ထိုင်း- မြန်မာနယ်စပ် မြဝတီမြို့နယ်အတွင်းရှိ ရွှေကုက္ကိုလ်မြို့သစ်တွင် ခြေကုတ်ယူကာ လုပ်ဆောင်နေသည့် အွန်လိုင်းငွေလိ-မ်လည်သည့် ကျားဖျန့်လုပ်ငန်းများအား ကရင်နယ်ခြားစောင့်တပ် (BGF) က ဝင်ရောက် ဖမ်းဆီးမှုများကို ယနေ့ နံနက်ပိုင်းတွင် စတင်လုပ်ဆောင်နေပြီဖြစ်ကြောင်း အဆိုပါတပ်၏ တာဝန်ရှိသူများထံမှ သိရသည်။
ယနေ့ ဖေဖေါ်ဝါရီ (၁၄) ရက် နံနက် (၆) နာရီအချိန်မှစတင်ကာ ရွှေကုက္ကိုလ်ဒေသရှိ ကျားဖျန့်လုပ်ငန်းများအား ဝင်ရောက်စီးနင်းကာ စစ်ဆေးဖမ်းဆီးခြင်းများ လုပ်ဆောင်နေခြင်းဖြစ်ကြောင်း ကရင်နယ်ခြားစောင့်တပ်၏ ပြောရေးဆိုခွင့်ရှိသူ ဗိုလ်မှူးနိုင်မောင်ဇော်က ပေါ်ပြူလာနယူးစ်သို့ ပြောသည်။
” မနက် (၆) နာရီလောက်မှာ စလုပ်တာပါ” ဟု ၎င်းက ဆိုသည်။
လက်ရှိတွင် တရုတ်နှင့် ထိုင်း အစိုးရ အာဏာပိုင်တို့က ရွှေကုက္ကိုလ်ဒေသရှိ ကျားဖျန့်ဂိုဏ်းများကို နှိမ်နှင်းရန် ဖိအားပေးမှုများ ဆက်တိုက်လုပ်ဆောင်နေပြီး ကရင်နယ်ခြားစောင့်တပ် ထိပ်ပိုင်းခေါင်းဆောင်များကို ဖမ်းဝရမ်းထုတ်နိုင်ရန် ထိုင်းဘက်က ပြင်ဆင်မှုများ လုပ်ဆောင်နေချိန်လည်းဖြစ်သည်။
ယင်းကဲ့သို့ ဖိအားပေးမှုများ ပြင်းထန်လာချိန်တွင် အဆိုပါဒေသရှိ ကျားဖျန့်လုပ်ငန်းများအား အရေးယူနှိမ်နှင်းမှုများ တိုးမြှင့်လုပ်ဆောင်မည်ဟု ကရင်နယ်ခြားစောင့်တပ် (BGF) ဘက်ကလည်း တရားဝင် ထုတ်ပြောထားပြီး ဖြစ်သည်။
ယင်းကဲ့သို့ အရေးယူမှုများ အရှိန်မြှင့်လုပ်ဆောင်နိုင်ရန် ပြီးခဲ့သည့် ဖေဖေါ်ဝါရီ (၁၂) ရက်က BGF ခေါင်းဆောင်များ အရေးပေါ်အစည်းအဝေးလုပ်ကာ ကျားဖျန့်နှင့်လူမှောင်ခို ပပျောက်နှိမ်နင်းရေး အထူးအဖွဲ့ (၄)ဖွဲ့ကို ဖွဲ့စည်းခဲ့သည်။
ထိုသို့ ဖွဲ့စည်းလိုက်သည့် အဖွဲ့(၄) ဖွဲ့ထဲတွင် စစ်ဆင်ရေးအဖွဲ့ (၃) ဖွဲ့ပါဝင်ပြီး ကြီးကြပ်ရေးနှင့် ပြန်လည်ပို့ဆောင်ရေးအဖွဲ့တစ်ဖွဲ့လည်း ပါဝင်ကြောင်း ကရင်နယ်ခြားစောင့်တပ် (BGF) ထံမှ သိရသည်။
ထိုသို့ ဖွဲ့စည်းပြီး (၂) ရက်အကြာ ယနေ့နံနက်ပိုင်းတွင် ရွှေကုက္ကိုလ် ဒေသရှိ တရုတ်လုပ်ငန်းရှင်များပိုင်ဆိုင်သည့် လုပ်ငန်းများကို BGF က အင်အား အလုံးအရင်းဖြင့် ဝင်ရောက်စီးနင်ကာ စစ်ဆေးခြင်း ၊ ဖမ်းဆီးခြင်းများကို တပြိုင်နက်တည်း ဆောင်ရွက်နေခြင်းဖြစ်သည်။
အဆိုပါ ကျားဖျန့် နှိမ်နှင်းရေးနှင့်ပတ်သက်၍ အသေးစိတ်အချက်အလက်များကို ပြော၍ မရသေးကြောင်းနှင့် မကြာမီသတင်း ထုတ်ပြန်ပေးသွားမည်ဖြစ်ကြောင်း ဗိုလ်မှူးနိုင်မောင်ဇော်က ပြောသည်။
” ကျွန်တော်တို့ အဲဒါကို အလုံးစုံပြီးသွားတဲ့အခါကျရင် သတင်းထုတ်ပြန်ပေးမယ်။ အခုလောလောဆယ်က အလုပ်လုပ်နေဆဲကာလဆိုတော့ ပြောရတာ နည်းနည်းခက်တယ်။ အချိန်တန်ရင် ကျွန်တော်တို့ သတင်းထုတ်ပြန်ပေးပါ့မယ်” ဟု ဗိုလ်မှူး နိုင်မောင်ဇော်က ပြောသည်။
လက်ရှိတွင် ရွှေကုက္ကိုလ် ဒေသသို့ အဝင်အထွက် လမ်းများအားလုံးကိုလည်း ပိတ်စို့ထားပြီး စစ်ဆေးမှုများကို အရှိန်အဟုန်ဖြင့် လုပ်ဆောင်နေကာ ပိတ်မိနေသည့် နိုင်ငံခြားသားများအား ထိုင်း အာဏာပိုင်များထံအပ်နှံကာ လာရာလမ်းအတိုင်း ပြန်ပို့သွားမည်ဖြစ်ကြောင်း သိရသည်။
ပြီးခဲ့သည့်ရက်ပိုင်းအတွင်းကလည်း မြဝတီမြို့နယ်အတွင်းရှိ ကျောက်ခတ်ဒေသရှိ ကျားဖျန့်လုပ်ငန်းများတွင် ပိတ်မိနေသည့် နိုင်ငံခြားသား ရာနှင့်ချီကို ဒီမိုကရေစီအကျိုးပြုကရင့်တပ်မတော် (DKBA) က ထိုင်းနိုင်ငံဘက်ခြမ်းသို့ ပို့ကာ ထိုင်းအာဏာပိုင်များထံ ပြန်လည်အပ်နှံခဲ့သေးသည်။