မန္တလေးတိုင်း၊မြင်းခြံမြို့နယ်၊ကျီးပင်ကန်ကျေး ရွာနေ အမျိုးသား ၂ ဦးနှင့်အမျိုးသမီး ၁ ဦးတို့အား လက်နက်ကိုင်အဖွဲ့ဝင်များက မတ် ၁၂ ရက် (ယနေ့)နံနက်က ဖမ်းဆီးခေါ်ဆောင်သွားပြီးနောက် သေနတ်ဖြင့်ပစ်သတ်ခံခဲ့ရကြောင်း သိရသည်။
ယနေ့နံနက် ၁၁ နာရီ ၅၀ မိနစ်ခန့်က လက်နက်ကိုင်အဖွဲ့ဝင် ၇ ဦးသည် မြင်းခြံမြို့နယ်၊ကျီးပင်ကန်ကျေးရွာသို့ရောက်ရှိလာပြီးနောက် ကျေးရွာနေ ဦးညွှန့်ဇော်(၄၅)နှစ်၊ဦးကျော်ဌေး(၆၅)နှစ်နှင့်ဒေါ်ခင်အေး(၆၅)နှစ်တို့အား ဖမ်းဆီးခေါ်ဆောင်သွားခဲ့ကြသည်။
ကျီးပင်ကန်ကျေးရွာ မြောက်ဘက်အထွက်အရောက် ဖမ်းဆီးခေါ်ဆောင်လာသူ ၃ ဦးအား သေနတ်ဖြင့်ပစ်ခတ်သတ်ဖြတ်ပြီးနောက် ထွက်ခွာသွားခဲ့ကြကြောင်း သိရသည်။
ဦးညွှန့်ဇော်၏ နဖူးတွင်ကျည်ဖောက်ဝင်၊ဦးကျော်ဌေး၏ နဖူးနှင့်ပါးစပ်တို့တွင်ကျည်ဖောက်ဝင်နှင့် ဒေါ်ခင်အေး၏ ဦးခေါင်းတွင်ကျည်ဖောက်ဝင်ဒဏ်ရာများရရှိကာ အခင်းဖြစ်ရာနေရာ၌သေဆုံးသွားခဲ့ကြောင်း သိရသည်။
“ဖြစ်စဥ်သိသိချင်းကယ်တင်ဖို့ကြိုးစားခဲ့ပါတယ် သေဆုံးတဲ့လူတွေနားကနေ 9 mm Luger ကျည်ခွံတွေသိမ်းဆည်းရမိခဲ့ပါတယ် သေဆုံးသူ ၃ ယောက်မှာ ဦးညွှန့်ဇော်က စျေးရောင်းတယ်။ ဦးကျော်ဌေးက တောင်သူ ၊ဒေါ်ခင်အေးကတော့ မှီခိုပေါ့ ။ပိတ်ဆို့စစ်ဆေးတာတွေလုပ်နေပါတယ်”ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။