ဘန်ကောက်၊ဩဂုတ် ၂၂
ပြည်ပ၌ ၁၇ နှစ်ကြာသွားရောက်ခိုလှုံနေရာမှ ယနေ့တွင်ထိုင်းနိုင်ငံသို့ပြန်လည်ရောက်ရှိလာသည့် ထိုင်းဝန်ကြီးချုပ်ဟောင်းသက်ဆင်အား ထိုင်းတရားရုံးက ထောင်ဒဏ် ၈ နှစ်ချမှတ်ခဲ့ကြောင်းသိရသည်။
၎င်းသည်ယနေ့မနက် ၉ နာရီအချိန်တွင် ဒွန်မောင်းလေဆိပ်သို့ ကိုယ်ပိုင်ဂျက်လေယာဉ်ဖြင့်ရောက်ရှိလာခြင်းဖြစ်ပြီး လေဆိပ်မှထွက်စဉ်ကတည်းက သက်ဆင်၏ဖြူထိုင်းပါတီထောက်ခံသူရှပ်နီများက သောင်းသောင်းဖျဖျကြိုဆိုခဲ့ကြသည်။
၎င်းသည်လေဆိပ်မှထွက်လာပြီးနောက် ထိုင်းဘုရင်မင်းင်းမြတ် မဟာဝိဇယလောင်ကွန်း၏ပုံတော်ရှေ့၌ ဂါရဝပြုခဲ့ပြီး ထောက်ခံသူများအားနှုတ်ဆက်စကားပြန်လည်ပြောကြားခဲ့သည်။
ယင်းနောက်၎င်းအားတရားရုံးသို့ခေါ်ဆောင်သွားရာလမ်းတစ်လျှောက်၌လည်း ရှပ်နီများကစီတန်းကာကြိုဆိုခဲ့ကြသည်။တရားရုံးက သက်ဆင်အား ၎င်း၏ကုမ္ပဏီဟောင်းဖြစ်သည့် Shin Corp နှင့်ပတ်သက်သည့်ပြစ်ဒဏ်တစ်ခု၊ဘဏ်ချေးငွေနှင့်ထီကိစ္စတို့နှင့်ပတ်သက်၍ အမှုသုံးခုအတွက်စုစုပေါင်းထောင်ဒဏ် ၈ နှစ်ချမှတ်ခဲ့သည်။
ထောင်ဒဏ် ၈ နှစ်ချမှတ်ခဲ့သော်လည်း သက်ဆင်အနေဖြင့် ထောင်ထဲ၌မည်မျှနေရမည်မှာမသေချာ၊မရှင်းလင်းသေးပေ။ထိုင်းစစ်တပ်က သက်ဆင်အားအကျင့်ပျက်ခြစားမှု၊ဘုရင်စနစ်အပေါ်သစ္စာဖောက်ဖျက်မှုစွပ်စွဲချက်များဖြင့် ရာထူးမှဖြုတ်ချပြီးနောက်နှစ်နှစ်အကြာတွင် ၎င်းသည်ထောင်ဒဏ်ချမှတ်ခံရမည်ဆိုးသဖြင့်ပြည်ပသို့တိမ်းရှောင်သွားသူလည်းဖြစ်သည်။
သက်ဆင်သည် ထိုင်းပါလီမန်၌ ဝန်ကြီးချုပ်လောင်းအတွက်မဲခွဲဆုံးဖြတ်သည့်နေ့၌ပြန်လည်ရောက်ရှိလာကာ ၎င်း၏ဖြူထိုင်းပါတီမှ မစ္စတာဆရီထာထာဝီဆင်းသည် ထိုင်းဝန်ကြီးချုပ်အလောင်းအလျာအဖြစ်အဆိုတင်သွင်းခြင်းခံရသည့်နေ့လည်းဖြစ်သည်။
အသက် ၇၄ နှစ်အရွယ်ရှိပြီဖြစ်သောမစ္စတာသက်ဆင်အား နှလုံးနှင့်အဆုတ်ရောဂါများကြောင့် အများနှင့်သီးသန့်ခွဲကာ ပြစ်ဒဏ်ကျခံစေမည်ဖြစ်ပြီး စီရင်ချက်ချအပြီးငါးရက်အကြာတွင် မိသားစုဝင်များက၎င်းအားလာတွေ့နိုင်မည်ဖြစ်ကြောင်းအာဏာပိုင်များကဆိုသည်။
“ထိုင်းနိုင်ငံကနေဖေဖေ့ကိုပြန်လည်ကြိုဆိုပါတယ်၊အခုဆိုဖေဖေဟာ ဘေးကင်းကင်းနဲ့မွေးရပ်မြေကိုပြန်ရောက်လာပြီး တရားဥပဒေရဲ့လုပ်ထုံးလုပ်နည်းနဲ့အညီဆောင်ရွက်မှုကိုခံယူနေပါပြီ၊ဖေဖေ့ကိုလာရောက်ကြိုဆိုဝန်းရံပေးသူအားလုံးကိုလည်းအထူးကျေးဇူးတင်ပါတယ်” ဟု ၎င်း၏သမီးဖြစ်သူ ပါအယ်ထုန်ထန်က အင်စတာဂရမ်၌ရေးသားခဲ့ပြီး ဒွန်မောင်းလေဆိပ်ရှိ VIP အခန်း၌ သားသမီးသုံးဦးနှင့်မြေးခုနစ်ဦးတို့နှင့်အတူရှိနေသော မစ္စတာသက်ဆင်၏ဓာတ်ပုံအားတင်ခဲ့သည်။
Source : CNA
