ရုရှားနိုင်ငံပိုင် ရိုဆာတမ် (Rosatom) ၏ လက်အောက်ခံဖြစ်သော ရိုဆာတမ် စွမ်းအင် အပြည်ပြည်ဆိုင်ရာ ကုမ္ပဏီ (Rosatom Energy International JSC – REIN JSC) နှင့် ဗီယက်နမ်နိုင်ငံ၏ လျှပ်စစ်အင်ဂျင်နီယာ အတိုင်ပင်ခံ ကုမ္ပဏီ ၂ (Power Engineering Consulting JSC 2 – PECC2) တို့သည် နားလည်မှုစာချွန်လွှာ (MoU) တစ်စောင်ကို စက်တင်ဘာလ ၂၆ ရက်နေ့က လက်မှတ်ရေးထိုးခဲ့ကြရာ၊ ယင်းသည် ဗီယက်နမ်နိုင်ငံရှိ နင်းသူယန် ၁ (Ninh Thuận 1) နျူကလီးယားစွမ်းအင်သုံး ဓာတ်အားပေးစက်ရုံ စီမံကိန်းတွင် ပူးပေါင်းဆောင်ရွက်ရန် လမ်းဖွင့်ပေးလိုက်ခြင်းဖြစ်သည်။
စာချုပ်ပါ အဓိက အချက်များ
ဤနားလည်မှုစာချွန်လွှာသည် ဗီယက်နမ်၏ ပထမဆုံးသော နျူကလီးယား ဓာတ်အားပေးစက်ရုံ ဖြစ်လာမည့် နင်းသူယန် ၁ အတွက် ဖြစ်မြောက်နိုင်ခြေ လေ့လာဆန်းစစ်မှု(feasibility study) နှင့် လုပ်ငန်းခွင်(site)ဆိုင်ရာ စာရွက်စာတမ်းများ ကို ခေတ်မီအောင် ပြန်လည်ပြင်ဆင်ရာတွင် နှစ်ဖက်ပူးပေါင်းဆောင်ရွက်ရန် ရည်ရွယ်သည်။
ထို့အပြင်၊ ယင်းသည် ဓာတ်အားဖြန့်ဖြူးရေး ကွန်ရက်နှင့် ထောက်ပံ့ပို့ဆောင်ရေး အခြေခံအဆောက်အအုံ ဖွံ့ဖြိုးတိုးတက်မှု၊ ဝန်ထမ်းများ လေ့ကျင့်ပေးမှုနှင့် အခြားဆက်စပ်နယ်ပယ်များတွင် ပိုမိုကျယ်ပြန့်သော ပူးပေါင်းဆောင်ရွက်မှုများကိုလည်း နားလည်မှုစာချွန်လွှာတွင် အကျဉ်းချုံးဖော်ပြထားသည်။
ဤသဘောတူညီချက်သည် ယခုနှစ်အစောပိုင်းက ရုရှားဝန်ကြီးချုပ် မီခါအီလ် မီရှူစတင်(Mikhail Mishustin) ဗီယက်နမ်သို့ ဇန်နဝါရီလက လာရောက်စဉ် ရိုဆာတမ် စွမ်းအင်စီမံကိန်း ကုမ္ပဏီ(Rosatom Energy Projects JSC) နှင့် ဗီယက်နမ် လျှပ်စစ်ဓာတ်အား(Vietnam Electricity – EVN) တို့ နျူကလီးယားစွမ်းအင် ပူးပေါင်းဆောင်ရွက်ရေး နားလည်မှုစာချွန်လွှာ လက်မှတ်ရေးထိုးပြီးနောက် ဗီယက်နမ်၏ နျူကလီးယားစွမ်းအင် အစီအစဉ်ကို ပြန်လည်အသက်သွင်းရန် မကြာသေးမီက စတင်ခဲ့သော အစီအစဉ်များအပေါ် အခြေခံထားခြင်းဖြစ်သည်။
မေလတွင် ရိုဆာတမ် ညွှန်ကြားရေးမှူးချုပ် အလက်ဆေး လီခါချက်ဗ်(Alexey Likhachev) နှင့် ဗီယက်နမ် သိပ္ပံနှင့် နည်းပညာဝန်ကြီး ငုယင်မန့်ဟွန်း(Nguyễn Mạnh Hùng) တို့သည် ၂၀၃၀ ပြည့်နှစ်အထိ နျူကလီးယားနည်းပညာ ဖွံ့ဖြိုးတိုးတက်ရေးဆိုင်ရာ ကဏ္ဍပေါင်းစုံ လမ်းပြမြေပုံကို လက်မှတ်ရေးထိုးခဲ့ကြသည်။
ရိုဆာတမ်သည် ဗီယက်နမ်နှင့် နျူကလီးယားနည်းပညာတွင် ရေရှည် ပူးပေါင်းဆောင်ရွက်မှု မှတ်တမ်းရှိပြီး မိမိတို့၏ အမျိုးသားစွမ်းအင်ကဏ္ဍထဲသို့ နျူကလီးယားစွမ်းအင်ကို ပေါင်းစပ်ထည့်သွင်းရန် ဗီယက်နမ်၏ ကြိုးပမ်းအားထုတ်မှုများကို ထောက်ခံအားပေးလျက်ရှိသည်။
နျူကလီးယား ဓာတ်အားပေးစက်ရုံများ တည်ဆောက်ခြင်းနှင့် လည်ပတ်ခြင်းတွင် ပါဝင်ပတ်သက်မှုသည် လာမည့် ဆယ်စုနှစ်များအတွင်း နှစ်နိုင်ငံပူးပေါင်းဆောင်ရွက်မှုအတွက် အဓိကမောင်းနှင်အားတစ်ခု ဖြစ်လာလိမ့်မည်ဟု မျှော်လင့်ရသည်။
ရိုဆာတမ်သည် ၎င်းတို့၏ အဓိက နည်းပညာဖြစ်သော VVER-1200 အနုမြူဓာတ်ပေါင်းဖိုများကို အသုံးပြုသည့် တာဘိုင်နှစ်ခုပါ နျူကလီးယား ဓာတ်အားပေးစက်ရုံကို ဗီယက်နမ်အားပံ့ပိုးပေးရန် အသင့်ရှိကြောင်း သိရသည်။ ဤနည်းပညာဖြင့် လက်ရှိတွင် ကမ္ဘာတစ်ဝန်း၌ ယူနစ် ၆ ခု (ရုရှားတွင် ၄ ခု၊ ဘီလာရုစ်တွင် ၂ ခု) ၌ လည်ပတ်အသုံးပြုလျက်ရှိသည်။
Source – Viet Nam News