မန္တလေးတိုင်းဒေသကြီး ညောင်ဦးခရိုင် အမှတ်(၅) ရပ်ကွက်အတွင်းရှိ အံ့ဖွယ်ကိုးစုံ ရွှေစည်းခုံစေတီတော် မြတ်ကြီး၏ (၉၆၄) ကြိမ်မြောက် သင်ပုတ်ပလ္လင် ပွဲတော်အား အောက်တိုဘာ (၁၈) ရက် ညနေ (၄) နာရီမှ စတင်ကာ မြို့တွင်းအပူဇော်ခံလှည့်လည်ကာ စည်ကားသိုက်မြိုက်စွာ ကျင်းပခဲ့ကြောင်း သိရသည်။
ရွှေစည်းခုံစေတီတော်မြတ်ကြီး သင်ပုတ်ပလ္လင်ပွဲတော်ကို ပုဂံညောင်ဦးဒေသရှိ တောင်သူလယ်သမားများ သီးနှံတစ်နှစ်စာ လုပ်ကိုင်ပြီးချိန် ရရှိလာသည့် သီးနှံများ ရောင်းချခြင်းမှ ဆယ်ဖို့တစ်ဖို့ လှူဒါန်းခြင်းဖြင့် နှစ်စဉ်ကျင်းပလာခဲ့ကြောင်း ရွှေစည်းခုံဘုရားဂေါပက ဥက္ကဋ္ဌ ဦးကျော်မြင့်က နိုင်ငံပိုင် သတင်းဌာနသို့ ပြောသည်။
သင်ပုတ်ပလ္လင်ပွဲတော်ကို တစ်နှစ်လျှင် နှစ်ရက် ကျင်းပပြီး ပထမနေ့တွင် ညောင်ဦးမြို့ မဏိစည်သူ ဈေးသူဈေးသားများက သစ်သီးမျိုးစုံ၊ ဝတ္ထုငွေ၊ ဆွမ်း၊ ဝတ္ထုပစ္စည်းမျိုးစုံဖြင့် ဆက်ကပ်လှူဒါန်းပြီး ဒုတိယနေ့တွင် ရပ်ကွက်များမှ ဒေသခံများက ဆက်ကပ်လှူဒါန်းကြကြောင်း သိရသည်။
အောက်တိုဘာ (၁၉) ရက်တွင် ပင့်သံဃာတော်များမှ ရွှေစည်းခုံစေတီတော်ကြီးအား ဗုဒ္ဓဘိသေက ဘုရားအနေကဇာ တင်ကာ သင်ပုတ်ပလ္လင်တင်လှူထားသည့် လှူဒါန်းမှု အစုစုအတွက် ရေစက်သွန်ချအမျှအတန်းပေးဝေမည်ဖြစ်ကြောင်း ရွှေစည်းခုံဘုရားဂေါပကအဖွဲ့မှရှင်းပြသည်။
ရွှေစည်းခုံစေတီတော်ကြီးအား အနော်ရထာမင်းကြီးနှင့် ကျန်စစ်သားမင်းကြီးတို့မှ တည်ထားကိုးကွယ်ကာ စေတီတော်မြတ်ကြီးအား ဆွမ်း၊ ပန်း၊ ရေချမ်း၊ သစ်သီး ကုသိုလ်ပြုနိုင်ရန် (ဝတ်မြေ၊ ကံကျွေးချမြေ) တို့ကိုလှူဒါန်း၍ ဝတ်မြေ၊ ကံ ကျွေးချမြေပေါ်တွင် နေထိုင်ပြီး (လယ်ယာ၊ ကိုင်းကျွန်း) လုပ်ကိုင် နေထိုင်သူ လူအများက ရရှိသောသီးနှံများကို ဆယ်ခိုင်တစ်ခိုင်(ဆယ်ဖို့တစ်ဖို့)ကို လှူဒါန်းကြသော ပွဲတော်ကြီးဖြစ်သည်။
ရွှေစည်းခုံစေတီတော်ကြီး ဘုရားပွဲတော်ကြီးကို (သင်ဘုဇ်ပလ္လင်ပွဲတော်) ယနေ့လူအများက (သမုတ်ကြီးတင်) ပွဲတော်အဖြစ် ခေါ်ကြကြောင်းသိရပြီး လာမည့် တန်ဆောင်မုန်းလပြည့်နေ့တွင်လည်း ရွှေစည်းခုံစေတီ ဗုဒ္ဓပူဇနိယ ပွဲတော်ကျင်ပရန် ရှိကြောင်း သိရသည်။
