မြန်မာ – ကိုရီးယားချစ်ကြည်ရေး ဒလတံတား တည်ဆောက်မှု ၅၃ ရာခိုင်နှုန်း ပြီးစီးနေပြီဖြစ်ပြီး ၂၀၂၄ ခုနှစ် ဇန်နဝါရီလတွင် ရာနှုန်းပြည့် ပြီးစီးအောင်ဆောင်ရွက်သွားမည်ဖြစ်ကြောင်း သိရသည်။
ယမန်နေ့ ဖေဖေါ်ဝါရီ (၁၇) ရက်က ဆောက်လုပ်ရေး ဝန်ကြီးဌာန ပြည်ထောင်စုဝန်ကြီး ဦးမျိုးသန့်မှ တံတားတည်ဆောက်ရေး လုပ်ငန်းခွင်သို့ လာရောက်ကြည့်ရှုစစ်ဆေးစဉ် တံတားတည်ဆောက်ရေး ကြီးကြပ်မှုအဖွဲ့ခေါင်းဆောင် တံတားဦးစီးဌာန ဒုတိယညွှန်ကြားရေးမှူးချုပ် ဦးကျော်ကောင်းချိုက ရှင်းလင်းပြောကြားခဲ့ခြင်း ဖြစ်သည်။
အဆိုပါ ရန်ကုန် – ဒလတံတား စီမံကိန်းကို ၂၀၁၉ ခုနှစ်မေလတွင် စတင်ခဲ့ခြင်းဖြစ်ပြီး ၂၀၂၂ ခုနှစ်အတွင်း ပြီးစီးအောင် ဆောင်ရွက်ရန် မူလက ရည်ရွယ်ခဲ့သော်လည်း ပြီးခဲ့သည့် ကိုဗစ်ကာလအတွင်း စီမံကိန်းလုပ်ငန်းများ ယာယီရပ်နားခဲ့ရခြင်းလည်း ဖြစ်သည်။
ဆောက်လုပ်ရေးဝန်ကြီး ဦးမျိုးသန့်သည် တံတားတည်ဆောက်ရေး လုပ်ငန်းခွင် ရန်ကုန်ဘက်အခြမ်းသို့ ဖေဖေါ်ဝါရီ (၁၇) ရက် နံနက်ပိုင်းက သွားရောက်ခဲ့ပြီး တံတားတည်ဆောက်ပြီးစီးမှုအခြေအနေကို ကြည့်ရှုစစ်ဆေးခဲ့ပြီး တည်ဆောက်ရေးလုပ်ငန်းများ အရည်အသွေးပြည့်မီစေရေး ၊ တည်ဆောက်ရေး ပစ္စည်းများ မှန်ကန်စွာအသုံးပြုရေး ၊ လုပ်ငန်းခွင် အန္တရာယ်ကင်းရှင်းစေရေး ၊ စီမံကိန်းလုပ်ငန်းများ အောင်မြင်စွာ ပြီးစီးရေးအတွက် ဦးစားပေးလုပ်ငန်းများအလိုက် ဆောင်ရွက်ကြရန် မှာကြားခဲ့ကြောင်း သိရသည်။
အဆိုပါ ဒလတံတား စီမံကိန်းကို အမေရိကန်ဒေါ်လာ ၁၅ ၇ ဒသမ ၈၃၃ သန်း အကုန်ကျခံကာ ကိုရီးယားနိုင်ငံမှ ED CS ချေးငွေ အတိုးနှုန်း ၀ ဒသမ ၀၁ ရာခိုင်နှုန်းဖြင့် နှစ် ၄၀ ချေးငွေရယူကာ တည်ဆောက်နေခြင်း ဖြစ်ပြီး Main ကန်ထရိုက်တာမှာ ကိုရီးယားနိုင်ငံ၏ GS Engineering Group မှ အဓိက တာ၀န်ယူကာတည်ဆောက်နေခြင်း ဖြစ်သည်။
အဆိုပါ တံတားကြီးတွင် အကွာအဝေးသည် မီတာ ၃၇၀ ခန်းဖွင့်အကျယ်ရှိရေလယ်ပိုင်း တာဝါတိုင်နှစ်တိုင်ပါဝင်ပြီး တံတား၏ ဒလဘက်ခြမ်း ချဉ်းကပ်တံတာအရှည် သ ည် ၅၇၇ မီတာ၊ ရန်ကုန်ဘက်ခြမ်း ချဉ်းကပ်တံတားအရှည် ၆၀၁ မီတာနှင့် ရေလယ်ပိုင်း ပင်မတံတားအရှည်သည် မီတာ ၆၉၀ ရှိပြီး စုစုပေါင်းတံတားရှည်သည် ၆၁၄ ၄ ပေရှိကြောင်း တံတားဦးစီးဌာနမှ သိရသည်။
ရေလမ်းကင်းလွတ်ခွင့် အမြင့်အနေဖြင့် ၄၉ မီတာ (၁၆၀ ပေ)ရှိပြီး တစ်ဖက်လျှင် ၄ မီတာအကျယ် လူသွားပလက်ဖောင်းလည်း ပါရှိကြောင်း သိရသည်။
အဆိုပါ ရန်ကုန် – ဒလ တံတား တည်ဆောက်ပြီးစီးပါက ရန်ကုန်တိုင်းနှင့် ဧရာဝတီတိုင်းအတွင်း လမ်းပန်းဆက်သွယ်ရေးပိုမိုကောင်းမွန်လာမည့်အပြင် ကုန်စည်စီးဆင်းမှုကဏ္ဍတွင်လည်း ပိုမိုသွက်လက်မြန်ဆန်လာမည် ဖြစ်ကြောင်း သိရသည်။
