ဧရာဝတီတိုင်း၊ပုသိမ်မြို့ရှိ ပုသိမ်အကျဉ်းထောင်တွင် ဇန်နဝါရီ ၆ ရက်နံနက်ပိုင်းက အကျဥ်းသား၊အချုပ်သားများဆူပူအကြမ်းဖက်မှုဖြစ်ပွားခဲ့ကြောင်း နစက ကထုတ်ပြန်ခဲ့သည်။
ယနေ့နံနက်ပိုင်းက ပုသိမ်အကျဥ်းထောင်ရှိ အိပ်ဆောင်တစ်ခုမှ အကျဉ်းသား၊အချုပ်သား ၇၀ ဦးခန့်သည် အိပ်ဆောင်ဝန်းတံခါးများအား ချိုးဖျက် ဖျက်ဆီးခြင်း၊အကျဉ်းဦးစီးဌာနဝန်ထမ်းများကို အော်ဟစ်ဆဲဆိုခြင်း၊မချေမငံပြောဆိုခြင်း၊ရန်မူရန်ကြိုးပမ်းမှုများပြုလုပ်ခဲ့ကြသည်။
ထို့ကြောင့် အကျဉ်းဦးစီးဌာနဝန်ထမ်းများမှ မိမိအခန်းများသို့အသာတကြည် ပြန်လည်ဝင်ရောက်ရန်ဖျောင်းဖျပြောဆိုခဲ့ရာ လိုက်နာမှုမရှိဘဲဆက် လက်အော်ဟစ်ဆူပူမှုများ ပြုလုပ်ခဲ့ကြကြောင်း သိရသည်။
ထိုသို့ ဖြစ်ပွားနေစဥ် အခြားအိပ်ဆောင်တစ်ခုမှ အကျဉ်းသား၊အချုပ်သားအချို့မှလည်း ၎င်းတို့ ၏အိပ်ဆောင်များရှိ ဝန်းတံခါးများကို ဖျက်ဆီးခြင်း၊ CCTV များအားဖျက်ဆီးခြင်း၊အကျဉ်း ထောင်အတွင်းရှိ စည်းကမ်းထိန်းရုံးသို့ သွားရောက် ရန်မူရန်ကြိုးစားပြီး ပထမဆူပူမှုဖြစ်ပွားနေသည့်အဆောင်ရှိ အကျဉ်းသား၊အချုပ်သားများနှင့်ပူးပေါင်းကာ ဖျက်ဆီးမှုများကိုအရှိန်မြှင့် ဆောင်ရွက်ခဲ့ကြသည်ဟု နစက ကထုတ်ပြန်ချက်တွင်ဖော်ပြထားသည်။
ဖြစ်စဥ်အား ထိန်းသိမ်းရန် နံနက် ၉ နာရီ ၄၅ မိနစ်ခန့်တွင် ဧရာဝတီတိုင်း၊အကျဉ်းဦးစီးဌာန၊ညွှန်ကြားရေးမှူး၊တာဝန်ရှိဝန်ထမ်းများနှင့်ခရိုင်ရဲတပ် ဖွဲ့မှူးတို့ပါဝင်သည့် လုံခြုံရေးအဖွဲ့ဝင်များက အကျဉ်းထောင်အတွင်းဝင်ရောက်၍ အကျဉ်းသား၊ အချုပ်သားများအား လူစုခွဲရန် ထပ်မံပြောကြားဖျောင်းဖျခဲ့သည်။
ထိုသို့ ဖျောင်းဖျမှုအားလိုက်နာခြင်းမရှိဘဲ သစ်သားချောင်းများ၊အုတ်နီခဲများ၊အင်္ဂတေခဲကျိုး များဖြင့် လုံခြုံရေးအဖွဲ့ဝင်များအား တိုက်ခိုက်ခဲ့သဖြင့် အဓိကရုဏ်းနှိမ်နင်းရေးလက်နက်များဖြင့် ခြောက်လှန်ပစ်ခတ်ပြီး ဒုတ်/ဒိုင်းများ အသုံးပြုနှိမ်နင်းခဲ့ရသည်ဟု နစက ကထုတ်ပြန်ခဲ့သည်။
ဖြစ်စဥ်အတွင်း၌ အချို့အကျဉ်းသား၊အချုပ်သားများသည် အချင်းချင်းထိုးကြိတ်ရိုက်နှက်မှုများဖြစ်ပေါ်ခဲ့ပြီး အချုပ်သား ၁ ဦးသေဆုံးခဲ့ပြီး အကျဥ်းသား၊အချုပ်သား ၆၃ ဦးထိခိုက်ဒဏ်ရာရရှိခဲ့ပြီး ဖြစ်စဥ်အား လုံခြုံရေးအဖွဲ့များ၏ ထိန်းသိမ်းမှုကြောင့် နံနက် ၁၁ နာရီခွဲခန့်တွင် အခြေအနေအား ထိန်းသိမ်းနိုင်ခဲ့ကြောင်း သိရသည်။
ဖြစ်စဥ်၌ ရဲတပ်ဖွဲ့ဝင် ၂ ဦး၊အကျဉ်းဦးစီးဌာနမှ ဝန်ထမ်း ၉ ဦး(စုစုပေါင်း ၁၁ ဦး)တို့တွင်လည်း ထိခိုက်ဒဏ်ရာများရရှိခဲ့သည်ဟု နစက ကထုတ်ပြန်ခဲ့သည်။
ဖြစ်စဥ်ဖြစ်ပွားရခြင်းမှာ ဇန်နဝါရီ ၅ ရက်ညပိုင်းက အကျဉ်းသားတစ်ဦးထံမှ ကီးပတ်ဖုန်း ၁ လုံးအား ရှာဖွေသိမ်းဆည်းရမိ၍ လိုအပ်သည့်အရေး ယူမှုပြုလုပ်စဉ် ကျေနပ်မှုမရှိခြင်း၊အချင်းချင်းမြှောက်ပင့်ကာ ရုန်းရင်းဆန်ခတ်ဖြစ်ရန် ကြိုးပမ်းခဲ့ခြင်းဖြစ်ကြောင်းဖော်ထုတ်သိရှိခဲ့ရသဖြင့် လုပ် ထုံးလုပ်နည်းနှင့်အညီ ဆောင်ရွက်သွားမည်ဟု နစက ကထုတ်ပြန်ခဲ့သည်။
“ဖြစ်စဥ်ရဲ့ အသေးစိတ်ကိုတော့ ကျွန်တော်တို့မသိဘူး ထောင်ဆူသွားတယ်၊ ဒဏ်ရာရတဲ့လူတွေလည်းများတယ်ဆိုတာကတော့သိထားတယ်၊ ကျွန်တော်တို့ကတော့ သတင်းကြားထဲက ကားတွေကိုအဆင်သင့်လုပ်ထားတယ် သွားတာတော့မသွားလိုက်ရပါဘူး”ဟု ပုသိမ်မြို့အခြေစိုက်လူမှုကူညီရေးအသင်းဝင်တစ်ဦးကပြောသည်။
