ရန်ကုန် – မန္တလေး ရထားလမ်းပိုင်း၊ ပိန်းဇလုပ်ဘူတာနှင့် ကျောက်တံခါးဘူတာအကြား ကုန်ရထား ခုတ်မောင်းဖြတ်သန်းစဉ် မိုင်းပေါက်ကွဲခဲ့သဖြင့် စက်ခေါင်းနှင့်အတူ စက်ခေါင်း နောက်ကပ်လျက် ကုန်တွဲသုံးတွဲတို့ လမ်းချော်ကျမှုဖြစ်ပွားခဲ့ကြောင်း သိရသည်။
မိုင်းခွဲဖျက်ဆီးခံရမှုကြောင့် ရန်ကုန်မှ ပုံမှန်ထွက်ခွာလာသော အမှတ် (၁၁) အဆန် လူစီးရထားသည် ပဲခူးတိုင်းဒေသကြီး ညောင်လေးပင်ဘူတာ၌ ခေတ္တရပ်နားခဲ့ရပြီး မြန်မာ့မီးရထားက ခရီးသည် ၂၀၈ ဦးအား မော်တော်ယာဉ်ခုနစ်စီးဖြင့် တောင်ငူဘူတာသို့ ပို့ဆောင်ပေးခဲ့ကြောင်း သိရသည်။
ထို့အပြင် မန္တလေးမှ ထွက်ခွာလာသည့် အမှတ် (၁၂) အစုန်ရထားသည် ယနေ့ မွန်းလွဲ (၂) နာရီခွဲတွင် တောင်ငူဘူတာသို့ ရောက်ရှိခဲ့ရာ ညောင်လေးပင်မှ မော်တော်ယာဉ်ဖြင့် လိုက်ပါလာသည့် ခရီးသည်များအား တင်ဆောင်၍ မွန်းလွဲ ၃ နာရီ ၄၅ မိနစ်တွင် မန္တလေးဘက်သို့ အမှတ်(၁၁)အဆန်ရထားအဖြစ် ပြန်လည်ထွက်ခွာပို့ဆောင်ပေးခဲ့ကြောင်း သိရသည်။
တောင်ငူဘူတာသို့ ရောက်ရှိနေသည့် အမှတ်(၁၂)အစုန်ရ ထားနှင့် အမှတ်(၂)အစုန်ရထားတို့ဖြင့် လိုက်ပါလာသည့် ခ ရီးသည် ၂၅၂ ဦးအား မော်တော်ယာဉ်ရှစ်စီးဖြင့် ညောင်လေးပင်ဘူတာသို့ ပို့ဆောင်ပေးပြီး အဆိုပါဘူတာမှ ရန်ကုန်သို့ အမှတ်(၁၂)အစုန် ရထားဖြင့် ဆက်လက်ပို့ဆောင်ပေးခဲ့ကြောင်း သိရသည်။
မိုင်းပေါက်ကွဲမှု ဖြစ်စဉ်ဖြစ်ပွားရာနေရာသို့ နယ်မြေဒေသတာဝန်ရှိသူများ၊ နယ်မြေခံလုံခြုံရေး တပ်ဖွဲ့ဝင်တို့က အချိန်နှင့်တစ်ပြေးညီ နယ်မြေရှင်းလင်းစစ်ဆေးခြင်း၊ မြန်မာ့မီးရထား ဝန်ထမ်းများကလည်း လမ်းချော်ကျသော စက်ခေါင်းနှင့် တွဲများအားမတင်၍ လမ်းပိုင်းအား အမြန်ဆုံး ပြန်လည်ဖွင့်လှစ်နိုင်ရေး ရထားလမ်း ပြန်လည်မွမ်းမံပြုပြင်ခြင်းတို့ကို ဆောင်ရွက်လျက်ရှိကြောင်း သိရသည်။
၂၀၂၁ ခုနှစ် ဖေဖော်ဝါရီ (၁) ရက်မှစ၍ ယခုအချိန်အထိ မြန်မာ့မီးရထားလမ်း ကွန်ရက်တစ်ခုလုံးတွင် ရထားလမ်းနှင့် ရ ထားဘူတာနယ်မြေအတွင်း ဗုံးထောင်မိုင်းခွဲ/ဖျက်ဆီးခြင်း အကြိမ် ၁၃၀၊ ရထားတံတားများအား မိုင်းခွဲဖျက်ဆီးခြင်း ၄၆ ကြိမ်၊ ဘူတာအဆောက်အဦနှင့် ဝန်ထမ်းနေအိမ်များအား မီးရှို့ဖျက်ဆီးခြင်း ၁၂ ကြိမ် ပြုလုပ်ထားကြောင်း သိရသည်။