ပဲခူးတိုင်းဒေသကြီးကို ဖြတ်သန်းပြေးဆွဲမည့် ရန်ကုန်-ပြည်နှင့် ရန်ကုန်-မော်လမြိုင်လမ်းပိုင်းများတွင် DEMU အထူးအမြန်ရထားများကို မကြာမီ ပြေးဆွဲသွားမည်ဖြစ်ကြောင်း မြန်မာ့မီးရထားထံမှ သိရသည်။
အဆိုပါ DEMU အထူးအမြန်ရထားများ ပြေးဆွဲနိုင်ရေးအတွက် ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်း ဦးဆောင်၍ ဇွန် ၁၇ ရက် နံနက်ပိုင်းတွင် လုပ်ငန်းညှိနှိုင်းအစည်းအဝေးတစ်ရပ် ကျင်းပခဲ့ကြောင်း သိရသည်။
အစည်းအဝေးတွင် DEMU အထူးအမြန်ရထားများ မပြေးဆွဲမီ ရထားလမ်းတစ်လျှောက် လွတ်ကင်းမှုမရှိသည့် သစ်ပင်များနှင့် အဆောက်အအုံများကို အချိန်မီဖယ်ရှားရှင်းလင်းရေး၊ တရားမဝင် မီးရထားလမ်းကူးများ ပိတ်သိမ်းရေးနှင့် လူမှုရေး၊ စီးပွားရေး၊ ပညာရေး၊ ကျန်းမာရေးနှင့် ကုန်ထုတ်လုပ်ငန်းများအတွက် မဖြစ်မနေအသုံးပြုရမည့် မီးရထားလမ်းကူးနေရာများတွင် ရပ်ကွက်နှင့် ကျေးရွာအစီအစဉ်ဖြင့် ဂိတ်စောင့်များနှင့် ဂိတ်တံခါးများကို စနစ်တကျ ထားရှိရေးတို့ကို မှာကြားခဲ့ကြောင်း သိရသည်။
ထို့ပြင် မီးရထားလမ်းဖြတ်သန်းရာ ရပ်ကွက်နှင့် ကျေးရွာများအလိုက် မြန်မာ့မီးရထားဆိုင်ရာ ဥပဒေ၊ နည်းဥပဒေများကို သိရှိနားလည်လိုက်နာစေရေးနှင့် ဘေးအန္တရာယ်ကင်းရှင်းစေရေးအတွက် ကြိုတင်ပြင်ဆင်ဆောင်ရွက်ထားရန်လည်း မှာကြားခဲ့ကြောင်း သိရသည်။
ယင်းနောက် မြန်မာ့မီးရထား တိုင်း(၆) အထွေထွေမန်နေဂျာက ရန်ကုန်-ပြည်နှင့် ရန်ကုန်-မော်လမြိုင် DEMU အထူးအမြန်ရထား ပြေးဆွဲမည့်အစီအစဉ်များ၊ တရားမဝင် မီးရထားလမ်းကူးများ တည်ရှိနေမှု၊ မီးရထားလမ်း အဆင့်မြှင့်တင်ရေးလုပ်ငန်းများ ဆောင်ရွက်နေမှုနှင့် ဘူတာစဉ်အလိုက် ရထားရပ်နားမည့် အစီအစဉ်များကို ရှင်းလင်းတင်ပြခဲ့ကြောင်း သိရသည်။
ထို့အပြင် သက်ဆိုင်ရာ တာဝန်ရှိသူများကလည်း DEMU အထူးအမြန်ရထား ဖြတ်သန်းမည့် မြို့များနှင့် ကျေးရွာများတွင် အစုန်၊ အဆန် ဘေးအန္တရာယ်ကင်းရှင်းစွာ သွားလာနိုင်ရေးအတွက် ကြိုတင်ပြင်ဆင်ဆောင်ရွက်ထားမှုများကို ရှင်းလင်းတင်ပြခဲ့ကြကြောင်း သိရသည်။