ဖနောင်ပင်၊ မတ်လ ၂၄ ရက်
လန်ချန်း-မဲခေါင် ပူးပေါင်းဆောင်ရွက်မှု (LMC) သည် ညီညွတ်မှု၊ အပြန်အလှန်ယုံကြည်မှုနှင့် ဘုံဖွံ့ဖြိုးတိုးတက်ရေး စိတ်ဓာတ်များအပေါ် အခြေခံ၍ တည်ဆောက်ထားသော နှစ်ဦးနှစ်ဖက်အကျိုးရှိစေသည့် ပူးပေါင်းဆောင်ရွက်မှု၏ အောင်မြင်သော စံနမူနာတစ်ခုအဖြစ် ရပ်တည်နေကြောင်း ကမ္ဘောဒီးယား နိုင်ငံခြားရေးနှင့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး ပရတ်ဆိုခွန်း က အင်္ဂါနေ့တွင် ပြောကြားခဲ့ကြောင်း သိရသည်။ LMC အဖွဲ့တွင် တရုတ်၊ မြန်မာ၊ လာအို၊ ထိုင်း၊ ကမ္ဘောဒီးယားနှင့် ဗီယက်နမ် စသည့် ခြောက်နိုင်ငံ ပါဝင်သည်။
LMC ၏ (၁၀) နှစ်ပြည့် အထိမ်းအမှတ်နှင့် LMC ရက်သတ္တပတ် ၂၀၂၆ အတွက် ပေးပို့သော ဂုဏ်ပြုသဝဏ်လွှာတွင် ဒုတိယဝန်ကြီးချုပ်လည်းဖြစ်သူ ပရတ်ဆိုခွန်းက ယခုနှစ်သည် LMC ခြောက်နိုင်ငံကြား ငြိမ်းချမ်းရေး၊ တည်ငြိမ်ရေး၊ ဘုံသာယာဝပြောရေးနှင့် ရေရှည်တည်တံ့သော ဖွံ့ဖြိုးတိုးတက်မှုများအတွက် ရည်ရွယ်သည့် ရေရှည်ချစ်ကြည်ရေး၊ မိတ်ဖက်ပြုမှုနှင့် လက်တွေ့ကျသော ပူးပေါင်းဆောင်ရွက်မှုများ၏ “ရွှေရောင်ဆယ်စုနှစ်” တစ်ခုဖြစ်ကြောင်း ဖော်ပြခဲ့သည်။
LMC စတင်တည်ထောင်ချိန်မှစ၍ ဆက်သွယ်ရေး၊ ထုတ်လုပ်မှုစွမ်းရည်၊ နယ်စပ်ဖြတ်ကျော် စီးပွားရေးပူးပေါင်းဆောင်ရွက်မှု၊ ရေအရင်းအမြစ် စီမံခန့်ခွဲမှု၊ စိုက်ပျိုးရေးနှင့် ဆင်းရဲနွမ်းပါးမှု လျှော့ချရေး အပါအဝင် ကဏ္ဍအသီးသီးတွင် ထင်သာမြင်သာရှိသော အောင်မြင်မှုများကို ဖော်ဆောင်ပေးနိုင်ခဲ့ကြောင်း ၎င်းက ပြောကြားခဲ့သည်။
“ဒီအောင်မြင်မှုတွေက LMC ဟာ ပူးပေါင်းဆောင်ရွက်ရေး ယန္တရားတစ်ခုထက်မကဘဲ ယုံကြည်မှု၊ စည်းလုံးမှုနဲ့ ဘုံရည်မှန်းချက်တွေအပေါ် အခြေခံပြီး တိုးတက်ပြောင်းလဲနေတဲ့ သက်ရှိမိတ်ဖက်ပြုမှုတစ်ခု ဖြစ်တယ်ဆိုတာကို အတည်ပြုပေးနေပါတယ်” ဟု ပရတ်ဆိုခွန်းက ပြောကြားခဲ့သည်။
၎င်းက ဆက်လက်၍ LMC သည် ယနေ့တွင် နှစ်ဦးနှစ်ဖက်အကျိုးရှိစေသော ပူးပေါင်းဆောင်ရွက်မှု၏ အောင်မြင်သည့် စံနမူနာတစ်ခုနှင့် တောင်-တောင် ပူးပေါင်းဆောင်ရွက်မှု ၏ ထင်ရှားသော နမူနာတစ်ခုအဖြစ် ရပ်တည်နေပြီး၊ ကမ္ဘာ့တောင်ခြမ်း နိုင်ငံများအနေဖြင့် စိန်ခေါ်မှုများကို အခွင့်အလမ်းများအဖြစ် မည်ကဲ့သို့ ပြောင်းလဲနိုင်ကြောင်းနှင့် ဘုံသာယာဝပြောမည့် အနာဂတ်ကို မည်သို့ဖော်ဆောင်နိုင်ကြောင်း ပြသနေသည်ဟု ထပ်လောင်းပြောကြားခဲ့သည်။
LMC ၏ အောင်မြင်မှုအတွက် အဓိကကျသော အချက်မှာ ကျေးလက်ဒေသ ဖွံ့ဖြိုးတိုးတက်ရေး၊ ရေအရင်းအမြစ်၊ စိုက်ပျိုးရေး၊ ပတ်ဝန်းကျင်၊ ပညာရေး၊ မိုင်းရှင်းလင်းရေး၊ ခရီးသွားလုပ်ငန်း၊ ယဉ်ကျေးမှုအမွေအနှစ်၊ အမျိုးသမီးကဏ္ဍနှင့် လူငယ်ဖွံ့ဖြိုးရေး စသည့် ကဏ္ဍစုံမှ လူထုဗဟိုပြု စီမံကိန်း ရာပေါင်းများစွာကို ပံ့ပိုးပေးခဲ့သော LMC အထူးရန်ပုံငွေ ဖြစ်ကြောင်း ၎င်းက ပြောကြားခဲ့သည်။ ကမ္ဘောဒီးယားနိုင်ငံသည် ယနေ့အထိ အဆိုပါရန်ပုံငွေဖြင့် အကောင်အထည်ဖော်သည့် စီမံကိန်း ၁၀၆ ခုကို ရရှိထားပြီး ဖြစ်သည်။
ပရတ်ဆိုခွန်းက LMC စီမံကိန်းများအတွက် ရက်ရောစွာ ဆက်လက်ပံ့ပိုးပေးနေသော တရုတ်အစိုးရနှင့် ပြည်သူများကို အထူးကျေးဇူးတင်ရှိကြောင်း ပြောကြားခဲ့ပြီး၊ ယင်းပံ့ပိုးမှုများသည် ကမ္ဘောဒီးယား၏ ဖွံ့ဖြိုးတိုးတက်ရေး ဦးစားပေးလုပ်ငန်းများနှင့် ဒေသတွင်း ပူးပေါင်းဆောင်ရွက်မှုများကို များစွာ အထောက်အကူပြုသည်ဟုဆိုသည်။
LMC အနေဖြင့် နောက်ထပ် ရွှေရောင်ဆယ်စုနှစ်သို့ ကူးပြောင်းရာတွင် ပွင့်လင်းမှု၊ အားလုံးပါဝင်မှု၊ အပြန်အလှန်အကျိုးရှိမှု၊ အစိမ်းရောင်ဖွံ့ဖြိုးတိုးတက်မှု၊ ဆန်းသစ်တီထွင်မှုနှင့် တည်မြဲသော ငြိမ်းချမ်းရေးတို့အတွက် စုပေါင်းကတိပြုချက်များကို ထပ်လောင်းအတည်ပြုခဲ့သည်။ ရှေ့ဆက်၍ ရေရှည်တည်တံ့သော ရေအရင်းအမြစ် စီမံခန့်ခွဲမှု၊ ဒေသတွင်း ဆက်သွယ်ရေး၊ စီးပွားရေး ပေါင်းစည်းမှု၊ ဒစ်ဂျစ်တယ် ကူးပြောင်းမှုနှင့် အားလုံးပါဝင်သော တိုးတက်မှု စသည့် အဓိကဦးစားပေးကဏ္ဍများတွင် ပူးပေါင်းဆောင်ရွက်မှုများကို ပိုမိုခိုင်မာအောင် လုပ်ဆောင်သွားရန် လိုအပ်ကြောင်း ၎င်းက အလေးပေး ပြောကြားခဲ့သည်။
Ref: ရှင်းဟွာ