တရုတ်သမ္မတ ရှီကျင့်ဖျင်နှင့် နိုင်ငံခြားရေးမူဝါဒဆိုင်ရာနှင့် စီးပွားရေးဆိုင်ရာ ပြဿနာရပ်များအကြောင်း ပြောဆိုဆွေးနွေးရန်အတွက် သူတရုတ်နိုင်ငံသို့ သွားရောက်ရန် ဆန္ဒရှိသည်ဟု အမေရိကန်သမ္မတ ဒေါ်နယ်ထရမ့်ပ်က ထုတ်ဖော်ပြောကြားလိုက်သည်။
မေ ၁၆ ရက်က ထုတ်လွှင့်ခဲ့သည့် Fox News သတင်းဌာနနှင့် အင်တာဗျူးအတွင်း မစ္စတာရှီထံ အလည်အပတ်သွားရောက်လိုပါသလားဆိုသော အမေးကို “သေချာတာပေါ့” ဟု မစ္စတာ ထရမ့်ပ်က ပြန်ဖြေခဲ့ပြီး တရုတ်နှင့် အမေရိကဆက်ဆံရေးသည် အရေးကြီးသည်ဟုလည်း ဆိုခဲ့သည်။
တရုတ်ခေါင်းဆောင်နှင့် စကားပြောဆိုရန် စိတ်အားထက်သန်မှုကို မစ္စတာထရမ့်ပ်က ထပ်ခါတလဲလဲ ဖော်ပြခဲ့သည်။ သမ္မတ ထရမ့်ပ်၏ တရုတ်ကုန်စည်များအပေါ် စည်းကြပ်ခွန်များ ချမှတ်ခဲ့မှုကြောင့် ဖြစ်ပေါ်ခဲ့သော ကုန်သွယ်ရေးစစ်ပွဲကို ယာယီရပ်စဲရန် ၎င်းတို့၏ လက်ထောက်များအကြား စေ့စပ်ညှိနှိုင်းနိုင်ခဲ့ကြပြီးနောက် ၎င်းတို့နှစ်ဦး ဖုန်းပြောဖြစ်နိုင်သည်ဟု သူက ခန့်မှန်းပြောကြားခဲ့သည်။
ရက် ၉၀ သဘောတူညီချက်အရ အမေရိကသည် တရုတ်သွင်းကုန်များအပေါ် အခွန်အခများကို ၁၄၅ ရာခိုင်နှုန်းမှ ၃၀ ရာခိုင်နှုန်းသို့ လျှော့ချပေးခဲ့ပြီး အမေရိကန်ကုန်စည်များအပေါ် တရုတ်၏ အခွန်အခ ၁၀ ရာခိုင်နှုန်းသို့ ကျဆင်းခဲ့သည်။
တရုတ်ခေါင်းဆောင်နှင့် ဆက်သွယ်ရန် စိတ်အားထက်သန်ကြောင်း အချက်ပြနေသော်လည်း မစ္စတာ ထရမ့်ပ်သည် ၎င်း၏ မကြာခင်ကပြီးဆုံးခဲ့သော ဆော်ဒီအာရေဗျ၊ ကာတာ၊ ယူအေအီး ခရီးစဉ်သည် ယင်းနိုင်ငံများကို တရုတ်၏ သြဇာလွှမ်းမိုးမှုပြင်ပတွင် ရှိနေစေရန် ရည်ရွယ်ခဲ့သည်။
“သူတို့က တရုတ်ကို သွားနေကြတယ်၊ အဲဒါက သူတို့ရဲ့ မိဘဖြစ်သွားမယ်၊ ဒါတော့ မဖြစ်ဘူး” ဟု အာရပ်နိုင်ငံ သုံးနိုင်ငံနှင့် ပတ်သက်၍ ၎င်းက ပြောသည်။ ထိုသုံးနိုင်ငံကို မိမိတို့၏ အဝန်းအဝိုင်းအတွင်း ထားရှိရန် အလွန်အရေးကြီးသည်ဟု ၎င်းက ဆက်လက်ပြောကြားခဲ့သည်။
Ref: သည်စထရိတ်တိုင်းမ်စ်