(၁၀)နှစ်လျှင် တစ်ကြိမ် ကောက်ယူသည့် ပြည်လုံးကျွတ်လူဦးရေနှင့် အကြောင်းအရာကောက်ယူခြင်းသန်းခေါင်စာရင်းကို လာမည့် အောက်တိုဘာ (၁)ရက်မှ (၁၅) ရက်အတွင်း ကောက်ယူတော့မည် ဖြစ်သည်။
ယင်းသို့ကောက်ယူရာတွင် မြန်မာနိုင်ငံ နယ်နိမိတ်အတွင်း နေထိုင်သူများကို ကောက်ယူသွားမည် ဖြစ်ကာ ဖြည့်စွက်ရမည့်မေးခွန်းများလည်း ပါဝင်သည်ဟု သိရသည်။
သန်းခေါင်စာရင်းကောက်ယူမည့် တာဝန်ရှိအဖွဲ့များသည် သန်းခေါင်စာရင်း ကောက်ယူမည့်နေ့အတွက် ကြိုတင်အကြောင်းကြားစာကို အိမ်ထောင်စုတိုင်းသို့ မကောက်ယူမီ ကြိုတင်ပေးပို့သွားမည်ဖြစ်ကာ လူဦးရေနှင့် အိမ်အကြောင်းအရာ မေးခွန်း (၆၈) ခုကို စာရင်းကောက်များက မေးမြန်းမည် ဖြစ်ကြောင်း သိရသည်။
မေးမြန်းရာတွင် အမည်၊ အိမ်ထောင်ဦးစီးနှင့် တော်စပ်ပုံ၊ ပြည့်ပြီးအသက်၊ မွေးသက္ကရာဇ် ရက်၊ လ၊ နှစ်၊ ကိုးကွယ်သည့်ဘာသာ၊ အိမ်တွင် အဓိကပြောဆိုကြသော ဘာသာ စကား၊ ကိုင်ဆောင်သည့် မှတ်ပုံတင်ကတ်ပြားအမျိုးအစား၊ အိမ်ထောင်ရေးအခြေအနေ၊ မွေးစာရင်း ရှိ/မရှိ၊ ပြည်တွင်းရွှေ့ပြောင်းသွားလာခြင်း အကြောင်းအရာ၊ ပြည်ပရွှေ့ပြောင်းသွားလာခြင်း အကြောင်းအရာ၊ ပညာရေးအကြောင်းအ ရာ၊လုပ်သားအင်အား အကြောင်းအရာ၊ အိမ်ထောင်ကျဖူးသူ အမျိုးသမီးများ မွေးဖွားခြင်း အကြောင်းအရာ၊ မသန် စွမ်းမှု အကြောင်းအရာ၊ နေအိမ်အမျိုးအစား ပိုင်ဆိုင်မှုနှင့် ပို့ဆောင်ဆက်သွယ်ရေးပစ္စည်းများ၊ အိမ်ရှိအခန်းအရေအတွက်၊ အိပ်ခန်းအရေအတွက်၊ သောက်သုံး ရေရရှိမှု၊ အလင်းရောင်အတွက် မီးအသုံးပြုခြင်း၊ လောင်စာအသုံးပြုမှု၊ အိမ်သာအမျိုးအစားနှင့် မျှဝေသုံးစွဲမှု၊ အမှိုက်စွန့်ပစ်မှု၊ လက်ဆေးခြင်းအကြောင်းအရာ၊ လွန်ခဲ့သော (၁၂)လအတွင်း အိမ်ထောင်စုဝင်များထဲမှ ေ-သဆုံးမှု စသည့်မေးခွန်းများ ပါဝင်သည်ဟု သိရသည်။
ထို့ပြင် ပြည်ပရွှေ့ပြောင်းသွားလာခြင်းအကြောင်းအရာနှင့် ပတ်သက်၍ မေးမြန်းမှုရှိမည်ဖြစ်ပြီး မေးမြန်းရာတွင် တရားဝင်ဗီဇာဖြင့် သွားခြင်း/မသွားခြင်း၊ အောက်လမ်းမှ တရားမဝင်သွားခြင်း စသည်တို့ကို မေးမြန်းမည်မဟုတ်သလို အဓိကမေးမြန်းလိုသည့် အချက်သည် မည်သည့်နိုင်ငံတွင် သွားရောက်နေထိုင် အလုပ်လုပ်ကိုင်နေသည်ကိုသာ သိလိုရင်း ဖြစ်သည်ဟု သိရသည်။
ထိုနည်းတူ သန်းခေါင်စာရင်း ကောက်ယူခြင်းသည် အိမ်ထောင်စုစာရင်းပုံစံ (၆/၆) သို့မဟုတ် ပုံစံ(၁၀) ရှိခြင်း၊ မရှိခြင်း နိုင်ငံသားစိစစ်ရေးကတ်ရှိခြင်း မရှိခြင်းနှင့် မသက်ဆိုင်ဘဲ အိမ်ထောင်စုတစ်စု စာရင်းကောက်ချိန် မိနစ် (၂၀) ဝန်းကျင် ကြာမြင့်မည် ဖြစ်ကြောင်း သိရသည်။
သန်းခေါင်စာရင်းကောက်ယူရာတွင် စာရင်းကောက်များသည် တစ်အိမ်တက်ဆင်း အိမ်တိုင်ရာရောက် တက်ဘလက်များဖြင့် နံနက် (၇) နာရီမှ ညနေ (၆) နာရီအထိအတွင်း ကောက်ယူမည် ဖြစ်ကာ သန်းခေါင်စာရင်း ရည်ညွှန်းချိန်ကို ၂၀၂ ၄ ခုနှစ်၊ စက်တင်ဘာ (၃၀) ရက် ညသန်းခေါင်ယံအချိန်ကို သန်းခေါင်စာရင်း ရည်ညွှန်းချိန်ဟု သတ်မှတ်ထားကြောင်း သိရသည်။
ယင်း သန်းခေါင်စာရင်းမှရရှိသည့် ကိန်းဂဏန်းများမှာ နောင်အစိုးရအဆက်ဆက်အထိ လက်ဆင့်ကမ်းပေးနိုင်မည့် အချက်အလက်များဖြစ်ကာ ယင်းမှရရှိသည့် အချက်အလက်များသည် ရွေးကောက်ပွဲအတွက် အခြေခံကျသည့် မဲစာရင်းမှန်ကန်ပြည့်စုံရေးအတွက်လည်း အသုံးပြုနိုင်မည်ဖြစ်ကြောင်း နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားထားသည်။
ကိုးကားအချက်အလက်- Guide 4U