တနင်္သာရီတိုင်းဒေသကြီးအစိုးရအဖွဲ့နှင့်အဂတိလိုက်စားမှုတိုက်ဖျက်ရေးကော်မရှင်တို့ ပူးပေါင်း၍ ဖေဖော်ဝါရီ ၆ ရက်နံနက်ပိုင်းက အဂတိလိုက်စားမှုတားဆီးကာကွယ်ရေးဆိုင်ရာအသိပညာပေးရှင်းလင်းဆွေးနွေးပွဲအား ထားဝယ်မြို့၌ပြုလုပ်ခဲ့သည်။
“အဂတိလိုက်စားမှုတွေ လျော့နည်းကျဆင်းသွားရင် ပြည်သူ့ဘဏ္ဍာတွေကို နိုင်ငံတော်နဲ့ပြည်သူတွေရဲ့ အကျိုးစီးပွားဖြစ်ထွန်းစေမယ့် နေရာတွေမှာ မှန်မှန်ကန်ကန်သုံးစွဲနိုင်မှာပါ”ဟု တနင်္သာရီတိုင်းဝန်ကြီးချုပ်ဦးမြတ်ကိုကပြောသည်။
ထို့ပြင် နိုင်ငံ့ဝန်ထမ်းများအနေဖြင့် အများပြည်သူဆိုင်ရာဝန်ဆောင်မှုလုပ်ငန်းများဆောင်ရွက်ရာတွင် ဖြောင့်မတ်တည်ကြည်မှုနှင့်ပွင့်လင်းမြင်သာမှုရှိရန်လိုပြီး အဂတိလိုက်စားမှုသည် နယ်ပယ်အသီးသီးမှ ဖွံ့ဖြိုးတိုးတက်မှုများကို အကောင်အထည် ဖော်ရာ၌ အဟန့်အတားတစ်ခုဖြစ်၍ သန့်ရှင်းသောအစိုးရ၊ကောင်းမွန်သော အုပ်ချုပ်ရေး စနစ်တစ်ခုကို အဂတိကင်းရှင်းသည့် နိုင်ငံ့ဝန်ထမ်းများဖြင့်သာ အကောင်အထည်ဖော် တည်ဆောက်နိုင်မည်ဟုလည်းပြောကြားခဲ့သည်။
ထို့အတူ အဂတိလိုက်စားမှုတိုက်ဖျက်ရေးကော်မရှင် အဖွဲ့ဝင်ဦးကျော်ဝင်းသိန်းမှလည်း မြန်မာနိုင်ငံ၏ အဂတိလိုက်စားမှုတိုက်ဖျက်ရေးဥပဒေပါ ပြဋ္ဌာန်းချက်များအရ အဂတိလိုက်စားမှုမှာ လာဘ်ပေးလာဘ်ယူခြင်းအပြင် တည်ဆဲဥပဒေ၊စည်းမျဉ်း၊စည်းကမ်း၊လုပ်ထုံးလုပ်နည်းတစ်ရပ်ရပ်ကို ဖောက်ဖျက်လျက် နိုင်ငံတော်၏ ငွေကြေး၊ ပစ္စည်းနှင့်ပိုင်ဆိုင်မှုကို ထိခိုက်နစ်နာပျက်စီးဆုံးရှုံးစေခြင်းသည်လည်း အဂတိလိုက်စားမှုပင်ဖြစ်၍ နိုင်ငံတော်၏ အကျိုးစီးပွားများ၊တန်ဖိုးထားမှုများနှင့်ဖွံ့ဖြိုးတိုးတက်မှုတို့ကို ထိခိုက်စေနိုင်သည့် အဂတိလိုက်စားမှုပုံသဏ္ဌာန်များကို ထိရောက်စွာတိုက်ဖျက်သွားရန်လိုသည်ဟု ပြောကြားခဲ့သည်။
ဆွေးနွေးပွဲသို့ တနင်္သာရီတိုင်းတရားလွှတ်တော်တရားသူကြီးချုပ်၊တိုင်းဝန်ကြီးများ၊ဥပဒေချုပ်၊ တိုင်းအဆင့်ဌာနဆိုင်ရာများ၊ခရိုင်/မြို့နယ်စီမံအုပ်ချုပ်ရေးအဖွဲ့ဥက္ကဋ္ဌများ၊တာဝန်ရှိသူများနှင့် တနင်္သာရီတိုင်းအဂတိလိုက်စားမှုတားဆီးကာကွယ်ရေးအဖွဲ့ဝင်များ တက်ရောက်ခဲ့ကြသည်။
