မကြာမှီကျင်းပမည့် ပါတီစုံဒီမိုကရေစီအထွေထွေ ရွေးကောက်ပွဲမဖြစ်မြောက်စေရန် ပြည်တွင်း/ပြည်ပမှ
အဖျက်အမှောင့်လုပ်ရပ်များရှိလာနိုင်သည်ဟု နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ သြဂုတ် ၁၂ ရက်နံနက်ပိုင်းကကျင်းပသည့် နိုင် ငံတော်လုံခြုံရေးနှင့် အေးချမ်းသာယာရေးကော်မရှင်အစည်းအဝေးတွင် ပြောသည်။
” ရွေးကောက်ပွဲဖြစ်မြောက်မှုမရှိစေဖို့ ပြည်တွင်း၊ ပြည်ပက အဖျက်အမှောင့်လုပ်ရပ်တွေလုပ်ဆောင်လာမယ့်သူတွေ၊ အဖွဲ့အစည်းတွေလည်း ရှိနိုင်မှာဖြစ်ပါတယ်။ ရွေးကောက်ပွဲအောင်မြင်မှုမရှိစေဖို့ကို နည်းလမ်းပေါင်းစုံနဲ့ လုပ်ဆောင်လာနိုင်ပါတယ်”ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
ထို့ပြင် ပြည်ပနိုင်ငံများအနေဖြင့် မြန်မာနိုင်ငံ၌ ပါတီစုံဒီမို ကရေစီအထွေထွေရွေးကောက်ပွဲကျင်းပမည့်အပေါ် ထောက်ခံအားပေးသည့်၊ အပြုသဘောဆောင်သည့် နိုင်ငံများရှိသကဲ့သို့ ရွေးကောက်ပွဲအပေါ် စောဒကတက်သည့်နိုင်ငံများလည်းရှိနိုင်မည်ဖြစ်ရာ ကျင်းပမည့်ရွေးကောက်ပွဲသည် လွတ်လပ်၍တရားမျှတသည့် ရွေးကောက်ပွဲတစ်ရပ်ဖြစ်စေရေး၊ မသမာမှုကင်းရှင်းသည့် ရွေးကောက်ပွဲဖြစ်စေရေးဆောင်ရွက်ရမည်ဟု ပြောသည်။
နိုင်ငံရေးပါတီများမဲစည်းရုံးနိုင်ရေးစီစဉ်ဆောင်ရွက်ပေးရန်၊ ပါတီရုံးဖွင့်ခွင့်များရရှိရေး၊ ပါတီဝင်ခွင့်ရှိသူများ ပါတီဝင်ခွင့်ရရှိရေးတို့ကိုဆောင်ရွက်ပေးရန်၊ ပါတီ ၂ ပါတီ၊ ၃ ပါတီထပ်၍ ပါတီဝင်များ ဖောင်းပွမှုမရှိစေရေးအတွက်စိစစ်ကြပ်မတ်ရန်လည်း ပြောကြားခဲ့သည်။
လွှတ်တော်ကိုယ်စားလှယ်လောင်းအရည်အချင်းသတ်မှတ်ချက်များကိုလည်း စနစ်တကျစိစစ်ကြပ်မတ်ရန်၊ ကိုယ်စားလှယ်လောင်းများ မဲဆွယ်စည်းရုံးချိန်တွင် ၎င်းတို့၏ လုံခြုံရေးအတွက်စီစဉ်ဆောင်ရွက်ပေးရန်၊ သတ်မှတ်ထားသည့် အချိန်ကာလအ တွင်း သက်ဆိုင်ရာမြို့နယ်များအလိုက် ဆန္ဒမဲပေးနိုင်ရေးအတွက် လုံခြုံရေးအရ အာမခံချက်ရှိအောင်ဆောင်ရွက်ရန်တို့ကိုလည်း ပြောကြားခဲ့သည်။
ထို့ပြင် ဗိုလ်ချုပ်မှူးကြီးမင်းအောင်လှိုင်မှ မဲမသမာမှုမရှိစေရေးအတွက် မြန်မာအီလက်ထရောနစ်မဲပေးစက်များကို ငွေကြေးအကုန်အကျခံ၍ ဆောင်ရွက်ထားသည်ဟုလည်း ပြောကြားခဲ့သည်။