သန်လျင်တံတား အမှတ်(၃) ကို ၂၀၁၉ ခုနှစ်၊ မေလမှစတင်၍ ငါးနှစ်စီမံကိန်းဖြင့် တည်ဆောက်ခဲ့ခြင်းဖြစ်ပြီး ၂၀၂၁ ခုနှစ်၊ ဖေဖော်ဝါရီလတွင် နိုင်ငံရေးအပြောင်းအလဲဖြစ်စဥ်ကြောင့် တစ်နှစ်ခန့်ကြာ ရပ်နားခဲ့ကာ ၂၀၂၃ ခုနှစ်တွင် တံတားတည်ဆောက်ရေးလုပ်ငန်းများကို ပြန်လည်ဆောင်ရွက်ခဲ့ခြင်းဖြစ်ကြောင်း သိရသည်။
ယခုအခါ အဆိုပါ ဂျပန်-မြန်မာ နှစ်နိုင်ငံချစ်ကြည်ရေး သန်လျင်တံတားသစ် အမှတ် (၃) တည်ဆောက်မှု ၈၀ ရာခိုင်နှိုန်းထိ ပြီးစီးနေပြီဖြစ်ကြောင်း ဆောက်လုပ်ရေးဝန်ကြီးဌာန၊ လမ်းတံတားဌာနမှ သိရသည်။
ထိုတံတားတည်ဆောက်ရေး စီမံကိန်းအတွက် JICA က ODA ချေးငွေ ဂျပန်ယန်း ၃၁ ဘီလီယံ ထောက်ပံ့ပေးထားခြင်းဖြစ်ပြီး အပိုင်း ၃ ပိုင်းခွဲ၍ တည်ဆောက်နေခြင်းဖြစ်သည်။
ယင်းတံတား၏ အရှည်မှာ ၃၅၀၀ မီတာရှိပြီး တံတားအမျိုးအစားသည် သံကူကွန်ကရစ် + သံမဏိကြိုးဆိုင်းတံတား + သံမဏိရက်မဖြစ်ပြီး အပိုင်း ၁ လုပ်ငန်းတွင် တံတား အရှည် ၁၃၁၂ မီတာ၊ အပိုင်း ၂ လုပ်ငန်းတွင် တံတားအရှည် ၁၃၆၃ မီတာ၊ အပိုင်း ၃ လုပ်ငန်းတွင် တံတားအရှည် ၈၂၅ မီတာပါဝင်ပြီး ပင်မတံတားအကျယ် ၂၂ ဒသမ ၉ မီတာ၊ ရေလမ်းကင်းလွတ်အမြင့် ၁၃ မီတာရှိကာ တံတားခံနိုင်ဝန် ခွင့်ပြုအလေးချိန် ယာဥ်တစ်စီးချင်း ၇၅ တန်အထိဖြစ်ကြောင်း သိရသည်။
” ဒီတံတားပြီးလို့ရှိရင် သီလဝါအထူးစက်မှုဇုန် အပါအဝင် ခရမ်း၊သုံးခွ နဲ့ ကျောက်တန်းမြို့နယ်တို့မှာရှိတဲ့ စီးပွားရေးဇုန်အပြင် ပဲခူးမြို့နယ်ကိုလည်းအလွယ်တကူသွားလို့ရပြီ”ဟု ဆောက်လုပ်ရေးဝန်ကြီးဌာန၊ လမ်းတံတားဌာနမှ တာဝန်ရှိသူတစ်ဦးကပြောသည်။
ယင်းတံတားတည်ဆောက်ခြင်း လုပ်ငန်းကို ၂၀၂၄ ခုနှစ်၊ နှစ်လယ်ပိုင်းတွင် ပြီးစီးနိုင်ရန် လျာထားကြောင်းလည်း သိရသည်။
ယင်းစီမံကိန်း၏ အဓိကရည်ရွယ်ချက်သည် သန်လျင်မြို့နယ်နှင့် ရန်ကုန်မြို့ရှိ ယာဉ်ကြောပိတ်ဆို့မှုကို ဖြေလျော့ရန်ဖြစ်ပြီး သီလဝါအထူးစီးပွားရေးဇုန်သို့ သွားလာရာတွင် ယာဉ်လမ်းကြောင်း ပိုမိုချောမွေ့ပြီး အချိန်တိုတွင်း ကုန်စည်သွားလာ ပို့ဆောင်နိုင်ရန် ဖြစ်ကြောင်း သိရသည်။
ယင်းတံတားစီမံကိန်းအတွက် ဂျပန်နှင့် မြန်မာနိုင်ငံတို့အကြား ချေးငွေသဘောတူစာချုပ်ကို ၂၀၁၇ ခုနှစ်၊ မတ် ၁ ရက်နေ့က ချုပ်ဆိုခဲ့ခြင်းဖြစ်ပြီးလက်ရှိအသုံးပြုနေသည့် သံလျင်တံတားအမှတ်-၁ သည် တရုတ်နိုင်ငံမှ နှစ်နိုင်ငံချစ်ကြည်ရေးအတွက် တည်ဆောက်ပေးခဲ့ခြင်းဖြစ်ကာ ရထားလမ်း ပါရှိခြင်းဖြစ်သည်။