ရန်ကုန်တွင် ယခုရက်ပိုင်းအတွင်း မိုးဆက်တိုက်ရွာခြင်းကြောင့် ငမိုးရိပ်ရေလှောင်တမံ ရေပြည့်လာကြောင်း ထုတ်ပြန်ချက်အရသိရသည်။
အဆိုပါ ငမိုးရိပ်ရေလှောင်တမံသည် ရေပြည့်အမှတ် (၁၀၇) ပေရှိရာမှ စက်တင်ဘာလ (၂၄)ရက်တွင် ရေပြည့်အမှတ် (၁၀၆.၉၀)ပေရှိလာပြီး ရေပြည့်အမှတ်ရောက်ရန် (၀.၁၀) ပေသာလိုတော့ကြောင်း သိရသည်။
မဟူရာရေလှောင်မံ ပေါင်းလောင်းရေလှောင်တမံတွေလည်း ရေပြည့်အမှတ်ရောက်ရန် နီးလာကြောင်းနှင့် နှစ်စဉ်မိုးရေချိန်ပျှမ်းမျှ (၁၀၀) လက်မရွာသွန်းလေ့ရှိရာ ယနေ့အချိန်အထိ မိုးရေချိန် (၈၉.၉၀) လက်မ ရွာသွန်းပြီးဖြစ်ကြောင်း သိရသည်။
ဘင်္ဂလားပင်လယ်အော် အနောက်မြောက်ပိုင်းတွင် ဖြစ်ပေါ်နေသည့် လေဖိအားနည်းရပ်ဝန်း၏ အရှိန်ကြောင့်လည်းကောင်း၊ အရှေ့ဘက်မှ ရွေ့လျားလာသော လေပွေလှိုင်းများ၏အရှိန်ကြောင့် လည်းကောင်း စက်တင်ဘာလ (၂၄) ရက်မှ(၂၇) ရက်အတွင်း စစ်ကိုင်းတိုင်းဒေသကြီး အထက်ပိုင်း၊ ကချင်ပြည်နယ်နဲ့ ရှမ်းပြည်နယ်(မြောက်ပိုင်း) တို့တွင် နေရာကျဲကျဲနှင့် နေပြည်တော်၊ ရန်ကုန်တိုင်း ၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်းအောက်ပိုင်း၊ ဧရာဝတီတိုင်း၊ တနင်္သာရီတိုင်း၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ် (တောင်ပိုင်းနှင့် အရှေ့ပိုင်း)တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး နေပြည်တော်၊ ရန်ကုန်တိုင်း၊ ပဲခူးတိုင်း၊ မကွေးတိုင်း၊ ဧရာဝတီတိုင်း၊ တနင်္သာရီတိုင်း၊ ကရင်ပြည်နယ်၊ မွန်ပြည်နယ်နှင့် ရခိုင်ပြည်နယ်တို့တွင် ဒေသအလိုက်နေရာကွက်ပြီး မိုးကြီးနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနက အသိပေးထားသည်။