အရွယ်ရောက် တိုက်လိပ် အထီး (၂၅) ကောင်နှင့် အမ (၂၅) ကောင် စုစုပေါင်းအကောင်(၅၀)အား ချင်းတွင်းမြစ်အတွင်းသို့ ဇွန်လ(၂၃) ရက်နေ့က လွှတ်ပေးခဲ့ကြောင်းသိရသည်။
စစ်ကိုင်းတိုင်းဒေသကြီး၊ ခန္တီးမြို့နယ် လင်းဖားကျေးရွာအနီးရှိ ချင်းတွင်းမြစ်ရေပေါ်ခြံတွင် ညင်သာစွာစေလွှတ်ခြင်းစနစ် (Soft Release)ဖြင့် စေလွှတ်ထားသော တိုက်လိပ်များအနက် အရွယ်ရောက်တိုက်လိပ်အကောင် (၅၀)ကို စေလွှတ်ခဲ့ခြင်းဖြစ်သည်။
သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာန၊ သဘာဝပတ်ဝန်းကျင်နှင့် သားဌက်တိရစ္ဆာန် ထိန်းသိမ်းရေးဌာန၊ ထမံသီတောရိုင်းတိရစ္ဆာန်ထိန်းသိမ်းရေးဌာနမှ ဝန်ထမ်းများ၊ ပညာရေးဝန်ထမ်းများ၊ ဒေသခံပြည်သူများက မြန်မာ့အရွယ်ရောက် တိုက်လိပ်အကောင် (၅၀)ကိုချင်းတွင်းမြစ်အတွင်းအပြီးတိုင်စေလွှတ်ခဲ့သည်။
တိုက်လိပ်၏ ကျောခွံသည် ရှည်လျား၍ ခုံးပြီး အနောက်ဘက်တွင် အကျယ်ဆုံးဖြစ်ကာ စူးရှသော အလယ်စောင့်မှာ အရွယ်ရောက်သောအခါ အလွန်အမင်း မသိသာတော့ပေ။အထီး/အမအလိုက် ကျောခွံ၏ အရောင်မှာ ကွာခြားရာ အမသည် အညို (သို့) မီးခိုးရောင်ဖြစ်ပြီး အထီးမှာ ထင်ရှားသော အမဲရောင်အစင်းကြီး (၃)ခုရှိကြောင်း သိရသည်။
အရွယ်ရောက်လိပ်၏ ကျောခွံမှာ (၅၈) စင်တီမီတာထိရှိပြီး ရင်ခွံမှာ အဝါရောင် (သို့) နို့နှစ်ရောင်ဖြစ်ကာ ဦးခေါင်းနှင့်လည်ပင်းသည်အညို (သို့) အစိမ်းရင့်ရောင်ဖြစ်သည်။
ဦးခေါင်းမှာ မကြီးမသေးဖြစ်ပြီး အနည်းငယ်ချွန်ထွက်နေသောနှာယောင်ရှိပြီးမေးရိုးဖျားမှာ ဖျော့သောအရောင်ရှိကြောင်းလည်း သိရသည်။
တိုက်လိပ်၏ ပေါက်ဖွားရှင်သန်ရာဒေသသည် မြစ်ကြီးနားဖြစ်ပြီး ယခင်က ဧရာဝတီမြစ် ၊ ချင်းတွင်းမြစ် ၊ စစ်တောင်းမြစ်နှင့်၎င်းတို့၏ မြစ်လက်တက်များတွင် ပျံ့နှံ့စွာတွေ့ခဲ့ရသော်လည်း ယခုအခါ ချင်းတွင်းမြစ်တွင်သာ ရှားပါးစွာ တွေ့ရတော့သည်။
တိုက်လိပ်သည် အသီးအရွက်စားလိပ်ဖြစ်ပြီး အပြည်ပြည်ဆိုင်ရာ သဘာဝအရင်းအမြစ်များထိန်းသိမ်းရေးအဖွဲ့ IUCN Red List တွင် မျိုးသုဉ်းရန်အန္တရာယ်ရှိမျိုးစိတ်အဖြစ် ထည့်သွင်းထိန်းသိမ်းကာကွယ်ထားရှိပြီး မြန်မာနိုင်ငံတွင် လုံးဝကာကွယ်ထားသည့် တောရိုင်းတိရစ္ဆာန်များစာရင်းတွင် ထည့်သွင်း ထိန်းသိမ်းကာကွယ်စောင့်ရှောက်ထားကြောင်းလည်း သိရသည်။
