်အားဖြစ်ပြီး စိုက်ပျိုးရေးကဏ္ဍဖွံ့ဖြိုးတိုးတက်မှုသည် အားလုံးပါဝင်သောစဉ်ဆက်မပြတ် ဖွံ့ဖြိုးတိုးတက်မှုဖြစ်ကာ နိုင်ငံတော်ကဦးစားပေးဆောင်ရွက်လျက်ရှိသည့် စိုက်ပျိုးသီးနှံများ၏ ထုတ်လုပ်နိုင်စွမ်းအားများမြှင့်တင်နိုင်ရေးအတွက် မျိုး၊ မြေ၊ ရေ၊ နည်းပညာများကိုမှန်ကန်ရန်၊ မြေဆီလွှာနှင့် ရေအသုံးပြုမှုများ စနစ်တကျရှိရန်၊ ရိတ်သိမ်းချိန်လွန်နည်းပညာများ ဖွံ့ဖြိုးတိုးတက်ရန်၊ အစားအစာသိပ္ပံနှင့် နည်းပညာများမှတစ်ဆင့် တန်ဖိုးမြှင့်ထွက်ကုန်များထုတ်လုပ်နိုင်ရန်တို့အတွက် ကျရာအခန်းကဏ္ဍမှပါဝင်ဆောင်ရွက်ရမည်ဟု တိုက်တွန်းပြောကြားသည်။
ထို့ပြင် AI နည်းပညာအပါအဝင် ခေတ်နှင့်လျော်ညီသောနည်းပညာရပ်များကို စဉ်ဆက်မပြတ်လေ့လာပြီး သီးနှံအထွက်နှုန်းများ၊ မိုးလေဝသကြိုတင်ခန့်မှန်းချက်များ၊ တိကျသေချာသော စိုက်နည်းစနစ်များ၊ ပိုးမွှားရောဂါကာကွယ်နှိမ်နင်းနည်းများ၊ ဓာတ်မြေဩဇာအသုံးပြုမှုများဖြစ်သည့် လယ်ယာကဏ္ဍဖွံ့ဖြိုးတိုးတက်ရေးဆောင်ရွက်မှုများတွင် အကျိုးရှိစွာအသုံးပြုနိုင်ရေးကြိုးပမ်းကြရန် တိုက်တွန်းပြောကြားသည်။
စိုက်ပျိုးရေးပညာရှင်များအနေဖြင့် မှန်ကန်သမာသမတ်ကျသော အတွေးအခေါ်အယူအဆများ၊ နိုင်ငံချစ်စိတ်၊ လူမျိုးချစ်စိတ်၊ စိုက်ပျိုးရေးကဏ္ဍဖွံ့ဖြိုးတိုးတက်စေလိုသောစေတနာများဖြင့် မြန်မာနိုင်ငံ၏ လယ်ယာကဏ္ဍဖွံ့ဖြိုးတိုးတက်ရေးအတွက်ပါဝင်ဆောင်ရွက်ကြရန်လည်း တိုက်တွန်းပြောကြားပြီးနောက် စိုက်ပျိုးရေးတက္ကသိုလ်ပထမနှစ်မှ နောက်ဆုံးနှစ်အထိ တန်းစဉ်ပေါင်းအမှတ်အများဆုံး ပထမ၊ ဒုတိယ၊ တတိယဆုရသူများကို ဂုဏ်ပြုဆုများချီးမြှင့်ပေးအပ်ခဲ့သည်။
ထို့နောက် ရေဆင်းစိုက်ပျိုးရေးတက္ကသိုလ်ပါမောက္ခချုပ်မှ စိုက်ပျိုးရေးသိပ္ပံဘွဲ့ရ (၂၉၅) ဦး၊ စိုက်ပျိုးရေးမဟာသိပ္ပံဘွဲ့ရ (၄၄) ဦး၊ စိုက်ပျိုးရေးပါရဂူဘွဲ့ရ (၉) ဦး၊ စိုက်ပျိုးရေးဘွဲ့လွန်ဒီပလိုမာဘွဲ့ရ (၇) ဦးတို့အား ဘွဲ့လက်မှတ်များ ပေးအပ်ချီးမြှင့်ခဲ့သည်။