ရန်ကုန်အနောက်ပိုင်း နည်းပညာတက္ကသိုလ်အနေဖြင့် လှိုင်သာယာမြို့နယ်အတွင်း ရေစီးရေလာကောင်းမွန်စေရေးအတွက် သုတေသနပြုဆောင်ရွက်ရမည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မေ ၃၁ ရက်နံနက်ပိုင်းက ရန်ကုန်အနောက်ပိုင်းနည်းပညာတက္ကသိုလ်အားကြည့်ရှုစစ်ဆေးစဥ် မှာကြားခဲ့ခြင်းဖြစ်သည်။
တက္ကသိုလ်၌တက်ရောက်သင်ကြားလျက်ရှိသည့် ကျောင်းသား၊ ကျောင်းသူများ၏ သွားလာမှုအဆင်ပြေစေရေး၊ အိပ်ဆောင်များကောင်းမွန်မှုရှိစေရေးတို့ကိုအလေးထားဆောင်ရွက်သွားရန်လိုကာ ရန်ကုန်အနောက်ပိုင်း နည်းပညာတက္ကသိုလ်အနေဖြင့် လှိုင်သာယာမြို့နယ်အတွင်း ရေစီးရေလာကောင်းမွန်စေရေးအတွက် သုတေသနပြုဆောင်ရွက်ရန် မှာကြားသည်။
ထိုသို့ သုတေသနပြုရာ၌ မြို့ပြအင်ဂျင်နီယာဘွဲ့တန်းတက်ရောက်နေသော နောက်ဆုံးနှစ်ကျောင်းသား၊ ကျောင်းသူများကိုအဖွဲ့များခွဲ၍ အပိုင်းအလိုက်သုတေသနပြုအဖြေရှာဆောင်ရွက်ရန်လည်း မှာကြားခဲ့သည်။
နစက ဥက္ကဋ္ဌမှ ရန်ကုန်အနောက်ပိုင်းနည်းပညာတက္ကသိုလ်အဝင်လမ်းမကြီးနှင့် လူသွားစင်္ကြံခင်းကျင်းထားရှိမှု၊ အဝင်လမ်းတစ်လျှောက် သစ်ပင်ပန်းမန်စိုက်ပျိုးထားရှိမှု၊ တက္ကသိုလ်ဆောင်ပတ် လမ်းအတိုင်းတို့အားကြည့်ရှုစစ်ဆေးခဲ့ပြီး တက္ကသိုလ်ပါမောက္ခချုပ် ဒေါက်တာကြည်စိုးနှင့် ဆရာ၊ ဆရာမများကို တွေ့ဆုံခဲ့သည်။