ရွေးကောက်ပွဲရလဒ်အရပေါ်ပေါက်လာမည့်အစိုးရသည် ပြည်သူများ၏လိုအပ်ချက်များကိုဖြည့်ဆည်းပေးရမည်ဟု အမျိုးသားစီမံကိန်းကော်မရှင်ဥက္ကဋ္ဌ၊ နိုင် ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မတ် ၆ ရက်နံနက်ပိုင်းကကျင်းပသည့် အမျိုးသားစီမံကိန်းကော်မရှင်၏ (၁/၂၀၂၆)အစည်းအဝေးတွင် ပြောကြားခဲ့ခြင်းဖြစ်သည်။
” စီးပွားရေး၊ ပညာရေး၊ ကျန်းမာရေးတိုးတက်ကောင်း မွန်စေဖို့နဲ့ တည်ငြိမ်အေးချမ်းရေးဟာ ပြည်သူအားလုံးရဲ့လိုလားချက်တွေဖြစ်တာကြောင့် ရွေးကောက်ပွဲရ လဒ်အရပေါ်ပေါက်လာမယ့် အစိုးရတစ်ရပ်အနေနဲ့ ပြည်သူတွေရဲ့လိုအပ်ချက်တွေကို ဖြည့်ဆည်းပေးရပါမယ်”ဟု နိုင်ငံတော် ယာယီသမ္မတက ပြောသည်။
မကြာမှီ အစိုးရသစ်မှ နိုင်ငံ့တာဝန်လွှဲပြောင်းယူမည်ဖြစ်၍ ၂၀၂၁ ခုနှစ်မှစပြီး ဘဏ္ဍာရေးနှစ်အလိုက်ဆောင်ရွက်ပေးခဲ့သည့် လုပ်ငန်းများနှင့် စီမံကိန်းများကိုပြီးပြတ်အောင်ဆောင်ရွက်ရမည်ဖြစ်ကာ ယခင်ကာလအဆက်ဆက်ကဆောင်ရွက်နေသည့် စီမံကိန်းများ ဆက်လက်အကောင်အထည်ဖော်နေသည်ကိုလည်း စနစ်တကျလွှဲပြောင်းပေးရမည်ဟု မှာကြားသည်။
နိုင်ငံ့အနာဂတ်ကောင်းမွန်ရေးအတွက် ပညာရေးတွင်ခေတ်မီပြီး အရည်အသွေးမြင့်မားသည့် ပညာရေးစနစ်ဖြစ်စေရန် အခြေခံကောင်းများချမှတ်ပေးထားပြီးဖြစ်ရာ ယင်း အခြေခံကောင်းများကို လက်ဆင့်ကမ်းထိန်းသိမ်းပြီး ပညာရေးကဏ္ဍတိုးတက်အောင်မြှင့်တင် ဆောင်ရွက်ရမည်ဖြစ်ပြီး ကျန်းမာရေးတွင်လည်း ဝန်ဆောင်မှုကောင်းများရရှိရန်၊ လိုအပ်သည့်အခြေခံအ ဆောက်အအုံများတိုးတက်ရေး၊ ဆေးဝါးနှင့် စက်ကိရိယာများပြည့်စုံစွာရရှိရေးနှင့် အခြေခံကျန်းမာရေးစောင့်ရှောက်မှုရရှိရန်တို့ကိုလည်း ကြိုးပမ်းဆောင်ရွက်ပေးလျက်ရှိသည်ဟု ပြောသည်။
ထို့ပြင် အတည်ပြုခဲ့သည့် ၂၀၂၆-၂၀၂၇ ဘဏ္ဍာရေးနှစ် အမျိုးသားစီမံကိန်းအကောင်အထည်ဖော်ရာတွင် လွှတ်တော်အသီးသီး၏ သဘောတူညီချက်ဖြင့်ဆောင် ရွက်ရမည်ဖြစ်ရာ အစိုးရ၊ ဌာနများအနေဖြင့် စီမံကိန်းဆိုင်ရာ အင်္ဂါရပ်များနှင့် ညီညွတ်ရန် အဆင့်ဆင့်ကြီးကြပ်ဆောင်ရွက်ရမည်ဖြစ်ကာ စီမံကိန်းများ အကောင် အထည်ဖော်ရာ၌ ခေတ်ကာလအလိုက်တွေ့ကြုံရသည့် အားနည်းချက်၊ အားသာချက်များကို သင်ခန်းစာယူပြီး လက်တွေ့ကျကျ ပေါင်းစပ်ဆောင်ရွက်နိုင်ရန်၊ ပြည်သူများ၏လိုအပ်နေသည့် ဖွံ့ဖြိုးမှုရည်မှန်းချက်များ ပြည့် မီစေရန်နှင့် နောင်တာဝန်ယူကြမည့် အစိုးရထံစနစ်တ ကျလွှဲပြောင်းပေးနိုင်ရေးဆောင်ရွက်ရမည်ဟု နိုင်ငံတော် ယာယီသမ္မတက မှာကြားခဲ့သည်။