ပြည်သူ့ကျန်းမာရေးအစီအစဉ်အရ ရန်ကုန်မြို့တွင် ဖွင့်လှစ်ထားသော စားသောက်ဆိုင်များအား ဘေးအန္တရာယ်ကင်းရှင်း၍ စားသုံးရန်သင့်လျော်သော အစားအသောက် ရရှိရေးဆိုင်ရာ
သင်တန်း (၂ )ရက်ကြာ ပို့ချမှုကို ယနေ့ ဇန်နဝါရီ ၂၆ ရက်တွင် စတင်လျက်ရှိကြောင်း ရန်ကုန်မြို့တော်စည်ပင်သာယာရေးကော်မတီထံမှ သိရသည်။
အဆိုပါ သင်တန်းအမှတ်စဉ်အား (၁/၂၀၂၃)အဖြစ် ဖွင့်လှစ်သင်ကြားပေးခြင်းဖြစ်ပြီး၊ ရန်ကုန်မြို့တွင်းရှိ စားသောက်ဆိုင် အုပ်ချုပ်သူ သင်တန်းသား/သူ ၅၀ ဦးကို သင်ကြားပို့ချပေးလျက်ရှိကြောင်း သိရသည်။
ယင်း သင်တန်းကို ရန်ကုန်မြို့တော်စည်ပင်သာယာရေးကော်မတီ ၊ပြည်သူ့ကျန်းမာရေးဌာန၏ စီစဉ်မှုဖြင့် ယနေ့ နံနက် ၉ နာရီ က ဗိုလ်တထောင်မြို့နယ် ကုန်သည်လမ်းရှိ ၁၂ ထပ်ခွဲရုံး၌ ကျင်းပပြုလုပ်ရာ ရန်ကုန်မြို့တော်စည်ပင်သာယာရေးကော်မတီမှ ကော်မတီဝင် ဒေါက်တာငွေစန်း၊ ပြည်သူ့ကျန်းမာရေးဌာနမှ တာဝန်ရှိသူများနှင့် သင်တန်းသားသင်တန်းသူများ တက်ရောက်ကြကြောင်း သိရသည်။
သင်တန်းဖွင့်ပွဲတွင် ကော်မတီဝင် ဒေါက်တာငွေစန်းမှ အဖွင့်အမှာစကားပြောကြားရာတွင် ရန်ကုန်မြို့တော် လူဦးရေသည် တစ်နေ့တစ်ခြား တိုးတက် များပြားလာခြင်း၊ မြို့ပြဆန်သည့် လူ့ဘဝနေထိုင် စားသောက်မှုပုံစံ( Life Style )များပြောင်းလဲလာခြင်းကြောင့် စားသောက်ဆိုင်များမှလည်းဝယ်ယူစားသုံးသည့်ဓလေ့ ပိုမိုကျယ်ပြန့်လာကြောင်းဆိုသည်။
ထို့အပြင် ရန်ကုန်မြို့တော်စည်ပင်သာယာရေး နယ်နိမိတ်အတွင်း စားသောက်ဆိုင် အသစ်များ တိုးပွားလာလျက်ရှိပြီး၊ တိုင်းရင်းသား အစားအစာများ၊ ရိုးရာအစားအစာများသာမက နိုင်ငံတကာ အစားအစာ များသည် အရောင်အဆင်းအနံ့၊ အရသာ ပုံစံဒီဇိုင်းစုံဖြင့် စားချင့်စဖွယ် တွေ့မြင်နေရသည့်အတွက် စားသောက်ဆိုင်များသည် အပြင်အဆင်အမွမ်းအမံ ကောင်းသော်လည်း ရောင်းချသည့် အစားအစာများတွင် ခွင့်မပြုဓါတုပစ္စည်းများ ပါဝင်ပါကကျန်းမာရေး ထိခိုက်နိုင်ပြီး ရေရှည်တွင် ကင်ဆာကဲ့သို့ ရောဂါများရရှိနိုင်ကြောင်း ပြောကြားသည်။
ထို့ကြောင့် အစားအသောက်ကိုင်တွယ်ရောင်းချသူများ၏ မသန့်ရှင်းမှုနှင့် စနစ်တကျ ကိုင်တွယ်ခင်းကျင်းမှုမရှိခြင်းတို့ကြောင့် အစာအဆိပ်သင့်ခြင်း၊ ဝမ်းပျက်ဝမ်းလျှော ရောဂါ၊ ဝမ်းကိုက်ရောဂါ၊ အသည်းရောင် အသားဝါရောဂါ၊ တိုက်ဖွိုက်(ခေါ်) အူရောင်ငန်းဖျား ရောဂါနှင့် သန်ကောင်စွဲခြင်း အစရှိသည့် ရောဂါများဖြစ်ပွားနိုင်ကြောင်းအပါအဝင် အခြားကျန်းမာရေးဆိုင် အသိပညာများအား ပြောကြားခဲ့သည်။
အလားတူ စားသောက်ဆိုင်များတွင် အရည်အသွေးမပြည့်ဝသည့် စားသုံးဆီများ၊ အစားအစာများတွင် အသုံးပြုခွင့်မရှိသည့် ဓါတုဆိုးဆေးများ ခွင့်မပြုအစားအစာထပ်ဖြည့် ပစ္စည်းများ၊ တာရှည်ခံ ဆေးများပါဝင်သည့် အစားအစာများကို ချက်ပြုတ်ရောင်းချပါက စားသုံးသူများ ၏ ခန္ဓာကိုယ်အတွင်းအင်္ဂါများ၊ အထူးသဖြင့် အသည်းထိခိုက်ပျက်စီးပြီး ရေရှည်တွင် ကင်ဆာရောဂါများ ဖြစ်နိုင်သည်ကို သတိထားစေလိုကြောင်း ထပ်မံပြောကြားသည်။
သင်တန်းအား ပြည်သူ့ကျန်းမာရေးဌာနမှ ဌာနမှူး(ဒုတိယညွှန်ကြားရေးမှူးချုပ်)ဒေါက်တာမြင့်သန်းထွန်း က Food Hygiene and Sanitation for Food Handlers (Part 1) ဘာသာရပ်အားလည်းကောင်း၊ ဒေါက်တာရွှေဘော်မှ အစားအသောက်ပြုပြင်ထုတ်လုပ်မှုနှင့် ဘေးအန္တရာယ် ကင်းရှင်းရေး ဘာသာရပ်အား လည်းကောင်း၊ ဒေါက်တာကိုကိုထွန်း မှ HACCP ဘာသာရပ်အား လည်းကောင်း၊ ဒေါက်တာမြင့်မြတ်မှ တစ်ကိုယ်ရည် သန့်ရှင်းရေးနှင့် စားသောက်ဆိုင်များ လိုက်နာရမည့် စည်းကမ်းချက်များအားလည်းကောင်း၊ ဒေါက်တာအောင်ကိုဉီးမှ Food Sanitation & Safety ဘာသာရပ်အားလည်းကောင်း၊ ဒေါက်တာ ဝေယံထက်မှ မသန့်ရှင်းသောရေမှတစ်ဆင့် ကူးစက်တတ်သော ရောဂါများ အကြောင်းအားလည်းကောင်း၊ ဒေါက်တာမြင့်သန်းထွန်း မှ Food Hygiene and Sanitation for Food Handlers (Part 2) အားလည်းကောင်း သင်ကြားပို့ချပေးခဲ့ကြောင်း သိရသည်။
