သက်ငယ်မုဒိမ်းမှု၊ အပြင်းအထန်နာကျင်စေမှုတို့ဖြင့် တရားစွဲခံထားရသည့် သရုပ်ဆောင် မင်းရာဇာ၊ ဇနီးဖြစ်သူ ဖူးငုံပွင့်နှင့် မန်နေဂျာဖြစ်သူ အောင်လွင်စိုး (ခ) ရခိုင်လေးတို့ကို အလုပ်ကြမ်းနှင့် ထောင်ဒဏ် (၅) စီချမှတ်ခဲ့ကြောင်း သိရသည်။
၎င်းတို့ (၃) ဦးအား ၂၀၂၃ ခုနှစ်၊ မတ်လ (၁၃) ရက်နေ့က မြောက်ဥက္ကလာပတရားရုံးကနေအလုပ်ကြမ်း နှင့် ထောင်ဒဏ် (၅) နှစ်စီ ချလိုက်ခြင်းဖြစ်ကြောင်း နစ်နာသူဖက်မှ လိုက်ပါဆောင်ရွက်နေသည့် ဒေါ်နော်အုန်းလှထံမှ သိရသည်။
သရုပ်ဆောင် မင်းရာဇာသည် ၎င်း၏အိမ်မှအိမ်အကူ အမျိုးသမီးငယ်အား လိင်ပိုင်းဆိုင်ရာ အမြတ်ထုတ်မှုကျူးလွန်ခဲ့သည့်အပြင် အပြင်းအထန် နာကျင်စေမှုတို့ကြောင့် ၂၀၂၀ ခုနှစ်က တရားစွဲဆိုခံခဲ့ရခြင်း ဖြစ်သည်။
အဆိုပါ ဖြစ်စဉ်နှင့် ပတ်သက်၍ သရုပ်ဆောင် မင်းရာဇာ ၊ ဇနီးဖြစ်သူ ဖူးငုံပွင့်နှင့် မန်နေဂျာဖြစ်သူ အောင်လွင်စိုး (ခ) ရခိုင်လေးတို့မှာ ကရင်ပြည်နယ်ဘက်သို့ ထွက်ပြေးတိမ်းရှောင်ခဲ့ရာ ကရင်လက်နက်ကိုင်အဖွဲ့ တစ်ဖွဲ့မှ ဖမ်းဆီး ထိန်းသိမ်းကာ သက်ဆိုင်ရာသို့ ပြန်လည်အပ်နှံခဲ့ခြင်း ဖြစ်သည်။
မတ်လ (၁၃) ရက်တွင် မြောက်ဥက္ကလာပမြို့နယ် တရားရုံးက သရုပ်ဆောင် မင်းရာဇာနှင့် ဇနီးဖြစ်သူ အပါအဝင် (၃) ဦးကို အပြင်းအထန်နာကျင်စေမှု ပုဒ်မ ၃၂၆ ဖြင့် အ လုပ်ကြမ်းနှင့် ထောင်ဒဏ် (၅) နှစ်စီ ချမှတ်ခဲ့ခြင်းဖြစ်ကြောင်း နစ်နာသူဘက်မှ လိုက်ပါဆောင်ရွက်ပေးနေသည့် ဒေါ်နော်အုန်းလှက လူမှုကွန်ရက်မှတဆင့် အသိပေးထားသည်။
“ကျွန်မတို့ အမျိုးသမီးအဖွဲ့က နစ်နာသူမိန်းခလေးဘက်မှ အကူအညီပေးနေတဲ့ မင်းရာဇာအမှုမှ အမှုတစ်ခုကို ဒီနေ့ အမိန့်ချလိုက်ပါပြီ။ ပုဒ်မ (၃၂၆) အပြင်းအထန်နာကျင်စေမှုနဲ့ မြောက်ဥက္ကလာပတရာရုံးကနေ မင်းရာဇာ၊ ၄င်း၏ အမျိုးသမီးဖြစ်သူ ဖူးငုံပွင့် နှင့် မင်းရာဇာမန်နေဂျာဖြစ်သူ အောင်လွင်စိုး(ခ)ရခိုင်လေးတို့ကို အလုပ်ကြမ်းနှင့်ထောင် ဒဏ် (၅) နှစ်ချလိုက်ပါတယ်” ဟု ဒေါ်နော်အုန်းလှက ဆိုသည်။
သရုပ်ဆောင် မင်းရာဇာအား သက်ငယ်မုဒိန်းမှုဖြင့် စွဲဆိုထားသည့်အမှုမှာ ခရိုင်တရားရုံးတွင် ဆက်လက်ရင်ဆိုင်နေရဆဲဖြစ်ကြောင်းလည်း ဒေါ်နော်အုန်းလှက အသိပေးပြောကြားထားသည်။
အဆိုပါ အမှုများအား ၂၀၂၁ ခုနှစ်အတွင်းက အမှုပိတ်သိမ်းခဲ့သည့်အတွက် နစ်နာသူဘက်မှ လိုက်ပါဆောင်ရွက်ပေးနေသူများက အမှုအားမပိတ်သိမ်းသင့်ကြောင်း တ ရားရုံးသို့ လျှောက်ထားခဲ့ရာ တရားရုံးမှ လက်ခံခဲ့ပြီး ပြန်လည်စစ်ဆေးခဲ့ခြင်း ဖြစ်ကြောင်းလည်း သိရသည်။