မကြာသေးမီ လပိုင်းအတွင်းက ထွက်ခဲ့သည့် ” လူသားအသည်းနှလုံးနှင့် ကျွန်တော်” သီချင်းနှင့် ပရိသတ်များ၏ အားပေးမှုကို သိမ်းပိုက်လိုက်ပြန်သည့် အဆိုတော် ၊ သရုပ်ဆောင်၊ ရုပ်ရှင်ထုတ်လုပ်သူ စိုင်းစိုင်းခမ်းလှိုင်သည် ယနေ့ည ကျင်းပမည့် အကယ်ဒမီ ဆုပေးပွဲတွင်လည်း အကယ်ဒီဆု ချီးမြှင့်ခြင်း ခံရနိုင်ကြောင်း ထင်ကြေးပေးခံနေရသည်။
ယနေ့ ဖေဖေါ်ဝါရီ (၉) ရက် ညပိုင်းတွင် နေပြည်တော် ၊ MICC (1) ၌ ၂၀၂၄ ခုနှစ် အတွက် ရုပ်ရှင်ထူးချွန်ဆု အကယ်ဒမီချီးမြှင့်ပွဲ ကျင်းပသွားမည်ဖြစ်ပြီး စိုင်းစိုင်းခမ်းလှိုင် ပါဝင်သရုပ်ဆောင်ထားသည့် “ချစ်သူသာ ပန်းတစ်ပွင့် ဖြစ်ခဲ့ရင်” ဇာတ်ကားမှာ အကယ်ဒမီ ဆန်ကာတင်စာရင်းတွင် ပါဝင်နေခြင်း ဖြစ်သည်။
“ချစ်သူသာပန်းတစ်ပွင့်ဖြစ်ခဲ့ရင်” ဇာတ်ကားကို ဒါရိုက်တာ ကောင်းဇံက ဖန်တီပုံဖော်ထားပြီး စိုင်းစိုင်းခမ်းလှိုင်၊ ဝတ်မှုန်ရွှေရည် ၊ မင်းသူ ၊ ခင်ဇာခြည်ကျော် ၊ မင်းဦး ၊ ခင်မို့မို့အေး ၊ထူးခြား ၊ ဆင်မ ၊ ဇော်မှိုင်း ၊ ဂရိတ်ချမ်း ၊ ကျော်ထက် ၊ ဇူဇူးဈာန် စသည့် ဝါရင့်သရုပ်ဆောင်များ ပါဝင်အားဖြည့်ထားသည့် ဇာတ်ကားဖြစ်သည်။
စိုင်းစိုင်းခမ်းလှိုင်သည် ပြီးခဲ့သည့် ၂၀၂၀ ခုနှစ်က ရုံတင်ပြသခဲ့သည့် “ပိတောက်ကတဲ့ ဂီတ” ရုပ်ရှင်ဇာတ်ကားဖြင့် အမျိုးသားဇာတ်ဆောင်ဆုကို ရရှိထားခြင်းဖြစ်သည်။
အကယ်၍ ယခုနှစ်တွင်ပါ ထပ်မံရရှိမည်ဆိုပါက နှစ်ထပ်ကွမ်း အကောင်းဆုံ ဇာတ်ဆောင် အကယ်ဒမီဆုရှင်အဖြစ် မှတ်တိုင်စိုက်ထူနိုင်မည့်အပြင် သူ၏ ထုတ်လုပ်ရေးက ရရှိထားသည့် အကောင်းဆုံး ရုပ်ရှင်ဇာတ်ကားဆုနှင့်ပါဆိုလျင် အကယ်ဒမီ (၃) ဆုကို ပိုင်ဆိုင်သူတစ်ဦး ဖြစ်လာမည်လည်း ဖြစ်သည်။
၂၀၂၀ ပြည့်နှစ်က ရုံတင်ပြသခဲ့သည့် “ပိတောက်ကတဲ့ ဂီတ”ဇာတ်ကားမှာ အဆိုပါနှစ်အတွက် အကောင်းဆုံးထူးချွန်ဆုများအနေဖြင့် အကောင်းဆုံး အမျိုးသားဇာတ်ဆောင်ဆု ၊
အကောင်းဆုံး ရုပ်ရှင်ဇာတ်ကားဆု၊ အကောင်းဆုံး နောက်ခံတေးဂီတဆုနှင့် အကောင်းဆုံး ဒါရိုက်တာဆုစသဖြင့် စုစုပေါင်း အကယ်ဒမီ (၄)ဆုရရှိခဲ့သည့် ရုပ်ရှင်ဇာတ်ကား တစ်ကားလည်း ဖြစ်သည်။