တစ်နိုင်ငံလုံးအတိုင်းအတာဖြင့်ကျင်းပမည့် ပါတီစုံဒီမိုကရေစီအထွေထွေရွေးကောက်ပွဲတွင် ရှမ်းနှင့်တိုင်းရင်းသားများဒီမိုကရက်တစ်ပါတီ(ကျားဖြူပါတီ)မှ မြို့နယ်ပေါင်း ၂၀၆ မြို့နယ်၌ဝင်ရောက်ယှဥ်ပြိုင်သွားမည်ဟု ပါတီဥက္ကဋ္ဌဦးစိုင်းအိုက်ပေါင်းက ယနေ့ နေ့လယ်၌ အလုံရှိ ပါတီရုံးချုပ်တွင် မီဒီယာများနှင့်တွေ့ဆုံစဥ်ပြောသည်။
“ကျွန်တော်တို့ အဓိက ရန်ကုန်တိုင်းမှာဆိုရင် ၄၅ မြို့နယ်ဝင်ပြိုင်မယ် ဧရာဝတီတိုင်းမှာ ၂၆ မြို့နယ်၊ ပဲခူးတိုင်းနဲ့မန္တလေးတိုင်းမှာ ၂၈ မြို့နယ်စီ မကွေးတိုင်းမှာ ၂၅ မြို့နယ် နေပြည်တော်မှာ ၈ မြို့နယ် ရှမ်းပြည်နယ်မှာ ၄၆ မြို့နယ် ဝင်ပြိုင်သွားမှာပါ”ဟု ကျားဖြူပါတီ ဥက္ကဋ္ဌဦးစိုင်းအိုက်ပေါင်းကပြောသည်။
ရှမ်းပြည်နယ်၌ မြို့နယ်ပေါင်း ၅၅ မြို့နယ်အနက် ၄၆ မြို့နယ်သာ ဝင်ရောက်ယှဥ်ပြိုင်မည်ဖြစ်ကာ ၉ မြို့နယ်ခန့်အား ယှဥ်ပြိုင်မည်မဟုတ်ဟု ပါတီ ဥက္ကဋ္ဌဦးစိုင်းအိုက်ပေါင်း၏ ပြောကြားချက်အရ သိရသည်။
“ဝ”ကိုယ်ပိုင်အုပ်ချုပ်ခွင့်ရဒေသမှာ ၂၀၁၀ ပြည့်နှစ်ထဲက ရွေးကောက်ပွဲလုပ်လို့မရဘူး။ ကိုးကန့်ကိုယ်ပိုင်အုပ်ချုပ်ခွင့်ရဒေသက ၂ မြို့နယ်မှာလည်း ဝင်ရောက်ယှဥ်ပြိုင်မှာ မဟုတ်ပါဘူး။ ပအိုဝ်းကိုယ်ပိုင်အုပ်ချုပ်ခွင့်ရဒေသနဲ့ဓနုကိုယ်ပိုင်အုပ်ချုပ်ခွင့်ရဒေသတွေမှာတော့ ဝင်ပြိုင်သွားပါမယ်”ဟု ကျားဖြူပါတီ ဥက္ကဋ္ဌဦးစိုင်းအိုက်ပေါင်းကပြောသည်။
ထို့ပြင် နိုင်ငံရေးပါတီများမှတ်ပုံတင်ရာတွင် UEC မှသတ်မှတ်ထားသည့် ပါတီဝင် ၁ သိန်းရှိရမည်ဆိုသည့် သတ်မှတ်ချက်မှာ ကျားဖြူပါတီအတွက် အခက်အခဲတစ်စုံတစ်ရာမရှိဟုလည်း ပါတီ ဥက္ကဋ္ဌဦးစိုင်းအိုက်ပေါင်းကဆိုသည်။
“ပါတီဝင် ၁ သိန်းဆိုတာက ပြဿနာမရှိပါဘူး။ ကျွန်တော်တို့ကျားဖြူပါတီက အရင်ထဲက ပါတီဝင် ၂ သိန်းကျော်ရှိတယ် ။မြို့နယ်ပေါင်း ၁၆၅ မြို့နယ်မှာ ရုံးခန်းတွေဖွင့်ရမယ်ဆိုတာကလည်း ကျွန်တော်တို့က ရှမ်းပြည်နယ်မှာတင် ရုံးခန်းပေါင်း ၄၀ ကျော်အဆင်သင့်ရှိထားပြီးပါပြီ။ ကျားဖြူပါတီက ရုံးခန်း ၁၆၅ ရုံးလုံးဖွင့်သွားနိုင်မှာပါ” ဟု ကျားဖြူပါတီ ဥက္ကဋ္ဌဦးစိုင်းအိုက်ပေါင်းကပြောသည်။
ကျားဖြူပါတီအနေဖြင့် လက်ရှိအချိန်၌ တိုင်းရုံးများအား ဖွင့်လှစ်လျက်ရှိကာ ပါတီရုံးခန်းများဖွင့်လှစ်ရာတွင် လုံခြုံရေးအခြေအနေမကောင်းသည့် မြို့နယ်များတွင် ရုံးခန်းဖွင့်လှစ်ရန် အခက်အခဲသာရှိသည်ဟု ပါတီ ဥက္ကဋ္ဌဦးစိုင်းအိုက်ပေါင်း၏ ပြောကြားချက်အရ သိရသည်။
