စက်သုံးဆီဝယ်ယူသူများအဆင်ပြေစွာ စက်စွမ်းအားအလိုက်ဝယ်ယူခွင့်ပမာဏကို သတ်မှတ်ထားသောအဆင့်မြှင့်တင်ထားသည့် Bar Code/ QR Code များအား Scan ဖတ်ဝယ်ယူရန် စွမ်းအင်ဝန်ကြီးဌာနမှ အသိပေးထားပြီးဖြစ်သည်။
ထိုသို့ အသိပေးထားသော်လည်း စွမ်းအင်ဝန်ကြီးဌာန ၏ Online Monitoring Center မှ စောင့်ကြည့်စစ်ဆေးမှုအရ စက်သုံးဆီရောင်းချသည့် အရောင်းဆိုင် (၃၀) ခန့်သည် မော်တော်အားလုံးကို Bar Code/ QR Code များ Scan ဖတ်ခြင်းမပြုဘဲရောင်းချနေကြောင်း စစ်ဆေးတွေ့ရှိခဲ့ရသည်။
ထို့ကြောင့် ယင်း စက်သုံးဆီအရောင်းဆိုင် (၃၀) ခန့်အား နောက်ဆုံးအကြိမ်သတိပေးထားကာ ဆက်လက်ပြု လုပ်သည်ကို ထပ်မံစစ်ဆေးတွေ့ရှိရပါကထိရောက်စွာအရေးယူသွားမည်ဟု စွမ်းအင်ဝန်ကြီးဌာနကအသိပေးခဲ့သည်။
လက်ရှိအချိန်၌ အချက်အလက်ပြည့်စုံစွာတိုင်ကြားမှုအရ မန္တလေးတိုင်း၊ စဉ့်ကိုင်မြို့နယ်၊ ပုလိပ်ကျေးရွာ၊ ရန်ကုန်-မန္တလေးလမ်းဟောင်းပေါ်ရှိ “စိန်စီအောင်” စက်သုံးဆီအရောင်းဆိုင် လိုင်စင်အမှတ် (၀၅၁၂) အား စီမံခန့်ခွဲရေးနည်းလမ်းအရ လိုင်စင်ယာယီပိတ်သိမ်းထားကာ တာဝန်ရှိသူအဆင့်ဆင့်ကိုလည်း ဥပဒေနှင့်အညီ ထိရောက်စွာအရေးယူနိုင်ရေးဆောင်ရွက်လျက်ရှိသည်။