သတ္တုသဘောတူညီချက်လက်မှတ်ထိုးရန် ဇလန်းစကီးအမေရိကသွားမည်

ဝါရှင်တန်၊ဖေဖော်ဝါရီ ၂၆

ယူကရိန်းသမ္မတဇယ်လန်းစကီး ဝါရှင်တန်လာရန် သဘောတူကြောင်း အမေရိကန်သမ္မတကပြောကြားခဲ့ပြီး သမ္မတနှစ်ဦးသည် ယူကရိန်းစစ်ပြီးကာလအရေးနှင့်ပတ်သက်၍ သတ္တုရေးရာသဘောတူညီချက်တစ်ရပ်ကို လက်မှတ်ရေးထိုးရန်စီစဉ်ထားသည်ဟုလည်းသိရသည်။

“ယူကရိန်းသမ္မတ သောကြာနေ့မှာဝါရှင်တန်လာမယ်လို့ကြားပါတယ်၊အခုသဘောတူညီချက်ကို ဇယ်လန်းစကီးဘက်ကအဆင်ပြေတယ်ဆိုရင် ကျွန်တော့်ဘက်ကလည်းငြင်းစရာမရှိပါဘူး။အခုသဘောတူညီချက်က တကယ်ကောင်းတဲ့သဘောတူညီချက်တစ်ခုဖြစ်လာမှာပါ” ဟုလည်း၎င်းကဆိုခဲ့သည်။

အမေရိကန်မီဒီယာများ၏ဖော်ပြချက်အရ ယူကရိန်းသည် အင်္ဂါနေ့ကအမေရိကန်ဘက်မှအဆိုပြုခဲ့သည့် သဘောတူညီချက်မူကြမ်း၏ နောက်ဆုံးအဆင့်မူကို သဘောတူခဲ့သည်ဟုလည်းသိရသည်။

ယခုသဘောတူညီချက်၏ နောက်ဆုံးအဆင့်အတည်ပြုချက်များကို အတိအကျမသိရသေး‌သော်လည်း အင်္ဂါနေ့ကဆွေးနွေးခဲ့သည့်မူကြမ်းတွင် ယူကရိန်းနှင့်အမေရိကတို့၏သဘောတူညီမှု၌ ယူကရိန်းအနေဖြင့် အရေးကြီးသည့်ဓာတ်သတ္တုများ၊ရေနံနှင့်သဘာဝဓာတ်ငွေ့များအပါအဝင် ယူကရိန်း အနာဂတ်၌ရရှိမည့်ဝင်ငွေ၏ ၅၀ ရာခိုင်နှုန်းကိုအမေရိကကိုပေးရမည်ဖြစ်ကြောင်း မီဒီယာများ၏ဖော်ပြချက်အရသိရသည်။

အဆိုပါရန်ပုံငွေများအနက် ငွေအချို့ကို ယူကရိန်းတွင်ပြန်လည်ရင်းနှီးမြှုပ်နှံရန် ရည်ရွယ်ထားပြီး ယူကရိန်း၏ အနာဂတ်စီးပွားရေးဖွံ့ဖြိုးတိုးတက်မှုကိုလည်းပံ့ပိုးပေးမည်ဟု အမေရိက ဘက်က,ကတိပြုထားသည်။

သို့သော် ယူကရိန်း၏အဓိကတောင်းဆိုချက်ဖြစ်သည့် ကိဗ်အား ဝါရှင်တန်ဘက်က လုံခြုံရေးအာမခံပေးသည့်ကိစ္စနှင့်ပတ်သက်၍မူ သဘောတူညီချက်ထဲတွင် မပါဝင်ခဲ့ဟုလည်း အမေရိကန်မီဒီယာများကဖော်ပြခဲ့သည်။

Source : ရှင်းဟွာ