လဟယ်မြို့နယ်ဆေးရုံအတွက် တပ်မတော်အထူးကု ဆရာဝန်များစေလွှတ်ပေးခဲ့ကာ လိုအပ်ပါကထပ်မံစေ လွှတ်ပေးမည်ဟု နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဖေဖော်ဝါရီ ၁၆ ရက်မွန်းလွဲပိုင်းက နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့နှင့် လေရှီးမြို့တို့ရှိ ဌာနဆိုင်ရာတာဝန်ရှိသူများ၊ မြို့မိမြို့ဖများအားသီးခြားစီတွေ့ဆုံစဥ် ပြောကြားခဲ့ခြင်းဖြစ်သည်။
လဟယ်မြို့နယ်ဆေးရုံဆရာဝန်လိုအပ်ချက်အတွက် ၂၀၁၂ ခုနှစ်မှစတင်၍ နာဂဒေသအတွက် တပ်မတော် အထူးကုဆရာဝန်များကိုစေလွှတ်ပေးခဲ့ကာ လိုအပ် ချက်များရှိပါက ထပ်မံစေလွှတ်ပေးသွားမည်ဟု ပြော သည်။
” ဆေးရုံရှိရင် ဆရာဝန်ရှိရမှာဖြစ်တဲ့အတွက် ဆရာဝန်တွေခန့်အပ်ပေးသွားမှာဖြစ်ပါတယ်။ ဆေးရုံအတွက် လိုအပ်တဲ့ ကုသရေးဆိုင်ရာပစ္စည်းတွေကိုလည်း တတ်နိုင်သမျှဖြည့်ဆည်းပေးသွားပါမယ်”ဟု နိုင်ငံတော် ယာ ယီသမ္မတက ပြောသည်။
ထို့ပြင် စာသင်ကျောင်းများအတွက် ဆရာ/ဆရာမများ လိုအပ်ချက်တွင် အလယ်တန်းပြ ဆရာ/ဆရာမများပို မိုလိုအပ်နေသဖြင့် ဆရာ/ဆရာမများဖြည့်ဆည်းပေးနိုင်ရန်ဆောင်ရွက်ပေးသွားမည်ဖြစ်ကာ နာဂဒေသအတွင်း ပညာရေးနှင့်ပတ်သက်ပါက ပညာတတ်များပေါကြွယ်စေရန် ပညာရေးကိုအားပေးဆောင်ရွက်စေလိုသည်ဟု ပြောသည်။
” စာရင်းဇယားတွေအရ တန်းစဉ်ကူးပြောင်းမှုတွေနည်း ပါးတာကိုတွေ့ရပါတယ်။ ပညာသင်ကြားရာမှာ ဘာသာ စကားအရအခက်အခဲတွေဖြစ်ပေါ်နေတာကိုလည်းတွေ့ရတာကြောင့် လူကြီးမိဘတွေ၊ တာဝန်ရှိသူတွေအနေနဲ့လည်း မိမိတို့နိုင်ငံရဲ့ ရုံးသုံးဘာသာစကားဖြစ်တဲ့ မြန်မာစကားကို ကလေးငယ်တွေတတ်ကျွမ်းစေဖို့ ဝိုင်းဝန်းဆောင်ရွက်ပေးကြစေလိုပါတည်”ဟု နိုင်ငံတော် ယာယီသမ္မတက တိုက်တွန်းပြောကြားသည်။
ထိုသို့ ဆောင်ရွက်မှသာ ပညာသင်ကြားမှုကိုအ ထောက်အကူပြုနိုင်မည်ဖြစ်သည့်နည်းတူ အချို့ကျောင်းနေအရွယ်ကလေးငယ်များသည် အကြောင်းအမျိုးမျိုးကြောင့် ပညာသင်ကြားရန်ပျက်ကွက်နေကြသဖြင့် အုပ်ချုပ်ရေးဆိုင်ရာအဖွဲ့အစည်းများအနေဖြင့် ကျောင်းနေအရွယ်ကလေးငယ်များအားလုံးအတန်းပညာသင်ကြားနိုင်ရေးအတွက် ဝိုင်းဝန်းတိုက်တွန်းဆောင်ရွက်ပေးကြစေလိုသည်ဟု နိုင်ငံတော် ယာယီသမ္မတက ပြောကြားခဲ့သည်။