ပဲခူးတိုင်း၊ကျောက်တံခါးမြို့နယ်၊သာယာကုန်းကျေးရွာရှိ ၂၃၀/၃၃/၁၁ ကေဗွီ ၁၆၀ အမ်ဗွီအေ သာယာကုန်းပင်မဓာတ်အားခွဲရုံအား ဧပြီ (၄) ရက်ည (၉) နာရီကျော်ခန့်က Drone ဖြင့် ဗုံးခွဲတိုက်ခိုက်ခံခဲ့ရသည့်အတွက် ပျက်စီးမှုများကို ပြန်လည်ပြင်ဆင်ခဲ့ပြီး ဖြစ်သည့်အတွက် ပုံမှန် လျှပ်စစ်ဓာတ်အား ပေးနိုင်ပြီ ဖြစ်ကြောင်း လျှပ်စစ်စွမ်းအားဝန်ကြီးဌာနမှ ထုတ်ပြန်ခဲ့သည်။
အဆိုပါ ဗုံးခွဲတိုက်ခိုက်မှုကြောင့် လျှပ်စစ်ဝန်ထမ်း (၁) ဦးသေဆုံးကာ (၂) ဦးထိခိုက်ဒဏ်ရာများရရှိခဲ့ပြီး ဓာတ်အားခွဲရုံအတွင်းရှိ ရဲနွယ်၊ ရွှေကျင်၊ ကွန်းကျောင်းရေအားလျှပ်စစ်ဓာတ်အားပေး စက်ရုံများမှ ထွက်ရှိသည့် ဓာတ်အား (၅၅) မဂ္ဂါဝပ်ကို ဓာတ်အားလိုင်းများနှင့် ချိတ်ဆက်ဖြန့်ဖြူးပေးနေသည့် ထရန်စဖော်မာများနှင့် ဓာတ်အားခွဲရုံသုံးပစ္စည်းများပျက်စီးခဲ့ကာ နိုင်ငံတော်ဓာတ်အားစနစ်တစ်ခုလုံး ဓာတ်အားပြတ်တောက်ခဲ့ကြောင်း သိရသည်။
ယင်း ပျက်စီးသွားမှုများကို ညတွင်းချင်းအမြန်ဆုံး ပြန်လည်ပြင်ဆင်ခဲ့သဖြင့် ဧပြီလ (၅) ရက် ည (၁)နာရီ ဝန်းကျင်တွင် ဓာတ်အားစနစ်သို့ ဓာတ်အားပုံမှန်ပြန်လည်ပို့လွှတ်နိုင်ခဲ့ကြောင်း လျှပ်စစ်စွမ်းအားဝန်ကြီးဌာနမှ ထုတ်ပြန်ခဲ့သည်။
ယနေ့အချိန်ထိ လျှပ်စစ်ဓာတ်အားပေးစက်ရုံများ၊ လျှပ်စစ်ဓာတ်အားလိုင်းများနှင့် ဓာတ်အားခွဲရုံများဖောက်ခွဲဖျက်ဆီးခံရမှု (၂၂၉) ကြိမ်ရှိပြီဖြစ်ပြီး လျှပ်စစ်စွမ်းအားဝန်ကြီးဌာနမှ လုံခြုံရေးအဖွဲ့များနှင့်ပူးပေါင်းကာ ပြင်ဆင်လျက်ခဲ့ရကြောင်း သိရသည်။
လျှပ်စစ်စွမ်းအား ဝန်ကြီးဌာနအနေဖြင့် နိုင်ငံတော်အတွက် လိုအပ်လျက်ရှိသည့် လျှပ်စစ်ဓာတ်အားကို နည်းမျိုးစုံဖြင့် တိုးမြှင့်ထုတ်လုပ်နိုင်ရေး ဆောင်ရွက်လျက်ရှိသော်လည်း လက်ရှိတွင် လုံလောက်အောင်ဖြည့်ဆည်းပေးနိုင်ခြင်းမရှိသေး၍ ထုတ်လုပ်ပေးနိုင်မှုကို အခြေခံကာ မျှတစွာခွဲဝေခံစားရရှိနိုင်ရန် ဆောင်ရွက်ဖြန့်ဖြူးပေးလျက်ရှိကြောင်း သိရသည်။
