ရှန်ဟိုင်း၊ ဇွန် ၁၁
တရုတ်နိုင်ငံသည် ရှန်ဟိုင်းရှိ ကမ်းလွန်လေရဟတ်ခြံမှ စွမ်းအင်ထုတ်သည့် ကမ္ဘာ့ပထမဆုံး စီးပွားဖြစ် ရေအောက်ဒေတာစင်တာ (UDC) စီမံချက်ကို အင်္ဂါနေ့တွင်စတင်လိုက်သည်။ သဘာဝပတ်ဝန်းကျင်ထိန်းသိမ်ရေးနှင့် စွမ်းအင်ထုတ်လုပ်မှုနည်းပညာများပေါ်တွင် နောက်ထပ် အရေးကြီးသော ခြေလှမ်းကိုရဲရဲဝံ့ဝံ့ စတင်လိုက်ခြင်းပင်ဖြစ်သည်။
အဆိုပါ စီမံကိန်းသည် တရုတ်နိုင်ငံ လင်-ဂန်း အထူးဧရိယာ (Shanghai) ရှေ့ပြေး လွတ်လပ်စွာ ကုန်သွယ်ရေး ဇုံအနီးရှိ ရှန်ဟိုင်းကမ်းရိုးတန်းရေပြင်တွင် စတင်ခဲ့ခြင်းဖြစ်သည်။ ကာဗွန်နည်းသော ကွန်ပြူတာလုပ်ငန်းများအတွက် ကမ္ဘာလုံးဆိုင်ရာလိုအပ်ချက်ကို ဖြေရှင်းရန် ပြန်လည်ပြည့်ဖြိုးမြဲစွမ်းအင်နှင့် ကွန်ပြူတာအခြေခံအဆောက်အဦးများ ပူးတွဲတည်နေရာကိုပေါင်းစပ်ထာသော စမ်းသပ်မှုဖြစ်သည်။
တရုတ်နိုင်ငံ လင်-ဂန်း အထူးဧရိယာ ရှန်ဟိုင်း (Shanghai) Pilot Free Trade Zone၊ Shanghai Lingang Special Area Investment Holding Group Co., Ltd. နှင့် Shanghai Hicloud Technology Co., Ltd. ကုမ္ပဏီတို့သည် သုံးပွင့်ဆိုင် ပူးပေါင်းဆောင်ရွက်ရေး သဘောတူညီချက်ကို အင်္ဂါနေ့တွင် လက်မှတ်ရေးထိုးခဲ့ပြီး အဆိုပါ စီမံကိန်းကို တရားဝင် စတင်ခဲ့ခြင်း ဖြစ်သည်။
လင်-ဂန်း အထူးဒေသ တရုတ်ရှန်ဟိုင်း (Shanghai) Pilot Free Trade Zone ၏ စီမံခန့်ခွဲရေး ကော်မတီ အကြီးအကဲ ချန်ဂျင်ရှန်က လင်ဂန်း စီမံချက်သည် သဘာဝပတ်ဝန်းကျင်ကို ထိခို-က်မှုနည်းသော ကွန်ပြူတာ စွမ်းအားအတွက် စံညွှန်းတစ်ခု ဖြစ်လာစေရန် ရည်ရွယ်၍ လင်ဂန်း စီမံကိန်းသည် UDCs အတွက် စံနမူနာအသစ်တစ်ခု ထူထောင်ထားကြောင်း ပြောကြားခဲ့သည်။
လင်ဂန်း၏ ရပ်တည်ချက်ဖြစ်သော “အရည်အသွေးသစ်ကွန်ပြူတာအခြေခံအဆောက်အဦးနှင့် AI အဆင်သင့်ဖြစ်နိုင်သောအခြေအနေများပေါင်းစပ်မှုသည် နိုင်ငံတကာအဆင့် နယ်စပ်ဖြတ်ကျော်ဒေတာစီးဆင်းမှု၊ ဉာဏ်ရည်တု AI ကွန်ပျူတာနှင့် ဉာဏ်ရည်ထက်မြက်သောချိတ်ဆက်မှုများအတွက် ကမ္ဘာလုံးဆိုင်ရာဗဟိုအချက်အချာအဖြစ်ကို အားကောင်းစေရန် ကျွန်ုပ်တို့၏ရည်မှန်းချက်နှင့် ကိုက်ညီသည်” ဟု ၎င်းက ပြောကြားခဲ့သည်။
သဘောတူညီချက်အရ Hicloud သည် ၂၄ မီဂါဝပ် (MW) ရေအောက်ဒေတာအစုအဝေးကို ထူထောင်ရန်၊ ပြန်လည်ပြည့်ဖြိုးမြဲစွမ်းအင်၊ အဆင့်မြင့်အအေးပေးနိုင်စွမ်းနှင့် ဒေတာပေါင်းစပ်မှုတို့ ပေါင်းစပ်ထားသည့် နှစ်ဆင့်စီမံကိန်းအတွက် ယွမ်ငွေ ၁.၆ ဘီလျံ (အမေရိကန်ဒေါ်လာ ၂၂၂.၇ သန်းခန့်) မြှုပ်နှံမည်ဖြစ်ကြောင်း Hi cloud အထွေထွေမန်နေဂျာ စုယန်ကပြောကြားခဲ့သည်။
မော်ဂျူလာဒေတာယူနစ်အုပ်စုများကို လက်ခံပေးနိုင်သည့် အဆိုပါစက်ရုံသည် ပင်လယ်ရေဖြင့် အအေးခံပြီး ကမ်းလွန်လေစွမ်းအင်ဖြင့် မောင်းနှင်ပေးမည်ဖြစ်ကြောင်း၊ ရေရှည်တည်တံ့သောစွမ်းအင်ကို အသုံးပြုမည်ဖြစ်ကြောင်းနှင့် ကာဗွန်ထုတ်လွှတ်မှု လုံးဝကင်းစင်သွားမည်ဖြစ်ကြောင်း စုက ပြောကြားခဲ့သည်။
ပထမအဆင့်ဖြစ်သော ၂.၃ မဂ္ဂါဝပ် နမူနာသရုပ်ပြစက်ရုံကို နိုင်ငံတော် ဖွံ့ဖြိုးတိုးတက်ရေးနှင့် ပြုပြင်ပြောင်းလဲရေး ကော်မရှင်က သဘာဝနှင့်ကိုက်ညီသော၊ ကာဗွန်နည်းသော နည်းပညာဆန်းသစ်တီထွင်မှုအတွက်စံပြအဖြစ် သတ်မှတ်ကာ စက်တင်ဘာလတွင် စတင်လည်ပတ်နိုင်မည်ဟု မျှော်လင့်ရသည်။
ဒုတိယအဆင့်တွင် ဓာတ်အားသုံးစွဲမှု ထိရောက်မှု (PUE) သည် ၁.၁၅ အောက် (PUE)လျော့ချနိုင်မည်ဟုမျှော်လင့်ထားပြီး ၂၄ မဂ္ဂါဝပ်အထိ ထုတ်ပေးမည်ဖြစ်သည်။ အဆိုပါအဆင့်သည် လျှပ်စစ်စွမ်းအင် ထိရောက်မှု စံအဆင့်ဖြစ်ပြီး စွမ်းအင်သုံးစွဲမှု၏ ၉၀ ရာခိုင်နှုန်းကျော်ကို ကမ်းလွန်လေရဟတ်များမှ ဓာတ်အားထုတ်ယူနေချိန်တွင် စွမ်းအင်သုံးစွဲမှု ထိရောက်မှုရှိကြောင်း ၎င်းက ဆိုထားသည်။
UDC ၏ သဘာဝပင်လယ်ရေအအေးပေးစနစ်သည် အအေးခံခြင်းစွမ်းအင်သုံးစွဲမှုစုစုပေါင်း၏ ၄၀-၅၀ ရာခိုင်နှုန်းမှ ၁၀ ရာခိုင်နှုန်းအောက်သို့ လျှော့ချပေးကာ အလုံးစုံစွမ်းအင်အသုံးပြုမှုကို ၃၀-၄၀ ရာခိုင်နှုန်းအထိ လျှော့ချပေးသည်ဟု စုက ဆိုသည်။
ထို့အပြင် မြေယာအသုံးပြုမှု လျော့ပါးစေရန်နှင့် မြေယာအခြေခံချထားမှုများကြောင့် ကြုံတွေ့နေရသည့် မြေယာသယံဇာတရှားပါးမှုပြဿနာကိုလည်း ဖြေရှင်းပေးနိုင်မည်ဖြစ်ကြောင်း ၎င်းက ဆက်လက်ပြောကြားခဲ့သည်။