မော်စကို၊ဒီဇင်ဘာ ၂
ရုရှားသမ္မတဗလာဒီမာပူတင်သည် အိန္ဒိယ နိုင်ငံ ဝန်ကြီးချုပ်၏ဖိတ်ကြားချက်အရ အိန္ဒိယနိုင်ငံသို့သွားရောက်မည်ဖြစ်ကြောင်း ခရမ်မလင်၏သတင်းထုတ်ပြန်ချက်အရသိရသည်။
သမ္မတပူတင်၏ အိန္ဒိယသို့သွားမည့်ရက်ကို လာမည့်နှစ်ဆန်းတွင် တရားဝင်ထုတ်ပြန်ကြေငြာမည်ဖြစ်ကာ ပူတင်သည် ရုရှား – ယူကရိန်းအရေးစပြီးကတည်းက အိန္ဒိယသို့ပထမဆုံးအကြိမ်သွားရောက်ခြင်းလည်းဖြစ်သည်။
“နှစ်ဖက်ခေါင်းဆောင်တွေကြားမှာ တစ်နှစ်တစ်ကြိမ် တွေ့ဆုံဆွေးနွေးဖို့သဘောတူညီချက်ရှိပါတယ်၊ဒီနှစ်ကတော့ ရုရှားခေါင်းဆောင်က အိန္ဒိယကိုသွားရမဲ့အလှည့်ဖြစ်ပြီး အိန္ဒိယဝန်ကြီးချုပ်ကလည်းဖိတ်ကြားထားပါတယ်” ဟု ခရမ်မလင်ကထုတ်ပြန်ခဲ့သည်။
မကြာသေးမီက ရုရှား၌ပြုလုပ်ခဲ့သည့် BRICS ထိပ်သီးအစည်းအဝေး၌လည်း မိုဒီက ရုရှားသမ္မတကို ၎င်းအနေဖြင့် ယခုဖြစ်ပေါ်နေသော ပဋိပက္ခများ ငြိမ်းချမ်းစွာအဆုံးသတ်နိုင်ရေးအတွက် ကူညီပေးရန်အဆင်သင့်ရှိနေသည်ဟုပြောကြားခဲ့သည်။
ယင်းနောက်မိုဒီသည် ယူကရိန်းသို့လည်းသွားကာ သမ္မတဇလန်းစကီးနှင့်တွေ့ဆုံခဲ့ပြီး ပူတင်နှင့်မျက်နှာချင်းဆိုင်တွေ့ဆုံဆွေးနွေးကာ ပဋိပက္ခကိုအဆုံးသတ်ရန်တိုက်တွန်းခဲ့သည်ဟုလည်းသိရသည်။
ခရမ်မလင်၏ထုတ်ပြန်ချက်အရ အိန္ဒိယနှင့်ရုရှားခေါင်းဆောင်များသည် အဆက်အသွယ်အမြဲလိုလိုရှိကြပြီး နှစ်လတစ်ကြိမ်ဖုန်းပြောလေ့ရှိကာ BRICS ထိပ်သီးအစည်းအဝေးမတက်မီ ပြီးခဲ့သည့်ဇူလိုင်လကလည်း မိုဒီသည်ရုရှားသို့သွားခဲ့သေးသည်။
Source : သည်အင်ဒီးယန်းအိတ်စ်ပရက်စ်