ရွေးကောက်ပွဲအလွန်၌ မြန်မာကို ကူညီရန် ထိုင်း အသင့်ရှိ

ထိုင်းနိုင်ငံသည် ရွေးကောက်ပွဲအလွန်၌ မြန်မာနိုင်ငံကို အာဆီယံမိသားစုအတွင်း ပြန်လည်ပေါင်းစည်းနိုင်စေရေးအတွက် ကူညီရန် ပေါင်းကူးတံတားတစ်စင်းအဖြစ် ပိုမိုတက်ကြွစွာဆောင်ရွက်နေပြီး မြန်မာအနေဖြင့်လည်း အာဆီယံနှင့် နိုင်ငံတကာအသိုက်အဝန်း၏ စိုးရိမ်မှုများအကိုတုန့်ပြန်ဆောင်ရွက်ပေးရန် တိုက်တွန်းခဲ့သည်။

ဗုဒ္ဓဟူးနေ့က ဖူးခက်တွင် နိုင်ငံခြားရေးဝန်ကြီး ဦးသန်းဆွေနှင့် ဆွေးနွေးခဲ့ပြီးနောက် ထိုင်းနိုင်ငံခြားရေးဝန်ကြီး ဆီဟာဆက် ဖူအန်ကက်ကောက ထိုင်းနိုင်ငံသည် နယ်စပ်တလျှောက် ဖြစ်ပေါ်တိုးတက်မှုများကို တိုက်ရိုက်သက်ရောက်ခံရသော ရှေ့တန်းနိုင်ငံဖြစ်သည်နှင့်အညီ ထိုင်းနိုင်ငံ၏ မူဝါဒသည် မြန်မာနှင့် တဖြည်းဖြည်းချင်း ထိတွေ့ဆက်ဆံသွားရေးဖြစ်ကြောင်း ပြောကြားခဲ့သည်။ ရည်ရွယ်ချက်မှာ မြန်မာနိုင်ငံကို အာဆီယံအသိုက်အဝန်းထဲသို့ ပြန်လည်ဆွဲခေါ်ရန်ဖြစ်ကြောင်း ၎င်းက ပြောဆိုခဲ့သည်။

မြန်မာအနေဖြင့် တိုင်းရင်းသားအုပ်စုများနှင့် ဆွေးနွေးမှုများစတင်ခြင်း၊ လူသာချင်းစာနာမှုအကူအညီများ ပိုမိုရောက်ရှိစေခြင်းနှင့် အရပ်သားများအပေါ် တိုက်ခိုက်ခြင်းများကို ရှောင်ရှားခြင်းအပါအဝင် လက်တွေ့ကျသော တိုးတက်မှုများကို ပြသရန် ဘန်ကောက်က တောင်းဆိုထားသည်ဟု ၎င်းက ပြောသည်။

ဤနယ်ပယ်များတွင် အဓိပ္ပာယ်ရှိသော မည်သည့်ခြေလှမ်းတိုင်းမဆိုကို အပြုသဘောအချက်ပြမှုအဖြစ် ရှုမြင်ကြလိမ့်မည်ဖြစ်ကြောင်း မစ္စတာဆီဟာဆက်က ပြောကြားခဲ့ပြီး လွန်ခဲ့သည့် ငါးနှစ်အတွင်း အာဆီယံဘုံသဘောတူညီချက် ငါးရပ်သည် အကောင်အထည်ဖော်နိုင်မှု နည်းပါးခဲ့ကြောင်း ထောက်ပြခဲ့သည်။

ဆွေးနွေးမှုများအတွင်း အဆိုပြုချက်များအပေါ် မြန်မာဘက်က အပြုသဘောဆောင်သော တုန့်ပြန်မှုကို ပြသခဲ့ကြောင်းလည်း ၎င်းက ဆက်လက်ပြောကြားခဲ့သည်။

နှစ်ဖက်စလုံးသည် အွန်လိုင်းအလိမ်အညာဂိုဏ်းများနှင့် မူးယစ်ဆေးဝါးရောင်းဝယ်မှုများကို ကိုင်တွယ်ဖြေရှင်းရာတွင် ပူးပေါင်းဆောင်ရွက်မှုကို မြှင့်တင်ရန်လည်း သဘောတူခဲ့ကြသည်။ နှစ်နိုင်ငံအကြား အဓိကကုန်သွယ်ရေးဝင်ပေါက်ဖြစ်သော မဲဆောက်-မြဝတီစစ်ဆေးရေးဂိတ်တွင် အထူးသဖြင့် နယ်စပ်ဖြတ်ကျော်ကုန်သွယ်မှုကို ပြန်လည်အသက်သွင်းရေးကိုလည်း ဆွေးနွေးခဲ့ကြကြောင်း သိရသည်။

Ref: ဘန်ကောက်ပို့စ်