ရုရှားက နျူထိပ်ဖူးတပ်နိုင်သောဒုံးကျည်များ ဖြန့်ကျက်မှု ဘီလာရုစ် ထုတ်ဖော်ပြသ

ဘီလာရုစ်နိုင်ငံသည် ၎င်း၏ နယ်မြေတွင် ရုရှား၏ နျူကလီးယားထိပ်ဖူးတပ်ဆင်နိုင်သော Oreshnik ဟိုက်ပါဆောနစ်ဒုံးကျည်စနစ်ကို ဖြန့်ကျက်ထားသည်ဆိုသော ဗီဒီယိုဖိုင်ကို အင်္ဂါနေ့တွင် ထုတ်လွှင့်ပြသခဲ့သည်။ အဆိုပါ ဒုံးကျည်စနစ်ဖြန့်ကျက်မှုသည် မော်စကို၏ ဥရောပတစ်လွှားသို့ ဒုံးကျည်များ ပစ်လွှတ်နိုင်စွမ်းကို မြှင့်တင်ပေးသည့်စနစ်တစ်ခုဖြစ်သည်။

ရုရှားသမ္မတ ဗလာဒီမာပူတင်၏ ခိုင်မာသောမဟာမိတ်တစ်ဦးဖြစ်ပြီး အမေရိကန်သမ္မတဒေါ်နယ်ထရမ့်ပ်အစိုးရနှင့်လည်း ဆွေးနွေးမှုများစလုပ်လာသည့် ဘီလာရုစ်သမ္မတ အလက်ဇန်းဒါ လူကာရှန်ကိုက တာလတ်ပစ်ပဲ့ထိန်းဒုံးစနစ်ကို ဖြန့်ကျက်သွားမည်ဟု ယခုလအစောပိုင်းတွင် ကြေညာထားသည်။

စစ်ဖြစ်လာလျှင် ရုရှားနျူကလီးယားဒုံးကျည်များ ကို ဥရောပသို့ အနည်းငယ်ပိုမိုလျင်မြန်စွာရောက်ရှိစေနိုင်သည့် ယခုဖြန့်ကျက်မှုသည် ရုရှားအတွင်းပိုင်းအထိ ရောက်ရှိနိုင်သော လက်နက်များကို နေတိုးအဖွဲ့က ကိဗ်ထံ မပေးအပ်စေရေး အဟန့်အတားအဖြစ် နျူကလီးယားလက်နက်ခြိမ်းခြောက်မှုကို ခရမ္မလင်က ပို၍တိုးလုပ်လာသည်ကို ပေါ်လွင်စေကြောင်း အနောက်တိုင်း ကျွမ်းကျင်သူအချို့က ပြောကြားခဲ့သည်။

ဂြိုဟ်တုပုံရိပ်များကို လေ့လာမှုအရ မော်စကိုသည် ဒုံးကျည်များနှင့် ရွေလျားပစ်လွှတ်စင်များကို ဘီလာရုစ်အရှေ့ပိုင်းရှိ လေတပ်စခန်းဟောင်းတစ်ခုတွင် ချထားဖွယ်ရှိကြောင်း အမေရိကန်သုတေသီနှစ်ဦးက ပြောကြားခဲ့သည်။

အင်္ဂါနေ့၌ ဘီလာရုစ်ကာကွယ်ရေးဝန်ကြီးဌာနက ထုတ်ပြန်ခဲ့သော ဗီဒီယိုတွင် ဒုံးစနစ်များ၏ တည်နေရာကို မဖော်ပြခဲ့သော်လည်း ရွေ့လျားပစ်လွှတ်စင်များနှင့် တပ်ဖွဲ့ဝင်များသည် တောလမ်းများတလျှောက် မောင်းနှင်သွားလာလျက်ရှိကာ အထူးတပ်ဖွဲ့ဝင်များက လက်နက်စနစ်များကို ပိုက်ကွန်များဖြင့် ဖုံးကွယ်ထားသည်ကို ပြသထားသည်။

မော်စကိုသည် ၂၀၂၄ ခုနှစ် နိုဝင်ဘာလတွင် သမားရိုးကျထိပ်ဖူးတပ်ဆင်ထားသော Oreshnik ဒုံးကျည်ကို ယူကရိန်းရှိ ပစ်မှတ်တစ်ခုကို စမ်းသပ်ပစ်ခတ်ခဲ့သည်။ ဒုံးကျည်သည် အသံထက် ၁၀ဆ ကျော်မြန်သော အမြန်နှုန်းရှိသောကြောင့် ကြားဖြတ်ပစ်ချရန် မဖြစ်နိုင်ဟု ပူတင်က ဝံ့ကြွားထားခဲ့သည်။

Ref: အယ်လ်အာရေဗျအင်္ဂလိပ်