ရုရှားကို ကမ္ဘာ့ထိပ်တန်းရေကြောင်း အင်အားကြီးနိုင်ငံအဖြစ် ပြန်လည်တည်ဆောက်ရန် ရည်ရွယ်သော ရေရှည် ရေတပ်မဟာဗျူဟာအစီအစဉ်သစ်ကို ရုရှားသမ္မတ ဗလာဒီမာပူတင်က အတည်ပြုလိုက်ကြောင်း ခရမ္မလင် လက်ထောက်အရာရှိ တစ်ဦးဖြစ်သည့် နီကိုလိုင် ပါထရူရှက်ဗ်က ပြောကြားခဲ့သည်။
“၂၀၅၀ ပြည်နှစ်အထိ ရုရှားရေတပ် ဖွံ့ဖြိုးတိုးတက်ရေး မဟာဗျူဟာ” ဟု အမည်ပေးထားသည့် အဆိုပါ မဟာဗျူဟာအစီအစဉ်ကို မေလနှောင်းပိုင်းတွင် ပူတင်က လက်မှတ်ရေးထိုးခဲ့သည်ဟု တနင်္လာနေ့က ထုတ်လွှင့်ခဲ့သော ArgumentiI Fakti သတင်းစာနှင့် အင်တာဗျူးတွင် ပါထရူရှက်ဗ်က ထုတ်ဖော်ပြောဆိုခဲ့သည်။
“ကမ္ဘာ့အကြီးကျယ်ဆုံး ရေကြောင်းအင်အားကြီးနိုင်ငံတွေထဲက တစ်ခုဖြစ်တဲ့ ရုရှားနိုင်ငံရဲ့ အနေအထားက တဖြည်းဖြည်း ပြန်ကောင်းမွန်လာပါပြီ”ဟု ပူတင်၏ ကာလကြာရှည် တွဲဖက်ဖြစ်သူ ကေဂျီဘီ အရာရှိဟောင်း ပါထရူရှက်ဗ်က ပြောသည်။ ရေတပ်စွမ်းဆောင်ရည် ဖွံ့ဖြိုးတိုးတက်ရေးသည် ကမ္ဘာလုံးဆိုင်ရာ ရေကြောင်းစနစ်အပြောင်းအလဲများ၊ ထွက်ပေါ်လာသော ခြိမ်းခြေ-ာက်မှုများအပေါ် ကျယ်ပြန့်သော မျှော်မှန်းချက်များနှင့် ရုရှားရေတပ်အတွက် တိကျသေချာသော ရည်မှန်းချက်များ ထားရှိခြင်းမရှိဘဲ ရှေ့ဆက်၍ မရနိုင်ကြောင်း ၎င်းက အလေးပေးပြောကြားခဲ့သည်။
ပါထရူရှက်ဗ်က မဟာဗျူဟာ၏ အသေးစိတ်အချက်များကို ဖေါ်ထုတ် ပြောကြားခြင်း မရှိခဲ့သော်လည်း ကမ္ဘာ့သမုဒ္ဒရာများအတွင်း တိုးတက်နေသော လုံခြုံရေးဒိုင်းနမစ် အရွေ့များကြားတွင် ရေရှည်စီမံကိန်းရေးဆွဲခြင်း၏ အရေးပါမှုကို အလေးပေးပြောကြားခဲ့သည်။ ရုရှားနိုင်ငံအနေဖြင့် ၎င်း၏ ကာကွယ်ရေးနှင့် လုံခြုံရေးအသုံးစရိတ်ကို တိုးမြှင့်ခဲ့ပြီး ဂျီဒီပီ၏ အချိုးအစားအားဖြင့် စစ်အေးကာလအဆင့်များကို နီးကပ်လာကြောင်းလည်း ပါထရူရှက်ဗ်က ပြောကြားခဲ့သည်။
ရေတပ်အင်အားအရ အမေရိကနှင့် တရုတ်တို့နောက်တွင် ရပ်တည်နေသော်လည်း နျူကလီးယားစွမ်းအင်သုံး ပဲ့ထိန်းဒုံးတပ် ရေငုပ်သင်္ဘော ၁၄ စီးအပါအဝင် ရေငုပ်သင်္ဘော ၇၉ စီး၊ စစ်သင်္ဘော ၂၂၂ စီးတို့ဖြင့် ရုရှားသည် ကမ္ဘာအကြီးဆုံး ရေတပ်မများထဲမှ တစ်ခုအဖြစ် ရှိနေဆဲဖြစ်သည်။ နိုင်ငံ၏ အဓိက ရေတပ်ဖွဲ့သည် ဘာရန့်စ်ပင်လယ်ပြင်ရှိ ဆီဗာရိုမော်ဆက်တွင် အခြေစိုက်သော မြောက်ပိုင်းတပ်မဟာဖြစ်သည်။
Ref: Arise News