ယခုဆောင်းရာသီတွင် အင်းလေးကန် ရမ်ဆာရပ်ဝန်းဒေသသို့ ဆောင်းခိုငှက်မျိုးစိတ် (၃၄) မျိုး ဝင်ရောက်ကျက်စားလျက်ရှိရာ ကမ္ဘာ့ရှားပါး ဆောင်းခိုငှက်မျိုးစိတ် (၅) မျိုး ပါဝင်နေကြောင်း သိရသည်။
အင်းလေးကန်သို့ စင်ရော်ငှက်မျိုးစိတ် (၂)မျိုး၊ ရေကြက်ဒုံ၊ ဘဲပို့ချပ်၊ ဘဲစကပ် စသည့် ကမ္ဘာ့ရှားပါး ဆောင်းခိုငှက်မျိုး စိတ် (၅)မျိုး ဝင်ရောက်ကျက်စားလျက်ရှိပြီး စားကျက်နေရာ (၈)နေရာတွင် ထိန်းသိမ်းကြပ်မတ်ဆောင်ရွက်လျက်ရှိကြောင်း သိရသည်။
ဆိုက်ဘေးရီးယားဒေသမှ ဆောင်းခိုငှက်များသည် အင်းလေးကန်၊ တရုတ်နှင့် ရုရှားမှ ဆောင်းခိုငှက်များသည် အင်းတော်ကြီးကန်သို့ နှစ်စဉ် အောက်တိုဘာလမှစ၍ ဝင်ရောက်လေ့ရှိပြီး ဧပြီလတွင် ပြန်လည်ထွက်ခွာလေ့ရှိကြောင်း သိရသည်။
“အင်းလေးကန်မှာ ကမ္ဘာ့ရှားပါး ဆောင်းခိုငှက်မျိုးစိတ် (၅) မျိုး ဝင်ရောက်နေပါပြီ။ ကမ္ဘာမှာ မျိုးသုဉ်းဖို့ အန္တရာယ်ရှိနေတဲ့ ဘဲပို့ချပ်မျိုးစိတ် အနည်းငယ်လည်း တွေ့နေရပါတယ်။ မနှစ်က သုံးကောင်ပဲတွေ့ရပြီးတော့ ဒီနှစ်ဆောင်းဦး အစမှာ နှစ်ကောင်တွေ့ရပါတယ်”ဟု အင်းလေးကန် တောရိုင်းတိရစ္ဆာဘေးမဲ့တော အုပ်ချုပ်ရေးမှူး ဦးတင်မြစိုးက ပြောသည်။
ကမ္ဘာမှာ မျိုးသုဉ်းမည့် အန္တရာယ်နှင့် ရင်ဆိုင်နေရသည့် ငှက်မျိုးစိတ်များ ဝင်ရောက်ကျက်စားခြင်းက နိုင်ငံအတွက် ဂုဏ်ယူစရာဖြစ်ပြီး နိုင်ငံခြားသား ငှက်ကြည့်ဝါသနာရှင်များ အထူးစိတ်ဝင်စားတဲ့ ငှက်မျိုးစိတ်များဖြစ်ကြောင်း သိရသ ည်။
“ကြိုးကြာခေါင်းနီဆိုရင် လွန်ခဲ့တဲ့ (၁၀) နှစ်ကျော်က (၁၅) ကောင်နီးပါး ဝင်ရောက်ခဲ့တယ်။ မနှစ်ကဆိုရင် နှစ်ကောင်ပဲ တွေ့ရတယ်။ ဘဲပို့ချပ်ဆိုရင်လည်း လွန်ခဲ့တဲ့ နှစ်အနည်းငယ်က (၁၀) ကောင်ကနေ အခုဆိုရင် အနည်းငယ်ပဲ တွေ့ရတော့တယ်။ အင်းလေးကန်က ဒီနှစ်ရေပြည့်နေတော့ ဆောင်းခိုငှက်ဝင်တာ နည်းနေပါသေးတယ်။ နောက်ပိုင်းပိုပြီး များလာမှာပါ”ဟု အုပ်ချုပ်ရေးမှူး ဦးတင်မြစိုးက ဆက်ပြောသည်။
ကမ္ဘာပေါ်ရှိငှက်များအား ဌာနေငှက်မျိုးစိတ်များ၊ ဒေသတွင်းရာသီအလိုက် ရွှေ့ပြောင်းငှက်များ၊ ရာသီအလိုက် ရွှေ့ပြောင်းငှက်များနှင့် ဆောင်းခိုငှက်များဟု အုပ်စုလေးမျိုးခွဲခြားထားပြီး ငှက်မျိုးစိတ်စုစုပေါင်း ၁၈၀၀၀ ခန့်တွင် မြန်မာနိုင်ငံ၌ ငှက်မျိုးစိတ် ၁၁၃၆ မျိုး ရှင်သန်လျက်ရှိကြောင်း ဇီဝမျိုးစုံမျိုးကွဲနှင့် သဘာဝထိန်းသိမ်းရေးအသင်း (BANCA) မှ သိရသည်။
အင်းလေးကန် ဘေးမဲ့တော ဧရိယာတွင် အရေးကြီးငှက်မျိုးစိတ် (၁၄) မျိုး သတ်မှတ်ထားပြီး နိုဝင်ဘာလကုန်ပိုင်းနှင့် ဒီဇင်ဘာလဆန်းပိုင်း၌ သစ်တောငှက်မျိုးစိတ် (၉၅) မျိုး (၆၇၇၃ ကောင်)၊ ရေပျော်ငှက်မျိုးစိတ် (၄၂) မျိုး (၉၉၃၈ ကောင်) နှင့် ဆောင်းခိုငှက်မျိုးစိတ် (၃၄) မျိုး (၄၂၃၆ ကောင်) တို့ ကျက်စားလျက်ရှိကာ ဆောင်းခိုငှက်မျိုးစိတ် (၅)မျိုး ဝင်ရောက်ကျက်စားလျက်ရှိကြောင်း သိရသည်။
မြန်မာနိုင်ငံတွင် အင်းတော်ကြီးကန်၊ အင်းလေးကန်၊ မိုးယွန်းကြီးအင်း၊ မိန်းမလှကျွန်း၊ ပလိပ်အင်း၊ တောင်သမန်အင်း၊ ပြူကန် အင်းနှင့် ဗနောအင်းများသို့ နှစ်စဉ်ဆောင်းခိုငှက်များ ဝင်ရောက်ကျက်စားလျက်ရှိ၍ ပြည်တွင်း၊ ပြည်ပခရီးသွားလုပ်ငန်းအတွက် ဆွဲဆောင်မှုတစ်ခုအဖြစ် ရပ်တည်လျက်ရှိနေသည်။
