အမေရိကန်နိုင်ငံခြားရေးဝန်ကြီး မာကို ရူဘီယိုသည် ကွာလာလမ်ပူတွင် ကျင်းပနေသည့် အာဆီယံနိုင်ငံခြားရေးဝန်ကြီးများ အစည်းအဝေး ပြင်ပတွေ့ဆုံမှုအဖြစ် ကြာသပတေးနေ့တွင် ရုရှားနိုင်ငံခြားရေးဝန်ကြီး ဆာဂီ လက်ဗရော့ဗ်နှင့် တွေ့ဆုံသွားမည်ဖြစ်ကြောင်း အမေရိကန်နိုင်ငံခြားရေးဌာန အကြီးတန်း အရာရှိတစ်ဦးက ပြောကြားသည်။
ယခုတွေ့ဆုံမှုသည် ရူဘီယိုနှင့် လက်ဗရော့ဗ် တို့၏ ဒုတိယအကြိမ်မြောက် လူချင်းတွေ့ဆုံမှုဖြစ်မည်ဖြစ်ကာ ယူကရိန်းစစ်ပွဲအရေးနှင့် ပတ်သက်၍ အမေရိကန်သမ္မတ ဒေါ်နယ်ထရမ့်ပ်က ရုရှားသမ္မတ ဗလာဒီမာပူတင်ကို ဘဝင်မကျမှု ရေချိန်မြင့် နေချိန်တွင် တွေ့ဆုံမှုဖြစ်သည်။
ပြီးခဲ့သည့် ဖေဖော်ဝါရီလအတွင်းက ဆော်ဒီအာရေဗျနိုင်ငံတွင် ၎င်းတို့နှစ်ဦး ပထမဆုံးအကြိမ်တွေ့ဆုံခဲ့ကြကာ ထရမ့်ပ်အစိုးရအဖွဲ့က ရုရှားနှင့် အပြန်အလှန်ဆက်ဆံရေး ပြန်လည်ထူထောင်ရန်နှင့် စစ်ပွဲအဆုံးသတ်ရေး ညှိနှိုင်းဆွေးနွေးမှုကို အထောက်အကူဖြစ်စေရန် ကြိုးပမ်းမှု၏ တစ်စိတ်တစ်ပိုင်းအဖြစ် တွေ့ခဲ့ကြခြင်းဖြစ်သည်။
ရာထူးတာဝန်ထမ်းဆောင်ပြီးနောက်ပိုင်း ၎င်း၏ ပထမဆုံး အာရှခရီးစဉ်အဖြစ် ကွာလာလမ်ပူတွင် ရောက်ရှိနေသည့် ရူဘီယိုသည် အာဆီယံအဖွဲ့ဝင် ၁၀ နိုင်ငံနှင့် မလေးရှားအစိုးရအဖွဲ့ အကြီးတန်းအရာရှိများနှင့် တွေ့ဆုံသွားမည်ဖြစ်သည်။
ယခုခရီးစဉ်သည် အမေရိကန်ပြည်ထောင်စု၏ အင်ဒို-ပစိဖိတ်ဒေသကို ပြန်လည်အာရုံစိုက်ရန် ကြိုးပမ်းမှုတစ်စိတ်တစ်ပိုင်းဖြစ်သကဲ့သို့ ထရမ့်ပ်အစိုးရအဖွဲ့က များစွာအာရုံစိုက်ထားသည့် အရှေ့အလယ်ပိုင်းနှင့် ဥရောပ ပဋိပက္ခများကို ကျော်လွန်၍ ဤဒေသကို အာရုံစိုက်ခြင်းလည်းဖြစ်သည်။
Ref: သည်အီကော်နောမစ်တိုင်းမ်စ်