ရွှေဈေးကွက်အတွင်း၌ တစ်ကျပ်သား ၂၇သိန်း အောက်ဖြင့်သာရောင်းချရန် သက်ဆိုင်ရာက ညွှန်ကြားထားပြီး အမှန်တကယ် အရောင်းအဝယ်ပြုလုပ်နိုင်သည့်အခြေအနေဖြစ်ရန် လိုအပ်ကြောင်း ရွှေလုပ်ငန်း လုပ်ကိုင်သူအချို့က သုံးသပ်သည်။
လက်ရှိတွင် ယင်းသို့သတ်မှတ်သော်လည်း ဈေးကွက်အတွင်း၌ ၂၈ သိန်းအထက်ဖြင့်သာ အရောင်းအဝယ်ပြုလုပ်လျက်ရှိကြောင်း သိရသည်။
” ၂၇ သိန်းအောက် ရောင်းဖို့ဆိုတာကတော့ တကယ်ကို တကယ်ဝယ်ရောင်း လုပ်လို့ရမှ အဲဒီဈေး ဖြစ်မှာပေါ့နော်။ တကယ် ဝယ်ရင် အဲဒီဈေးရမှာလား၊ တကယ်ကို ရောင်းရင် အဲဒီဈေးရမှာလားပေါ့နော်။ ပြောတဲ့သူတွေကတော့ သူတို့အသင်းအဖွဲ့တွေက ပြောကြတယ်ပေါ့နော်။ သူတို့ဆီမှာ တကယ်၂၇သိန်းဈေး ဝယ်လို့ရမှပဲ ဒါဝယ်တဲ့ဈေး ဖြစ်မှာပေါ့နော်။ တကယ်အရောင်းအဝယ် လုပ်လို့ရတဲ့ဈေး ဖြစ်မှပဲ အဆင်ပြေမှာပေါ့နော်” ဟု ရွှေလုပ်ငန်းရှင်တစ်ဦးက ပြောသည်။
ဈေးကွက်အတွင်း ရွှေဈေးမတည်ငြိမ်မှုများ ဖြစ်ပေါ်နေသည့်အတွက် ပြီးခဲ့သည့် ရက်ပိုင်းအတွင်းကပင် ရန်ကုန်တိုင်း ရွှေအသင်းမှ တဆင့် အခေါက်ရွှေတစ်ကျပ်သား (၂၇) သိန်းဖြင့်သာ အရောင်းအဝယ် ပြုလုပ်ရန် ညွှန်ကြားခဲ့ခြင်း ဖြစ်သည်။
ယင်းကဲ့သို့ ညွှန်ကြားထားသော်လည်း လက်ရှိဈေးကွက်အတွင်း အရောင်း အဝယ်ဖြစ်နေသည့် ဈေးနှုန်းမှာ (၂၈) သိန်းခွဲဝန်းကျင်ဖြင့် အရောင်းအဝယ် ပြုလုပ်လျက်ရှိပြီး ယနေ့ ဇန်နဝါရီ (၁၃) ရက်တွင်လည်း အဆိုပါ ဈေးနှုန်းဖြင့်သာ အရောင်းအဝယ် ပြုလုပ်ကြကြောင်း သိရသည်။
ရန်ကုန်တိုင်းအတွင်းရှိ ရွှေဆိုင်များကို စစ်ဆေးမှုများ လိုက်လံဆောင်ရွက်နေပြီး (၂၇) သိန်းအထက်ရောင်းချသည့် ရွှေဆိုင်များကို လိုင်စင်ပိတ်သိမ်းကာ အမည်ပျက်စာရင်း ကြေညာသည်အထိ အရေးယူသွားမည်ဟုလည်း ရန်ကုန်ရွှေအသင်း ဥက္ကဋ္ဌ ဦးမျိုးမြင့်က ပေါ်ပြူလာနယူး(စ်) သို့ ပြောကြားထားသည်။
ပြင်ပဈေးကွက်အတွင်း၌ ကောလာဟလ သတင်းများ ဖြန့်ကာ ရွှေဈေးကစားရန် ကြိုးပမ်းမှုများ ရှိနေပြီး ယင်းသို့ မလုပ်ဆောင်ရန်လည်း ရန်ကုန်ရွှေအသင်းက ပြီးခဲ့သည့် ရက်ပိုင်းကပင် မေတ္တာရပ်ခံထားသည်။
ယခုကဲ့သို့ ပြည်တွင်း ရွှေဈေးကွက် မတည်မငြိမ်ဖြစ်နေခြင်းမှာ ကောလာဟလသတင်းများအပြင် ကမ္ဘာ့ရွှေဈေး အပြောင်းအလဲနှင့်လည်း သက်ဆိုင်နေကြောင်း ရွှေလုပ်ငန်းရှင်အချို့က သုံးသပ်သည်။
” အကြောင်းအချင်းအရာတွေကတော့ ရှိတာပေါ့လေ။ လူတွေက ဘယ်လိုဖြစ်နေလဲဆိုတော့ ကောလာဟလတွေနဲ့ ဝယ်လိုအားကို ဆွဲတင်နေတာပေါ့။ ကမ္ဘာ့ဈေး တက်တယ် ၊ နိုင်ငံရေးအပြောင်း အလဲဖြစ်မယ်တို့ ၊ လစာတိုးမယ်တို့ ၊ နောက်တစ်ခါ ကမ္ဘာစစ်ဖြစ်တော့မယ်ပေါ့ ။ စသဖြင့် အမျိုးမျိုးတွေနဲ့ ဈေးကစားဖို့ လုပ်နေတဲ့သူတွေ ရှိတာပေါ့” ဟု ရွှေလုပ်ငန်းလုပ်ကိုင်သူ တစ်ဦးက ပြောသည်။
ယနေ့ ဇန်နဝါရီ (၁၃) ရက် ရန်ကုန်ရွှေအသင်း၏ ရည်ညွှန်းဈေးနှုန်းမှာ အခေါက်ရွှေ တစ်ကျပ်သားလျင် ၂၂၃၂၀၀၀ ကျပ် ဖြစ်ပြီးကမ္ဘာ့ရွှေဈေးမှာ တစ်အောင်စလျင် အမေရိကန်ဒေါ်လာ ၁၈၉၉ ဒေါ်လာ ဖြစ်ကြောင်း သိရသည်။