ရေဘေးကယ်ဆယ်‌ရေးလုပ်ငန်းများကို အာရုံစိုက်ကြရန်အန်ဝါအမိန့်ပေး

မလေးရှားနိုင်ငံတွင် နိုဝင်ဘာ ၂၉ ရက်၌ ရေဘေးဒဏ်ကြုံရသည့် ပြည်နယ် ၉ ခုအထိ ရှိနေကာ ကီလန်တန်ပြည်နယ်သည် အဆိုးဝါးဆုံးအခြေအနေဖြစ်နေပြီး ရေကြီးရေလျှံမှုများကြောင့် နေအိမ်ကိုစွန့်ခွာရသူပေါင်း ၁၀၃,၀၀၀ ခန့်ရှိလာသည်။

အစိုးရကိန်းဂဏန်းများအရ နိုဝင်ဘာ ၂၉ ရက် ည ၉ နာရီအချိန်အထိ ရေဘေးလွတ်ရာ သို့ကယ်ဆယ်ခဲ့ရသူများတွင် အရှေ့ပိုင်းကမ်းရိုးတန်း ကီလန်တန်ပြည်နယ်မှ ၇၄ ရာခိုင်နှုန်းနှင့် တာရန်ဂါနုပြည်နယ်မှ ၁၉ ရာခိုင်နှုန်းပါဝင်ကြောင်း သိရသည်။

ကျန်ရှိသော ၇ ရာခိုင်နှုန်းသည် နိုင်ငံမြောက်ပိုင်း၊ အလယ်ပိုင်းနှင့် တောင်ပိုင်းပြည်နယ်များမှဖြစ်သည်ဟု ဆိုသည်။

ဆိုးဝါးသော ရေလွှမ်းမိုးမှုကြောင့် ဝန်ကြီးချုပ် အန်ဝါ အီဘရာဟင်သည် အစိုးရဝန်ကြီးများ၊ ဒုတိယဝန်ကြီးများအားလုံး၏ ခွင့်ခံစားမှုများကို ရပ်ဆိုင်းကာ ရေဘေးကယ်ဆယ်ရေးလုပ်ငန်းများကို အာရုံစိုက်ရန် ၎င်းတို့ကို ညွှန်ကြားခဲ့သည်။      

“ဝန်ကြီးတွေအားလုံးကို အခုမြေပြင်ကိုသွားဖို့ ညွှန်ကြားထားတယ်၊ ဟုတ်ပါတယ် သူတို့ခွင့်ရက်တွေကို ရပ်ဆိုင်းလိုက်ပါပြီ” ဟု အန်ဝါက ပြောဆိုကြောင်း သည်စတားသတင်းဌာနက ဖော်ပြခဲ့သည်။

ကီလန်တန်ပြည်နယ်ကို သွားရောက်ခဲ့သည့် ဒုတိယဝန်ကြီးချုပ် ဇာဟစ် ဟာမီဒီက ရေဘေးလွတ်ရာ သို့ ကယ်ဆယ်ပေးရသူ အရေအတွက် တိုးလာနေကြောင်းနှင့် ရေလွှမ်းမိုးမှုသည် ၂၀၁၄ ခုနှစ်က ကီလန်တန်တွင် လူဦးရေ ၂ သိန်းကျော်အထိ ရေဘေးရှောင်ခဲ့ရသော ရွှံ့ရေလွှမ်းမိုးမှုခေါ် ရေဝါလွှမ်းမိုးမှုထက် အခြေအနေပိုဆိုးကြောင်း ပြောဆိုခဲ့သည်။

မြေပြင်တွင် ယာယီတဲများ ပြတ်လပ်နေကြောင်းနှင့် အခြားပြည်နယ်များရှိ ယာယီတဲများကို ကီလန်တန်သို့ ပို့ဆောင်ပေးရန် အမျိုးသားသဘာဝဘေးအေဂျင်စီကို သူ ညွှန်ကြားထားကြောင်း ဇာဟစ်က သတင်းထောက်များကို ပြောဆိုသည်။

ရေဘေးရှောင်ရသူများကို အများအားဖြင့် စာသင်ကျောင်းများ၊ ပြည်သူ့ခန်းမများတွင် နေရာချထားပြီး ၎င်းတို့သည် သေးငယ်သော ယာယီတဲများတွင် ရေများပြန်ကျသည့်အချိန်အထိ အိပ်စက်နေထိုင်ကြရသည်။

ဆည်မြောင်းနှင့် ရေနုတ်မြောင်းဦးစီးဌာန၏ နိုဝင်ဘာ ၂၉ ရက်တွင် ထုတ်ပြန်ခဲ့သော ကိန်းဂဏန်းများအရ ကီလန်တန်ပြည်နယ်ရှိ မြစ်ကြောင်းများတွင် ရေအမှတ်အသား ၂၇ ခုရှိသည့်အနက် ၁၇ ခုတွင် စိုးရိမ်ရေမှတ်အထက် ကျော်လွန်နေသည်ဟု ဆိုသည်။ အဆိုပါပြည်နယ်၏ အဓိကမြစ်နှစ်စင်းသည် မြစ်ရေလျှံနေခဲ့ပြီဟုလည်း သိရသည်။

Ref: သည်စထရိတ်တိုင်းမ်စ်